2 Tekwaro 29

Rwot Kejekia me Juda

(2 Luk 18:1-3)

1Kejekia ocamo ker ma mwaka me dite tye pyere aryo wiye abic, ci obedo kaloc i Jerucalem pi mwaka pyere aryo wiye abongwen. Nying mine Abija ma nya pa Jekaria. 2Kejekia obedo katiyo gin manen atir iwang Rwot Lubangane, kun lubu gin ducu mayam kwarone Daudi otiyo.

Kilonyo Ot pa Rwot Lubanga

3I mwaka mukwongo me loce, i dwe me acele, en aye en oyabo iye dogola me Ot pa Rwot, ka dok oyubugi. 4En okelo ajwaki ki Lulevi, omiyo gucoke kacel idyekal tung kunyango, 5ka ocako waco botgi ni, “Wuwiny loka, wun Lulevi! Kombedi wulonye kenwu, dok wulony Ot pa Rwot Lubanga pa kwariwu, obed maleng, wukwany cilo woko ki i Kabedo man Malengi. 6Kwariwa gucayo dog Rwot Lubangawa woko. Gubedo katimo gin manen marac iwang Rwot Lubangawa: dok gutyeko bwoto en woko, kun guloko wanggi kamukene ma cwinygi pe ikom Rwot Lubanga. 7Gin bene gucego dogola me kicika ma kidonyo kwede i Ot pa Rwot, ka bene guneko wa mac tara woko ki ote, pe bene guwango odok eceta nyo kadi ki tyero gitum awanga mo i Kabedo Maleng bot Lubanga pa Icrael. 8Pimeno omiyo akemo omako Rwot ikom Juda ki Jerucalem, ci otiyo ikin gi gin ma omiyo gudoko jo makelo lworo, ur ki jwat matek bot dano, macalo wun wutye ka nenone ki wangwuni. 9Nen ba, kwariwa ki nekogi woko liweng ki pala lucwan dok awobewa, anyirawa ki monwa ducu kiterogi i opii pi lok man. 10Amoko tama gira kombedi me keto gicike ikin wan ki Rwot, Lubanga pa Icrael, wek kinigane magwari otugi oa woko ki ikomwa. 11Wun Lulevi pe wubed ata, lutinona, Rwot otyeko yerowu me cung inyime, wek wutii bote kun wutelo wi lwake i woro en, ki me bedo jo ma mere ma oyero pi wango odoko eceta bote.”

12Cutcut Lulevi magi gua, gin aye Makat wod pa Amacai, ki Joel wod pa Ajaria, ma gin likwayo pa Kokat; ki likwayo pa Merari, ma gin aye Kic wod pa Abdi, ki Ajaria wod pa Jekalelel; ki likwayo pa Gercon, ma gin aye Joa wod pa Jimma, ki Eden wod pa Joa; 13ki ikom likwayo pa Elijapan ma gin aye Cimri ki Jeuel; ki likwayo pa Acap, ma gin aye Jekaria ki Matania; 14ki likwayo pa Keman, ma gin aye Jekuel ki Cimel; ki likwayo pa Jedutun, gin aye Cemaya ki Ujiel. 15Gucoko utmegigi kacel ci gulonye ken gi, ka dong gucako donyo i Ot kit macalo onongo rwot ociko malube ki lok pa Rwot, wek gulony Ot pa Rwot. 16Ajwaki gudonyo gucito wa i kicika ma i tyelo ma i Ot pa Rwot kalonyone, ci gukati woko ki jami maracu me kwer ma gunongo i Ot pa Rwot, gukelo guketo idyekal ma i Ot pa Rwot; ka dong Lulevi gutingo gutero guonyo woko wa i laora nota kulu Kidron. 17Gucako lonyo Ot inino dwe acel me dwe me acel, ka dok inino dwe aboro me dwe me acel gubino i kicika ma kidonyo kwede i Ot pa Rwot, ka lacen gubedo ka lonyo Ot pa Rwot pi nino aboro, ci gutyeko ticgi inino dwe apar wiye abicel me dwe meno.

Kidyero Ot pa Lubanga odoco

18Lacen gucito gudonyo bot Kejekia ci guwace ni, “Dong watyeko lonyo Ot pa Rwot Lubanga woko ducu, keno tyer me gitum awanga ki jami me tic ducu, ki meja ma kiketo iye mugati ma kiketo inyim Rwot, wa jami tic ducu. 19Dok jami tic ducu mayam rwot Akaj obolo woko ikare me loce ma onongo pe ogwoko Cik pa Rwot, wayubugi dok walonyogi bene; nen, gitye inyim keno tyer pa Rwot i kabedone kikome.”

