2 Tekwaro 34

Rwot Yocia me Juda

(2 Luk 22:1-2)

11

Yocia ocamo ker ma mwaka me dite oromo aboro, ci obedo kaloc i Jerucalem pi mwaka pyere adek wiye acel. 2Yocia obedo katiyo gin manen atir iwang Rwot Lubanga, en obedo kalubu kit pa kwarone Daudi ducu, pe obedo kacabe ikom lok ma dok i lubu cik Rwot Lubanga.

Yocia ojwero ka woro jokgigu woko

3I mwaka me aboro me loce, ma onongo en pud awobi matidi, Yocia ocako woro Lubanga kit ma kwarone Daudi ceng otiyo kun keto cwinye ikome. I mwaka me apar wiye aryone me loce, en ocako lonyo Juda ki Jerucalem kun muku wang jogi ma iwi godi woko ducu, ka dok ojwero yen ducu ma kicomo pi woro jok Acera ducu, ki cal ma kipayo, ki cal jogi ma ki cweyogu ducu. 42 En omiyo kimuku keno tyer pa lwak Baalgu ducu ki kama keno me wango gityere onongo tye iye onginyogi woko; ka dok omuku keno tyer ma gucudu malo iwi godi kama kiwango iye odok eceta. Ci dok ojwero wir me woro jok Acera ducu, ki cal apaya, ki cal jogi ma kiliyo aliya, ongidogi woko matinotino, ka orego odoko apwa, ka dong ocako onyone iwi lyel pa jo mayam gubedo ka tyero gityer bot cal jogi magi. 53En bene owango cogo pa ajwaki iwi keno tyergi, man otiyo pi lonyo Juda ki Jerucalem odok maleng odoco. 6Ki i taun madito pa jo Manace, jo Epraim ki jo Cimeon, nio kwede wa i taun pa jo Naputali, ki iwi oburgi murumu kenyo, 7en omuku keno tyer pa jogi, ki cal jok Aceragu ducu, ki cal jogi mukenegu, ci oturu matinotino tutwal, ka dok omuku bene lwak keno tyer kama kiwango iye odok eceta ki i lobo Icrael ducu. Ka lacen dong en odok cen i Jerucalem.

Kinongo buk me Cik

(2 Luk 22:3-20)

8I mwaka me apar wiye aboro me loce, madong onongo en otyeko kwanyo gin maracu woko ki i lobo kacel ki i Ot pa Lubanga Yocia ocwalo Capan wod pa Ajalia, ki Maaceya laloc me taun madit, ki Joa wod pa Joakaj, ma en laco lok ma time, kayubu Ot pa Rwot Lubangane. 9Gubino bot Ilkia ajwaka madit ci gumiyo bote lim mayam gikelo i Ot pa Lubanga, ma Lulevi ki lukur dogola yam gujogo ki bot jo Manace ki jo Epraim dok ki bot jo Icrael ducu mudong, ki bot jo Juda ki jo Benjamin ducu, ki bot jo ma gibedo i Jerucalem. 10Ci gumiyo lim man bot ludito tic ma i Ot pa Rwot Lubanga; ci gin lutic magi ma gitiyo i Ot pa Rwot gumiyo lim man pi yubu Ot pa Rwot kama obale, ki me rocone odoco. 11Gumiyo lim man bot lupaa bao ki bot lugedo wek guwil ki godi ma kipayo, ki me wilo yen pi gin latwe bao, ki pi rii wi odi ducu mayam luker me Juda guweko obale odoko wi oburni. 12Ci co magi gutiyo tic ki gen. Jo ma loyogi onongo kiketo Jakat ki Obadia ma gin Lulevi, ma jo me ot pa Merari, Jekaria ki Meculam, ma jo me ot pa Kokat, kiketogi me bedo lulo dogtic me Ot pa Rwot. Lulevi ducu mayam gungiyo ki jami me wer, 13kiketogi me bedo lulo jo ma tingo yec, madok bene ticgi me cungu dano i dog tic mapatpat; Lulevi mukene gubedo lucoc, lunyampara ki lugwok dogola Ot pa Lubanga.

