2 Tekwaro 32

Aciria ocwalo kwena me monyo Juda

(2 Luk 18:13-37; 2 Luk 19:14-19; 19:35-37; Ica 36:1-22; 37:8-38)

1I nge lok magi ki tic magi ducu me gen, ikare ma Kejekia obedo lagen kun tiyo inyim Rwot Lubanga, Cenakerib rwot me Aciria obino kalweny ikom taun madito ducu me Juda ma kirumugi ki cel gogo, kun otamo me loyogi woko wek gubed mere. 2Ka Kejekia oneno ni Cenakerib otyeko bino ma mito lweny alwenya ikom Jerucalem, ci en 3ocako bedo ki yub gin ki lutelane kacel ki oteka lwenye ducu me juku wang it ma inge gang; ci gin gukonye. 4Ci lwak mapol gucoke, gucako juku wang it kacel ki ora kulu mayam piine mol wok ki idye lobo meno, kun giwaco ni, “Pingo waweko luker me Aciria gibino kany gilimo pii madwong?” 5En ocako tic matek cut ci ogero cel matek mayam orete woko piny, ka dok oketo lubele i wiye, ki tung wokone ogero cel mukene; ci omiyo Milo ma en kabedo ma i gangkal pa Daudi ocung matek. En bene otiyo jami lweny ki kwot mapol ata. 6Ka dok ocako keto ludito luwi mony me loyo lwak, ocokogi ducu kacel i kabedo mo malac ma inyim dog gang, ci oloko botgi lok me cuku cwiny, kun waco ni, 7“Wubed tek dok jo macir. Pe wubed lwor, cwinywu bene pe myero obale inyim rwot me Aciria ki lwake ducu ma en tye kacel kwede; pien ngat madit makato en aye tye kwedwa. 8En tye ki dul mony pa dano ma gigeno tekogi keken gi; ento wan watye ki Rwot Lubangawa ma konyowa dok lwenyo pirwa.” Lwak gucako bedo ki gen pi lok pa Kejekia rwot me Juda.

9Lacen Cenakerib rwot me Aciria kacel ki dul monye ducu ma onongo gumonyo Lakic, ocwalo lukwenane gucito wa i Jerucalem bot Kejekia rwot me Juda ki lwake ducu me Juda ma onongo gitye i Jerucalem, kun giwaco ni, 10“Cenakerib, rwot me Aciria, owaco boti kuman ni, ‘In ijengo genni ikom gin ango, ma omiyo pud icung matek i Jerucalem? 11Kejekia mono pe tye kaumu wangwu wek wuto woko ki kec kacel ki orwo pii, ma nongo en tito botwu ni Rwot Lubangawa bilarowa ki i cing rwot me Aciria’? 12En Kejekia aceli aye pe ojwero wang jogine ma iwi godi kacel ki keno tyere woko ducu, kun ociko jo Juda ki jo matye i Jerucalem ni, ‘Myero wubed ka woro Lubanga inyim keno tyer acel keken, dok bene wuwang gitum mewu iye’? 13Tika wun wungeyo gin ma an kacel ki kwarina watyeko tiyone ikom lwak ducu me lobo mukene? Wuneno lwak lubanga pa rok me lobo magi gutwero laro lwak me lobo meno ki i cinga? 14Tye lubanga mo acel kong ki ikin lwak lubanga mukeneni mayam kwarina gujwero woko liwengi matwero laro lwake ki i cinga, ma omiyo wutamo ni Lubangawu bene bitwero larowu ki i cinga? 15Pimeno, kombedi pe wuwek Kejekia obwolwu nyo oum wangwu kit man, dok pe wuye wa loke, pien pe tye lubanga me rok mo nyo ker mo mayam olaro lwake ki i cinga nyo ki i cing kwarina. Ci Lubangawu bitwero larowu ki i cinga ningning?”

