2 Tekwaro 3

11

Solomon ocako gero Ot pa Rwot i Jerucalem iwi got me Moria, kama yam Rwot onyute iye bot wone Daudi, i kabedo mayam Daudi oyero, ikom laro moyo pa Ornan ma jo Jebuc. 2En ocako gerone i dwe me aryo i mwaka me angwen me loce. 3Solomon opimo Ot pa Lubanga ma en omito geroneni kit man: bore romo puti pyere abongwen, ki lace puti pyere adek. 4Ki kicika ma i dogola me donyo ma inyim kicika me ot lace romo puti pyere adek, marom ki lac me ot ma dite; ki bore tung malo romo puti miya acel ki pyere aboro. Ci omwono iye woko ki jabu ma kiliyo maber. 5Solomon oguru kor ot me kicika ma dite ki bao ciprec, ci omwono kom bao woko ki jabu mabere, ma kigoro iye cal yadi otit ki nyor. 6Ci odeyo i ot ma mwonya mada ki godi matino me wel ma kimwono ikom jabu. Jabune obedo jabu ma kikelo ki i Parvaim. 7Kitmeno en omwono i ot ducu ki jabu, riine, ki rii dogolane, kor kicika ot ducu, ki dogolane; ka dok ogoro cal lukerubi i kor kicika ot. 82

En dok otiyo Kabedo Maleng Makato ducu; bore puti pyere adek, marom ki lac me kicika ot ma dite, ki lace bene puti pyere adek. Ci omwono kome woko ki jabu mabere maromo talanta miya abicel. 9Pek me mucumar me jabu ma kiguro kwede obedo cekel pyere abic. En dok omwono kicika mamalo ducu ki jabu. 103

I Kabedo Maleng Makato ducu en oketo iye cal lukerubi aryo me bao ma kipayo, ci omwono komgi woko ki jabu. 11Bwom lukerubi ducu bore muyare romo puti pyere adek. Bwomgi acel acel bore romo puti abiro ki nucu. Wi bwom lakerubi acel ogudu kor ot, kun bwome tungcel ma bore puti abiro ki nucu, wiye ogudu wi bwom lakerubi wadi; 12ki bwom lakerubi man bwome acel ma bore puti abiro ki nucuni, wiye bene ogudu kicika ot, ki bwome mukene, maromo puti abiro ki nucuni, wiye orwate ki bwom lakerubi mukwongoni. 13Bwom cal lukerubi magi borgi muyare oromo puti pyere adek. Gucung ki tyen gi ma gineno tung kicika ot ma dite. 144Okwoyo bongo kicika ki bongo ma bulu ki ma lamarlamar ki ma kware, ki bongo camanini mabere, ma odeyo ki cal lukerubi.

Tic pa Kuram i Ot pa Lubanga

(1 Luk 7:5-51)

15En dok otiyo wir aryo ma bocogi romo puti pyere abic wiye aryo, ki lalukana iwigi ma bocogi romo puti abiro ki nucu, ci oketogi inyim ot. 16Ka dok otiyo nyor macalo tiko ngut, ci oketogi iwi wir aryo ducu, ka dok otimo cal nyig okwer pomegranat miya acel, ci oketogi ikom nyor. 17Ci ocibo wir magi inyim ot pa Lubanga, acel tung kupiny, ki mukene tung kumalo. Ci ocako nying ma tung kupinyi ni, Jakin5, ki ma tung kumaloni olwongo ni Boaj6.