2 Tekwaro 2

Yub pi gero Ot pa Lubanga

(1 Luk 5:1-18)

1Solomon omoko tame me gero Ot pa Lubanga pi woro nying Rwot, kacel ki gang kale kikome. 2Solomon oyero jo alip pyere abiro me yweko jami gedo, ki jo alip pyere aboro me muku godi i lobo ma obedo gotgot, ki jo alip adek ki miya abicel me bedo ludito maloyo lutic. 3Solomon dok ocwalo lok bot Kuram rwot me Turo ni, “Kit mayam ibedo ki wora Daudi kun i cwale bao cedar me gero ode me bedone, ber i bed kweda bene kitmeno. 4Nen, ayube pi gero ot pi woro nying Rwot Lubangana, ci abidyero bote pi wango i ye odok eceta ma ngwece kur inyime, ki pi tyero iye mugati me gitum awanga i odiko ki otyeno, ki i ceng Cabit ducu, ki i Por Dwe, ki inino madito ma Rwot Lubangawa oketo, mayam en ociko pi jo Icrael matwal. 5Ot ma abigeroni bibedo dit mada, pien Lubangawa dit makato lubanga mukenegu ducu. 61Ento anga matwero gero ot pi Lubanga? Kadi polo kulu matye malo twali, pe twero romo en me bedo iye. An kono an anga ma atwero gero ot pire? Ento kono atwero tiyo ot mo wek obedo kawango odok eceta inyime keken. 7Pieno amito ni icwala dano mo ma kwiri matwero tic ikom jabu, ki ryal, ki mola, ki nyonyo iron, ki bongo ma lamarlamar, ki ma kwar ki ma bulu, ki dano ma kipwonyo ki goro kom jami, wek otii ki lutica ma kwiri ma gitye kweda i Juda ki i Jerucalem, mayam wora Daudi oyerogi pi tic. 8Dok i cwala bene bao cedar, ki ciprec, ki bao algum ma gia i Lebanon, pien angeyo ni lutici gingeyo tongo yadi ma i Lebanon. Dok lutica gibibedo ki lutici, 9wek guyuba bao madwong, pien ot ma abigeroni bibedo dit dok me aura. 10Abimiyo bot joni ma gitingo bao, ngano ma nyige maromo guniya alip pyere abicel, ki cayiri maromo guniya alip pyere abicel, ki kongo bwino maromo lita miya angwen ki moo jeituni bene lita miya angwen obed pi lutici me acamagi.”

11Kuram rwot me Turo odok iye ki waraga ma ocwalo bot Solomon ni, “Pien Rwot maro jone omiyo oketo in ibedo rwot ma loyogi.” 12Kuram dok owaco ni, “Kipak Rwot Lubanga pa Icrael, ma con ocweyo polo ki lobo, ma dok bene omiyo ki Daudi wode maryek, matye ki niang matut, ma dong bigero Ot pi Rwot, kacel ki gang kale kikome.

13An dong acwali dano ma ladiro matye ki ngec matut, en Kuram-abi, 14ma wod pa dako ma anyira Dan, ma wone dano me Turo. Kipwonyo en ki tic ikom jabu, ki ryal, ki nyonyo bronze, ki nyonyo iron ki godi, ki bao, ki bongo ma lamarlamar, ki ma bulu ki ma kwar ki camanini mabere. En ngeyo bene tic ducu me goro coc ikom jami, ngeyo lubu kit cal mo keken me tic ma kimiye, kun tiyo kacel ki ludironi, ki ludiro pa rwoda Daudi ma woru. 15Pieno dong icwal botwa ngano ki cayiri, ki moo ki kongo bwino ma ceng iwaconi; 16ci wan wa bitongo kit bao ducu ma i mito ki i Lebanon, ka dok wabitweyogi ci ki bikwangogi iwi pii macalo bwoda nio wa i Jopa, wek in dong iom i ter wa i Jerucalem.”

Solomon ocako gero Ot pa Lubanga

(1 Luk 6:1-38)

17Solomon dok ocako kwano wel jo ducu me rok mukene ma gibedo i lobo Icrael, kit mayam wone Daudi kong okwanogini. Ci kinongo ni welgi romo jo alip miya acel ki pyere abic wiye adek ki miya abicel. 18En oyero jo alip pyere abiro ki ikin gi me yweko jami gedo ducu, ki jo alip pyere aboro me muku godi i lobo ma obedo gotgot, ki jo alip adek ki miya abicel me bedo ludito maloyo lutic, pi cuku cwiny dano wek gutii tic.