16Lukwena pa Cenakerib dok gumede ki loko lok mapol ikom Rwot Lubanga ki ikom latice Kejekia. 17Ci Cenakerib kikome ocoyo waraga ma nyutu cac madwong ikom Rwot Lubanga pa Icrael ki loko lok maracu ikome, kun waco ni, “Kit macalo lwak lubanga me rok mukene pe gutwero laro lwakgi ki i cingani, ci Lubanga pa Kejekia bene pe bitwero laro lwake ki i cinga.” 18Gucako dange ikom jo Jerucalem ma onongo gitye iwi cel ki dwon malongo i leb pa Lujudaya, kun giburugi ma gimiyogi lworo, ka wek gima taun madito pa jo ma i Jerucalem woko. 19Gubedo kaloko lok ikom Lubanga pa jo ma i Jerucalem kit macalo kong gubedo kaloko ikom lwak lubanga pa lurok me wi loboni, ma dano aye gutiyogi ki cinggi.

Rwot olaro Kejekia ki i cing Cenakerib

20Lacen rwot Kejekia kacel ki lanebi Icaya, wod pa Amoj, gulego pi lok man kun gicwalo kokogi i polo. 21Ci Rwot ocwalo lamalaika cut, ma otyeko twoni oteka lweny ki ludito wi mony ki ludito mukene woko ducu ki i gony pa rwot me Aciria. Kitmeno en odok i lobone ki lewic ma wange olwal woko. Ci ikare ma en obino i ot pa lubangane, lutinone ma en onywalogi gutonge ki pala lucwan guneke woko kenyo. 22Meno en aye kit ma Rwot olaro kwede Kejekia ki jo ma gibedo i Jerucalem ki i cing Cenakerib rwot me Aciria, ka dok ki i cing lumerokgi ducu. Rwot omiyogi yweyo me kuc i kabedo ducu ma orumugi. 23Jo mapol gucako kelo mot mapol bot Rwot i Jerucalem kun gikelo bene jami mabeco me wel bot Kejekia rwot me Juda; cake ikare meno ocito kwede anyim kimiye woro madit tutwal inyim rok me lobo ducu.

Two pa Kejekia

(2 Luk 20:1-3,12-19; Ica 38:1-3; 39:1-8)

24Ikare meno two omako Kejekia ma onongo cok to woko, ci olego Rwot; Rwot odoke iye kun omiye lanyut ni ebicang. 25Ento Kejekia pe orwo nyo odok piny ento oile malo ki awaka madit i cwinye kun pe opwoyo Rwot pi gin maber ma otiyo bote ki pi Juda. Pimeno akemo omako Rwot ikome ci opwode kacel ki jo Juda ki jo ma i Jerucalem. 26Ento ka Kejekia omwole kene ocako weko wakene ca ma i cwinye ni, en kacel ki jo ma gibedo i Jerucalem, ci omiyo akemo pa Rwot pe obino ikomgi ikare me loc pa Kejekia.

Lonyo pa Kejekia ki deyone

27Kejekia onongo tye ki lonyo kacel ki yweka madwong mada. En ogero ot kano lim pi keto ryal, jabu, lutino godi me wel, angwece, kwot mapol gu ki pi jami me welgu ducu. 28Ogoyo bene dero me kano cam, kama en keto iye bel, kongo bwino, ki moo, ogoyo bene dwol pi kwayo dyangi ducu, ki dwol romi bene. 29En ogero taun madito mapol pire kene, ocoko romi ki dyangi mapol ata; pien Lubanga onongo omiye jami madwong tutwal. 30En Kejekia aceli aye oloro wang pii matye tung malo kama pii ma a i Gikon mol kato kwede woko, en dok oyubu omiyo pii omol okemo tung kupotoceng inget gangkal pa Daudi. Kejekia obedo ki gum maber kacel ki lonyo ikom tice ducu ma en otiyo. 31Dong i lok ma dok ikom lukwena pa luker me Babilon, ma kicwalogi bote me penyo en pi lanyut ma onongo Lubanga otiyo i lobone, Lubanga oweke gire pire kene, pi temo en ki pi ngeyo lok ducu matye i cwinye.

Agiki me loc pa Kejekia

(2 Luk 20:20-21)

32Lok kom Kejekia mudonge ducu, ki tic mabeco ma en otiyo, nen, kityeko coyone i Lok Kom Ginanyuta ma Lanebi Icaya wod pa Amoj Oneno, ki i Buk pa Luker me Juda ki Icrael. 33Kejekia oto, en oywe kacel ki kwarine ci kiyike i lyel mamalo ma ikin lyel pa likwayo pa Daudi. Jo Juda ki jo ma gibedo i Jerucalem ducu gumiye deyo ikare me tone. Ci wode Manace aye oleyo katyene.