2 Tekwaro 35

Yocia okwero Karama me Kato

(2 Luk 23:21-23)

1Yocia okwero Karama me Kato pa Rwot i Jerucalem. Ci guneko lutino romi me Kato inino dwe apar wiye angwen me dwe mukwongo. 2En oyero ajwaki ci oketogi i dog ticgi, dok ocuku cwinygi ikom tic ma i Ot pa Rwot. 3Dok owaco bot Lulevi ma gin aye gipwonyo jo Icrael ducuni, ma gin jo maleng inyim Rwot ni, “Wuket Canduk me Gicike i Ot pa Rwot Lubanga ma Solomon wod pa Daudi, rwot me Icrael yam ogero; pe myero dok wubed katingone iwi gwokwu. Wun dong wutii bot Rwot Lubangawu ki lwake jo Icrael. 41Wuyube kun wulubu dog odi pa kwariwu ki dulwu, kun wulubu bene gin mayam Daudi rwot me Icrael ociko ki gin ma wode Solomon ociko. 5Dok wucung i Kabedo Maleng, wucung kun wulubu dog odi pa kwari utmegiwu ma gin jo me loboni, kun dul acel acel pa Lulevi ocung pi dog ot acel acel pa lwak. 6Kitmeno dong wunek lutino romi me kwero Karama me Kato, wulonye kenwu, wuyub gin ma mite pi utmegiwu, wek gulub lok pa Rwot ma Moses ociko.”

7Yocia omiyo lutino romi ki lutino dyegi alip pyere adek, ki twoni alip adek, bot lwak pi gityer me kwero Karama me Kato pi lwak jo ducu ma onongo gitye kenyo. Jami magi ducu jami ma oa ikom jami pa rwot Yocia. 8Ki lutelagi bene gumiyo gin ma cwinygi opwoyo bot lwak, bot ajwaki ki bot Lulevi. Ilkia, Jekaria ki Jekiel, ma gin ludito ma giloyo tic ma i Ot pa Lubanga, gumiyo bot ajwaki lutino romi ki dyegi alip aryo ki miya abicel ki twoni miya adek me gityer me kwero Karama me Kato. 9Konania ki omegine, ki Cemaya ki Netanel, ki Kacabia, Jeyel ki, Jojabad, ma gin ludito pa Lulevi, gumiyo lutino romi ki dyegi alip abic, ki twoni miya abic, bot Lulevi me gityer me kwero Karama me Kato.

10Ikare ma dong kiyubu jami ducu kakare me kwero Karama me Kato, ajwaki gucako cung i kabedogi, ki Lulevi bene gucung i dul ki dul i dog ticgi kun gin ducu gilubu gin ma rwot ceng ociko. 11Guneko lutino romi me kwero Karama me Kato, ci ajwaki ticgi obedo me coro remo ma kigamo ki bot Lulevi ma gitye kayango ringo. 12Ikare ma kitimo man kiketo dul mukene me gitum cen, ma kibipoko ikin lwak kun kilubu dog odi pa kwarigi, wek gutyer bot Rwot, macalo kicoyo i buk pa Moses. Ci gutiyo ki twoni bene kitmeno. 132Lulevi gubulu lutino romi me kwero Karama me Kato ki mac kun kilubu cik mayam kiciko; ento jami me gityer maleng gutedo ateda ki otako ki agulu, ki cupuriya, ka gucako tingone gutyero bot lwak oyotoyot. 14Inge meno gubedo kayubu jami pirgi ken gi ki pi ajwaki, pien ajwaki ma gin likwayo pa Aron onongo gitye ki tic madwong tutwal me wango gitum awangagu ki moo dwologu nio wa i wor. Kitmeno Lulevi guyubu jami pirgi ken gi ki pi ajwaki bene ma gin likwayo pa Aron. 153Likwayo pa Acap ma gin luwer, gubedo i kabedogi macalo Daudi, Acap, Keman, ki Jedutun ma lanebi pa rwot onongo guciko; ki lugwok dogola Ot pa Rwot Lubanga ducu gubedo i dogola acel acel. Pe gumito weko dogticgi pien gin guniang ni utmegigi ma Lulevi gubedo kayube pirgi bene.

16Meno aye kit ma kiyubu ki tic pa Rwot i ninonu, pi kwero Karama me Kato ki pi tyero gitum awanga ikom keno tyer pa Rwot, kun kilubu lok ma rwot Yocia ociko. 174Jo Icrael ducu ma onongo gitye kunu gukwero Karama me Kato ikare meno, ki dok gukwero bene nino madito me Mugati ma Tobi Pe iye pi nino abiro. 18Pe tye nino mo madito me Karama me Kato ma kikwero kit man i Icrael nia ikare pa lanebi Camuel. Dok pe tye laker mo ikin luker me Icrael mayam okwero nino Karama me Kato macalo Yocia okwero man, kacel ki ajwaki ki Lulevi, ki jo Juda ki jo Jerucalem ducu ma onongo gubedo tye, ki jo ducu ma gibedo i Jerucalem. 19I mwaka me apar wiye aboro me loc pa Yocia en aye kikwero iye nino man madit me Karama me Kato.

Agiki loc pa Yocia

(2 Luk 23:28-30)

20Inge man ducu, ma dong Yocia otyeko yubu Ot pa Lubanga, Neko rwot me Ejipt ocito kalweny i Karkemic macok ki kulu Euprate, ci Yocia oa bene ocito kalweny ikome cut. 21Ento Neko ocwalo kwena bot Yocia kun waco ni, “An pe atye ki lok mo ikomi in rwot me Juda! Tin an pe abino kalweny ikomi, ento abino kalwenyo ikom jo ma atye kalweny ikomgi keken; dok Lubanga en aye ocika me tiyo man oyotoyot. Wek pyem ki Lubanga matye kwedani miyo neki woko.” 22Ento Yocia pe oye loko ngeye ki rwot Neko, ci oruke macalo dano mo ata wek elweny kwede. En Yocia pe owinyo lok pa Neko ma oa ki i dog Lubangani kadi ki acel ento ocere ocito kalweny kwede i bar; me Megiddo. 23Cutcut gutugi celo rwot Yocia woko; ci rwot owaco bot lutice ni, “Wukwanya woko ki iwang lweny, pien dong gutyeko keto ret marac tutwal, ikoma.” 24Ci lutice gukwanye woko ki i gadigadine gukete i gadigadine me aryone ka gutere i Jerucalem. Yocia oto, ci kiyike i lyel pa kwarine. Jo Juda ki jo Jerucalem ducu gukumu matek pi Yocia. 25Jeremia bene okok matek pi Yocia; co kacel ki mon ma gubedo kawer guloko pi Yocia i kokogi cake ikare ca nio wa onyo. Guketo man odoko cik i Icrael ducu: nen kityeko coyone i Buk me Koko. 26Lok kom Yocia mudonge ducu, ki tic mabeco ma en ceng otiyo ducu ki kit ma omine bot Rwot, ki worone ikome lok me Cik pa Rwot. 27Ki gin mayam en otiyo ducu, nia i acakine nio i agikine, nen, ki tyeko coyone i Buk pa Luker me Icrael ki me Juda.