2 Tekwaro 31

Kejekia okelo alokaloka ikit me Dini

1Ka man otum, jo Icrael ducu ma dong onongo gitye gucito i taun madito ducu ma i Juda gucako ngido wir jogi woko i dul matinotino, ci gutongo yen ducu mayam kicomo pi woro jok ma dako ma kilwongo Acera, ki wang jogi ma iwi godi kacel ki keno tyer ducu ma gunongo i Juda, Benjamin, Epraim ki Manace, nio ka gubologi woko ducu. Lacen lwak jo Icrael ducu gucako dok i gangigi, kun dano acel acel odok i pacone kikome.

Pok pa Kejekia bot ajwaki ki Lulevi

2Kejekia oketo ajwaki ki Lulevi i dul ticgi, en oketogi i dul ki dul, kun keto ngat acel acel macalo tice tye, ma gin ajwaki ki Lulevi bedo i ticgi me tyero gitum awanga ki gityer lakwecwiny, kun gitiyo bene i dog gang mapatpat me Ot pa Rwot Lubanga pi miyo pwoc ki pak. 31Jami ma rwot okwanyo me amiya ki ikom jamine kikome obedo pi gitum awangagu: gitum awanga me odiko ki me otyeno, ki gitum awanga pi Cabit ducu, Karam me Por Dwe, ki pi nino madito ma kiciko, ma kilubu kit macalo kicoyo i Cik pa Rwot Lubanga. 42En bene ociko lwak ducu ma gibedo i Jerucalem ni gumi dul ma guciko me amiya bot ajwaki ki Lulevi, wek gumi kwogi kare ducu me tiyo tic bot Rwot Lubanga kun gilubu Cik mere maleng. 5Cutcut ma cik man dong oket oromo i lobo ducu, ci jo Icrael gucako kelo mic me jamigi mapol ata, bel me wi mwaka, kongo bwino, moo, moo kic ki kit jami mukene ducu ma guceko i potigi; kidok gukelo acel me apar me jami acel acel madwong ma okato. 6Lwak jo Icrael ki jo Juda ma gibedo i taun madito me Juda bene gukelo acel me apar me dyangi ki romi, ki jami mukene ma kityeko dyerogi bot Rwot Lubangagi, ci gudurugi lipim i odur mapol. 7Gucako pango jami magi i odur ki odur i dwe me adek, ci gutyeko pango ajoggi i dwe me abiro. 8Ka Kejekia ki lutela gubino guneno odur me jami ma kipango, ci gupwoyo Rwot kacel ki lwak jo Icrael. 9Kejekia openyo ajwaki ki Lulevi pi odur magi. 10Ci Ajaria ajwaka madit, ma en dano me ot pa Jadok, odoke iye ni, “Nia ma lwak gucako kelo jami me motgi i Ot pa Rwot Lubanga pe tye gin mo ma orem; wabedo kacamo cam ma oromo dok mudonge obedo pol ata; pien Rwot omiyo gum ki jone, kitmeno aye omiyo watye ki lwak cam man ducu ma odongi.”

11Kejekia dok ocikogi ni guyub kicika mogo kimedgi inget i Ot pa Rwot; ci cut kiyubu. 12Lwak gukelo gityer me motgi, acel me apar ki jami ma kidyero, ducu gukelo ki cwinygi ducu. Rwot Kejekia ki Ajaria gin aye gucimo Konania ma Lalevi me bedo ladit maloyo jami ducu, ki omine Cimei obedo ngat malube wek kigwok mot ki mic magi maber, 13kun bene kiketo Jekiel, Ajajia, Nakat, Acael, Jerimot, Jojabad, Eliel, Icmakia, Makat, ki Benaya me bedo lunen tic meno pi konyo kor Konania ki omine Cimei. Jo magi ducu rwot Kejekia ki Ajaria ma en ladit maloyo tic i Ot pa Lubanga en aye guyerogi. 14Kore ma wod pa Imla ma Lalevi kiketo en lagwok dog Ot pa Lubanga matye tung kunyango; en tice obedo me loyo gityer me mic pwoc bot Lubanga, ki me poko tyer meno. 15Eden, Miniamin, Yecwa, Cemaya, Amaria ki Cekania aye gubedo kakonyo en ki gen madit i gangi pa ajwaki, pi poko dul jami bot utmegigi, jo muteggi ki jo matino ducu maromrom kun lubu dul ticgi, 16dok pe olubu kit ma kicoyogi i buk me tekwaro. Kipoko bot co ma ditogi me mwakagi romo pyere adek dok kwede malo, jo ducu ma gidonyo i Ot pa Rwot kit macalo tic me nino acel acel tye kwede, ma gitiyo tic malubu dog ticgi ki dul ticgi. 17Kicoyo ajwaki kun lubu dog odi pa kwarigi; ento Lulevi cake ikom dano ma dite mwaka pyere aryo dok kwede malo olubu dog tic meggi ki dul ticgi. 18Kicoyo ajwaki kacel ki jo ducu matye botgi, mon gi, awobegi, ki anyiragi, ki lwakgi ducu; pien onongo gubedo lugen kun gigwoke ken gi pi bedo maleng. 19Dong pi likwayo pa Aron, ajwaki ma onongo gibedo i lobo ma orumu taun gi madito, kiyero nying co mogo ki i taun madito ducu ki acel acel bene me poko dul jami mogo bot laco acel acel ma ikin ajwaki, ki bot dano acel acel ma ikin Lulevi ma kityeko coyo en.

20Kejekia otiyo tice kitmeno oromo i lobo Juda ducu; en obedo katiyo gin maber, manen atir ki ma nyutu gene inyim Rwot Lubangane. 21Kit tic acel acel ma en obedo katiyone mamako tic i Ot pa Lubanga malubu cik ki gin ma kiciko ducu, otiyo ki cwinye ducu, dok obedo kayenyo Lubangane; omiyo tice owoto maber tutwal.