14Ikare ma gitye kakwanyo lim ma onongo kikelo i Ot pa Rwot, ci Ilkia ajwaka madit otugi nongo buk me Cik pa Rwot mayam omiyo ki Moses. 15Cutcut Ilkia owaco bot Capan ma karan ni, “Atyeko nongo buk me Cik i Ot pa Rwot.” Ilkia ocako miyo buk man bot Capan. 16Capan okelo buk man bot rwot, ka omede kitito lok bot rwot Yocia ni, “Tic ducu mayam iciko ni lutici guti, gin dong gutyeko tiyone. 17Wakwanyo lim ma wanongo i Ot pa Rwot ci wamiyo i cing lulo dog tic ki luticgi.” 18Ka dok Capan karan otito bot rwot ni, “Ajwaka Ilkia otyeko miya buk mo.” Ci Capan ocako kwanone inyim rwot.

19Ka rwot owinyo lok me Cik, ci oyeco bongine woko. 20Omiyo rwot ociko Ilkia, ki Akikam wod pa Capan, ki Abudon wod pa Mika, ki Capan ma karan, ki Acaya ma latic pa rwot, kun waco ni, 21“Wucit, wupeny dog Rwot Lubanga pira ki pi jo ma gudong i Icrael ki i Juda, pi lok man ma i buk ma kityeko nongoni. Akemo pa Rwot kara olyeto ikomwa matek kuman, pien kwariwa pe gubedo ka woro lok ducu ma i buk man, pi tic kwede ikit ducu mayam kicoyo kwede ma mako komwa.” 22Kitmeno Ilkia kacel ki jo ma rwot ocwalogi gucito bot Kulda ma lanebi ma dako ma cware Calum wod pa Tokat, ma wod pa Kacra, ma lagwok bongi pa rwot. Dakonu onongo bedo i Jerucalem i dul gang ma kilwongo Dul gang me Aryone; ci guloko kwede lok ikom gin mutime. 23En owaco botgini gucit gutit lok pa Rwot Lubanga bot dano ma ocwalogi ni 24Rwot Lubanga owaco ni, “Nen ba, abikelo gin marac bipoto ikom kabedo man, ki ikom jo ma gibedo iye, pi cobo lok ducu ma kiceno ki dano ma kicoyo i buk ma kikwano inyim rwot me Juda. 25Gin gutyeko bwota woko kun giwango odok eceta bot lwak lubanga mukene, wek kimii kiniga obed ka maka pi jogi ducu ma kitiyo ki cinggini. Pieno akemona bilyeto matek ikom kabedo man ma pe dong bikwe. 26Ento lok ma dok ikom rwot me Juda ma ocwalowu kapenyo dog Rwot Lubanga, wun wubiwace kit man ni: Rwot Lubanga pa Icrael owaco kit man ni, ikom lok ma iwinyoni, 27dong ityeko ngut ki i cwinyi ci imwole keni inyima ikare ma iwinyo lok mayam aloko ikom kabedo man ki ikom jo ma gibedo iye, imwole woko keni inyima, ci icako yeco bongini woko kun ikok kwede inyima; pieno an bene atyeko winyo kokoni, man lok pa Rwot kikome. 28Nen ba, an abidwoki ikin kwarini, ci kibiyiki i lyeli ki kuc, dok wangi pe bineno gin maracu ducu ma abikelo ikom kabedo man ki ikom jo ma gibedo iye.” Ci gin gudwoko lok bot rwot.

Yocia oketo Gicike me woro Rwot

29I nge meno rwot ocwalo kwena bot ludongo me Juda ki me Jerucalem ci gucoke kacel. 30Rwot ocako cito i Ot pa Rwot Lubanga kacel ki jo Juda ducu, ki jo ma gibedo i Jerucalem ajwaki kacel ki Lulevi ki lwak ducu, jo madito ki jo matino; ci okwano botgi buk me gicike ma kinongo i Ot pa Rwot. 31Rwot Yocia ocung i kabedone ka ocako keto gicike inyim Rwot Lubanga ni, ebilubu gin ma Rwot mito dok ebigwoko cike ki gin ma en ociko ducu, ki cwinye ducu, ki tipune ducu, kun etiyo lok me gicike ma kicoyo i buk meno. 32En ociko dano ducu ma onongo gitye i Jerucalem ki i Benjamin ikare meno ni gulub gicike meno. Jo ma gibedo i Jerucalem gubedo kalubu gicike pa Lubanga, ma Lubanga pa kwarigi. 33Ka dok Yocia ojwero jami me kipyeda woko ducu ma i dul lobo ducu pa jo Icrael, omiyo jo ducu ma i Icrael guworo Rwot Lubangagi. I karene ducu pe guloke guweko lubu kor Rwot Lubanga pa kwarigi.