2 Tekwaro 33

Rwot Manace me Juda

(2 Luk 21:1-9)

1Manace ocamo ker ma mwaka me dite onongo oromo apar wiye aryo, ci obedo kaloc i Jerucalem pi mwaka pyere abic wiye abic. 21Manace obedo katiyo gin manen marac iwang Rwot Lubanga, kun lubu kwede kit tim me kwer pa rok ducu mayam Rwot oryemogi woko ki inyim jo Icrael. 3En dok oroco wang jogi ma iwi godi, ka dok ogero odoco kama yam wone Kejekia ojwerogi wokoni. En ocano keno tyer pi lwak Baalgu, ka dok ocomo yen pi woro Acera ma jok ma dakoni, ci ocako woro kwai jami mapol ma i polo ducu, kun tiyo botgi. 42Dok ocano keno tyer pa jogigu wa i Ot pa Rwot Lubanga, kama yam Rwot owaco ni, “Abiketo nyinga bedo i Jerucalem matwal wek kiwora.” 5Ka dok ocano lwak keno tyer pi woro kwai jami mapol ma i polo ducu idyekal aryo me Ot pa Rwot Lubanga. 6En bene owango awobene ki mac me gityer i nota pa wod pa Kinom, dok obedo katyet ki ajaa ki ngiyo i dyelgu kun tiyo ki lutal ki lukor tipugu ki megi jogi. Obedo katiyo gin manen maracu iwang Rwot, ma omiyo kiniga omako Rwot Lubanga. 73Ka dok omiyo kipayo cal jok, ci ocibo i Ot pa Lubanga, mayam Lubanga olok ikome bot Daudi ki bot wode Solomon ni, “I Ot man, ki i Jerucalem, en aye mayam ayero ki ikin kaka ma i Icrael ducu, ni abiketo nyinga bedo iye matwal wek ki wor. 8Pe dong abimiyo tyen jo Icrael bedo kawire a woko ki iye i lobo mayam amiyo bot kwariwuni, teke gibigwoke kun kilubu kit lok ducu ma atyeko cikogi kwede, dok kilubu Cika ducu mayam latica Moses ocikogi kwede.” 9Manace obito jo me Juda ki jo ma gibedo i Jerucalem me timo gin maracu, makato lurok mayam Rwot ojwerogi woko ki inyim jo Icrael.

Manace ongut

10Rwot oloko bot Manace kacel ki lwake lok me juk, ento gin pe guwinyo loke. 11Pimeno Rwot ocwalo ludito maloyo mony pa rwot me Aciria, gumako Manace ki goli, gutweye ki nyor mola ci gutere kwede wa i Babilon.

12Ikare matye i can matek ci en obako doge, kun mwole inyim Rwot Lubanga pa kwarine ka olege ni otime kica. 13Lubanga owinyo leganeni ki me bako doge, ka ocako dwoko en cen wa i Jerucalem me bedo ikom kere kikome. Ci Manace ongeyo atir ni Rwot en aye Lubanga ma Latwer maloyo ducu.

14Lacen en ogero cel ma woko me gangkal pa Daudi ki tung kupotoceng me Gikon i nota, en ogero o wa i yoo ma wok ki i dog gang ma kilwongoni dog cel me Rec, orumu ki Opel, ogero ma ocudu malo likung; ka dok bene oketo ludito maloyo mony i taun madito ducu ma kirumu ki cel gogo ma i Juda. 15En ojwero lwak lubanga me rokgu kacel ki cal jokgu woko ki i Ot pa Rwot, ka dok omuku keno tyer ducu mayam en ocano kama kigero iye ki Ot pa Rwot, ki ma onongo gitye i Jerucalem, ocokogi ducu obologi woko inge taun madit meno. 16En dok ocano keno tyer pa Rwot odoco, ka otyero iye gitum me gityer lakwecwiny ki gityer me miyo pwoc; ci ociko jo Juda me woro Rwot Lubanga pa Icrael. 17Lwak pud gumede ki tyero gitum iwi godi, ento gityerogi bot Rwot Lubangagi keken.

Agiki loc pa Manace

(2 Luk 21:17-18)

18Lok kom Manace mudonge ducu, wa ki legane bot Lubangane, ki lok pa luneno ma guloko bote i nying Rwot Lubanga pa Icrael, kicoyo i Buk me Tekwaro pa Luker me Icrael, 19ki lagam me legane ma Lubanga odwoko bote, bale ki kit ma en ocayo kwede dog Rwot, ki kabedo ducu ma en ceng ogero iye wang jogi ma iwi godi, ka dong ocibo lwak yen me woro Acera ma jok ma dakoni, ki cal jogine ma ocibo ma onongo pud peya omwole kene, nen, gityeko coyone i Buk me Tekwaro pa Lunebi. 20Kitmeno Manace oto, en oywe kacel ki kwarine, ci kiyike i ode; wode Amon aye oleyo katyene.

Rwot Amon me Juda

(2 Luk 21:19-26)

21Amon ocamo ker ma mwaka me dite pyere aryo wiye aryo, ci obedo kaloc i Jerucalem pi mwaka aryo. 22Amon obedo katiyo gin manen marac iwang Rwot Lubanga, kit macalo wone Manace obedo katiyo. Amon obedo katyero gitum bot cal lubangagu mayam wone Manace otiyo, kun worogi bene. 23En pe omwole kene inyim Rwot Lubanga, kit macalo wone Manace yam omwole kwede, ento Amon obedo ka tingo alii makato teretere. 24Ci lutice gupiro lok ikome, ci guneko en woko ki i ode. 25Ento lwak me lobonu guneko jo ducu ma onongo gupiro lok ikom rwot Amon; ci gin lwak me lobonu guketo wode Yocia me bedo rwot ma kakare.