2 Tekwaro 30

Kwero Karama me Kato

11

Kejekia ocwalo kwena bot jo Icrael ducu ki jo Juda, ka dok ocoyo waraga ocwalo bot jo Epraim ki Manace, me tito botgi ni omyero gubin i Ot pa Rwot Lubanga matye i Jerucalem, kakwero Karama me Kato bot Lubanga pa Icrael. 2Onongo rwot ki lutelane kacel ki jo ducu ma gubedo i coke ma i Jerucalem gutyeko moko tam me kwero Karama me Kato i dwe me aryone; 3pien pe onongo gitwero kwero nino man i karene kikome pien ajwaki mapol onongo pud peya gulonye keken gi, ki lwak bene pud peya gucoke i Jerucalem. 4Yub meno onen atir dok mwonya tutwal iwang rwot kacel ki lwake ducu ma gubedo i cokeni. 5Ci kiciko pi yweko lok man wek orom i lobo Icrael ducu cake ki i Beer-ceba nio kwede i Dan, kun kitito ni lwak omyero gubin kakwero Karama me Kato bot Rwot Lubanga pa Icrael, i Jerucalem; pien lwak mapol onongo pe gubedo kakwero nino man kit macalo giciko kwede. 6Kitmeno lukwena gutero waraga pa rwot ki lutelane guwoto i lobo Icrael ki Juda ducu macalo rwot ociko, kun giwaco ni, “Wun lwak me Icrael, wudwog cen bot Rwot, Lubanga pa Abraim, pa Icaka ki pa Icrael, wek en odwog bot jo mudong ikinwu ma gubwot ki i cing luker me Aciria. 7Pe wubed macalo kwariwu ki utmegiwu, ma gutime ni gin dong gicayo lok pa Rwot Lubanga pa kwarigini, pimeno Lubanga omiyo lobogi odoko obur kit macalo wutye kanenone. 8Pe wubed ma ngutwu nwang kombedi macalo yam kwariwu gubedo kwede inyim Lubanga, ento wun wumii kwowu bot Rwot, wubin i Kabedo man Maleng ma en otyeko lonyo matwal, kun wutiyo bot Rwot Lubangawu, wek kinigane mageri oa woko ki ikomwu. 9Kace wuloke wudwogo cen bot Rwot, ci kica bimako jo ma guyako utmegiwu ki lutinowu, ci gibiye gibidwogo i lobo man. Myero wunge ni Rwot Lubangawa en ber dok lakica, ma pe biloko wange ki ikomwu, ka wuloke wudwogo cen bote.”

10Kitmeno lukwena gucako wot i taun madito ducu ma i lobo Epraim ki Manace, dok gumede ki wotgi nio wa i lobo Jebulun, ento dano gubedo kanyerogi kun ki cayogi dok kingalogi. 11Jo manok keken ma i lobo pa Acer, pa Manace ki Jebulun aye gumwole ken gi gubino i Jerucalem. 12Lubanga oketo cinge ikom jo Juda omiyo gubedo ki cwiny acel ikare man kun gitiyo gin ma rwot ki lutelane onongo guciko pire ma gulubu lok pa Rwot.

Kikwero Karama me Kato

13Ci lwak jo mapol gucoke kacel gubino i Jerucalem i coke man madit tutwal kakwero Karama me Mugati ma Tobi Pe Iye i dwe me aryo. 14Ka gucako ticgi ci gumuku keno tyer ducu mayam tye i Jerucalem, ka dok gumuku bene keno tyer ducu kama ceng kiwango iye odok eceta bot jok baalgu gutero gubolo woko i laora kulu Kidron. 15Ci guneko lutino romo me Karama me Kato inino dwe apar wiye angwen me dwe me aryo. Man omiyo lewic omako ajwaki ki Lulevi mogo ma onongo pud pe gulonye, oweko gucako lonye ken gi, ka dong gukelo gitum awanga i Ot pa Rwot Lubanga. 16Ci gucako mako dog ticgi kit me kare ducu kun gilubu Cik pa Moses ma en dano pa Lubanga. Ajwaki ticgi obedo me coro remo ma kigamo ki i cing Lulevi. 17Onongo tye jo mapol i coke man ma pe gulonye ken gi; pi lok meno omiyo Lulevi guneko latin romo me Karama me Kato pi ngat acel acel ma pe olonye, wek obed leng pi Rwot. 18Jo mapol ikin lwak onongo gua ki i lobo Epraim, Manace, Icakar ki Jebulun, ma pud peya gulonye ken gi, ento gubedo kacamo karama me Kato i yo ma pe opore ki kit ma kiciko con. Kadi bed kumeno, rwot Kejekia olego pirgi, kun waco ni, “In Rwot Lubanga maber tim kica ki dano acel acel 19ma oketo cwinye kabino boti Lubanga, Rwot Lubanga pa kwarine, kadi bed pe ogwoko cik me Kabedo Maleng ma mako lok kom lonye.” 20Rwot Lubanga owinyo dog Kejekia, ci otimogi kica ci pe otiyo gin mo marac ikom lwak. 21Ci jo Icrael ducu ma onongo gitye i Jerucalem ikare meno gucako kwero Karama me Mugati ma Tobi Pe iye ki yomcwiny madwong pi nino abiro; kun Lulevi ki ajwaki gubedo ka pako Rwot nino ki nino, ma giwero wer bot Rwot ki kerogi ducu. 22Kejekia oloko lok me pwoc bot Lulevi ducu ma gunyutu diro mabeco i ticgi kun gitelo woro i lega bot Rwot.

Karama me Aryo

Kitmeno lwak gubedo kacamo cam me kwero nino madito pi nino abiro, kun gityero gityer lakwe cwinygu, ma gimiyo pwoc bot Rwot Lubanga pa kwarigi ki woro.

23Lacen lwak ducu ma gucoke guye lawangacel me mede ki kwero nino madito pi nino abiro mukene; ci gumede kwede kitmeno ki yomcwiny madwong pi nino abiro mukene. 24Onongo Kejekia rwot me Juda omiyo twoni alip acel ki romi alip abiro bot lwak ma gucoke pi gityer. Ka dok lutelane bene gumiyo twoni alip acel ki romi alip apar bot lwak ma gucoke. Omiyo ajwaki mapol gulonye ken gi. 25Lwak jo Juda ducu ma i coke, kacel ki ajwaki ki Lulevi, medo ki jo ma i coke ma gua ki i lobo Icrael, kadi wa lubedo ma gua ki i lobo Icrael, kacel ki jo ma gin lubedo ma gibedo i Juda, ducu gubedo ki yomcwiny madit. 26Kitmeno lwak gubedo ki yomcwiny madit i Jerucalem, pien nia wa ikare pa Solomon ma wod pa Daudi rwot me Icrael onongo gin macalo man kulu peya onen i Jerucalem. 27Lacen ajwaki ki Lulevi gua malo gucung ci gumiyo gum ki lwak, ci Lubanga owinyo dwon gi, dok legagi bene oo bote i kabedone maleng matye i polo.