20Lacen rwot Kejekia orune me cito kun ocoko ludito ma giloyo taun madito owoto kacel kwedgi, ci gucito wa i Ot pa Rwot. 21Ka dong gucako kelo twoni abiro, nyogi romi abiro, ki lutino romi abiro ki nyogi dyegi abiro pi gitum me bal pi ot pa luker ki jo Juda ki Jerucalem ducu, ki pi kabedo maleng. Ci ociko ajwaki ma gin likwayo pa Aron me tyerogi iwi keno tyer pa Rwot. 22Kitmeno gucako neko twoni, ci ajwaki gukwanyo remogi gucoro ikom keno tyer. Ka dok guneko nyogi romi ci remogi bene gucoro ikom keno tyer; ingeye guneko lutino romi ci remone gucoro ikom keno tye bene. 23Lacen kikelo nyogi dyegi bot rwot ki jo ma gucoke ducu, pi miyo gitum pi bal, ci guketo cinggi ikomgi; 24ci ajwaki guneko nyogi dyegi ka gutyero gitum pi bal ki remogi iwi keno tyer, me lakwany bal ki ikom jo Icrael ducu. Rwot Kejekia onongo ociko ni omyero gityer gitum awanga ki gitum pi bal pi jo Icrael ducu.

25Kejekia omiyo Lulevi gucung i Ot pa Rwot kun gumako atego agoyagu, ki nangagu, ki opukgu, kun lubu cik ma Daudi ceng omiyogi, ki en bene otiyo gin ma Rwot oloko ki Gad ma lanen piny ki lanebi Natan ma gutiyo macalo lunebine. 26Lulevi gucung gumako jami wer pa Daudi, kun ajwaki gumako tumgi. 27Cutcut Kejekia ociko ni myero gityer gitum awanga iwi keno tyer. Ikare ma kicako tyero gitum awanga, kicako wer me pako Rwot Lubanga cut, kun kikutu ki tumgu, ma kigoyo bene jami me wer bot Lubanga pa Icrael. 28Lwak ma gucoke ducu gumiyo woro bot Lubanga, luwer guwero wer, ki lukut tum gukutu tumgi; gumede kwede nio ka gutyero gitum awanga otum. 29Ka dong tyero gitum otum, ci rwot kacel ki jo ma onongo gitye kwede ducu guryebe piny gumiyo woro bot Lubanga. 30Rwot Kejekia ki lutelane gucako ciko Lulevi me wero wer me pak bot Rwot kun gilubu lok pa Daudi ki pa Acap ma lanen piny. Ci guwero wer pak ki yomcwiny, ka dok guryebe piny gumiyo woro bot Rwot.

31Kejekia dok owaco ni, “Dong wutyeko kwere kenwu bot Rwot; wunyik cok, wukel gitum ki gityer me pwoc i Ot pa Rwot Lubanga.” Ci jo ma gucoke ducu gukelo gitum mapol ki gityer me pwoc; ki jo ducu ma cwinygi opwoyo gukelo gitum awanga. 32Wel jami me gitum awanga ma lwak ma gucoke gukelo onongo tye twoni pyere abiro, nyogi romi miya acel, ki lutino romi miya aryo; magi ducu ki kelogi me gitum awanga bot Rwot Lubanga. 33Dong gityer ma kikwero onongo obedo twoni miya abicel ki romi alip adek. 34Ento ajwaki onongo ginok tutwal ma pe gitwero yango gitum awanga magi ducu, omiyo utmegigi ma Lulevi gucako konyogi nio ka ajwaki mukene ducu gulonye ken gi ka dong gutyeko tic ducu pien Lulevi onongo cwinygi leng makato ajwaki i lonye ken gi. 35Medo ikom wel gitum awanga madit tutwali, moo dwolo bene onongo tye me gityer lakwecwiny, ki dok gubedo kaliyo kongo bwino pi gitum awanga. Gidwoko kit me tic i Ot pa Rwot kitmeno. 36Omiyo Kejekia kacel ki lwak gubedo ki yomcwiny pi gin ma Lubanga otyeko tiyo pi lwak; pien loke obino atura.