1 Tekwaro 4

Likwayo pa Juda

1Lutino awobe pa Juda gin aye Perej; Kejeron, Karmi, Kur ki Cobal.

2Re-aya ma wod pa Cobal onywalo Jakat, Jakat onywalo Akumai ki Lakad. Meno aye dogola pa jo ma obedo i Jora.

3Kur onywalo awobe adek ma gin aye Etam, Penuel ki Ejer. Magi aye lutino awobe pa Etam: Jejreel, Icima ki Idibac. Nying lamingi obedo Kajelelponi. 4Penuel ocako gang Gedor, ki Ejer ocako gang Kuca. Magi aye lutino awobe pa Kur ma obedo latin kayo pa mine Eprata; en aye ocako Beterekem. 5Acikur ma ocako gang Tekoa, yam tye ki mon aryo, Kela ki Naara. 6Naara onywalo Akujam, Keper, Temeni ki Akactari. Meno aye lutino awobe pa Naara. 7Lutino awobe pa Kela gin aye Jeret, Ijar ki Etanan. 8Koj onywalo Anub ki Jobeba; jo me dogola pa Akarkel ma wod pa Karum ducu gubedo likwaye.

9Jabej onongo kiworo makato omegine ducu. Mine ocako nyinge Jabej kun waco ni, “Pien anywale ki arem madwong.” 10Jabej okok bot Lubanga pa jo Icrael kun waco ni, “Tim ber, i miya gum ci imii lobona obed malac. Bed kweda, i gwoka ikom gin marac ducu wek pe otima malit.” Ci Lubanga oye gin ma en olego.

11Kelub ma omin Cuka onywalo Mekir, Mekir onywalo Eciton. 12Eciton onywalo Bet-rapa, Pacea ki Tekina ma ocako taun madit ma kilwongo ni Nakac. Likwayo pa jo magi gubedo i Reka.

13Lutino awobe pa Kenaj gin aye Otiniel ki Ceraya. Lutino awobe pa Otiniel aye Katat ki Meonatai. 14Meonatai onywalo Opra. Ceraya onywalo Joab ma ocako nota pa lutic diro. Gin ma omiyo kilwongo kitmeno, pien gin ducu lutic diro.

15Lutino awobe pa Kaleb ma wod pa Jepune gin aye Iru, Ela ki Naam. Latin awobi pa Ela aye Kenaj.

16Lutino awobe pa Jekalelel gin aye Jip, Jipa, Tiria ki Acarel. 17Lutino awobe pa Ejra gin aye Jeter, Mered, Eper ki Jalon. Mered onyomo Bitia ma nya pa Parao. Mered onywalo nyare Miriam ki lutino awobe aryo, Camai ki Iciba ma ocako taun me Ectemoa. 18Mered ki dakone ma Lajuda onywalo Jered ma ocako taun me Gedor, Keber ma ocako taun me Coko. Jekutiel ocako taun me Janoa. 19Lutino awobe pa dako pa Kodia ma lamin Nakam gunywalo jo magi, Keila ma obedo kwaro pa jo Garmi ki Ectemoa ma obedo kwaro pa jo Maaka.

20Lutino awobe pa Cimon gin aye Amnon, Rina, Ben-kanan ki Tilon. Lutino awobe pa Ici gin aye Joket ki Ben-joket.

Likwayo pa Cela

21Likwayo pa Cela ma wod pa Juda aye Er ma ocako taun me Leka. Laada ma ocako taun me Mareca, ki dogola pa lucwe camanini ducu ma gibedo i Bet-acibea; 22ki Jokim ki jo Koceba ki Yoaci ki Carap mayam obedo laloc i Moab ka dok odwogo obedo i Beterekem. (Magi tekwaro macon tutwal.) 23Jonu aye lucwe agulu ki jo ma gubedo i Netaim ki i Gedera. Onongo gibedo kunu kacel ki rwot pi tiyo tice.

Likwayo pa Cimeon

24Lutino awobe pa Cimeon gin aye Nemuel, Jamin, Jarib, Jera ki Caul. 25Caul onywalo wode Calum, Calum onywalo Mibcam, Mibcam onywalo Micima. 26Lutino awobe pa Micima gin aye wode Kamuel, ma wode Jakur, ma wode Cimei. 27Cimei onongo tye ki awobene apar wiye abicel ki anyirane abicel; ento omegine pe gubedo ki lutino mapol, kadi wa ludogolagi ducu pe gunya mapol marom ki jo Juda. 281Gin yam gibedo i Beer-ceba, Molada, Kajar-cual, 29Bila, Ejem, Tolad, 30Becweri, Korma, Jiklag, 31Bet-markabot, Kajar-cucim, Bet-biri ki Caaraim. Magi aye obedo taun gi nio wa ikare me loc pa Daudi. 32Kabedo mukene ma gin gubedo iye gin aye Etam, Ain, Rimmon, Token ki Acan, taun gi ducu abic, 33kacel ki gangi matino ma orumu taun gi man ducu nio kwede wa i Baalat. Magi aye kabedogi, dok gin aye gubedo ki buk me tekwarogi.

34Mecobab, Jamlek, Joca ma wod pa Amajia, 35Joel, Yeko ma wod pa Jocibia, wod pa Ceraya, ma wod pa Aciel, 36Elionia, Jaakona, Jecokaya, Acaya, Adiel, Jecimiel, Benaya, 37Jija wod pa Cipi ma wod pa Alon, wod pa Jedaya, wod pa Cimri, ma wod pa Cemaya, 38jo magi ducu ma kicoyo nyinggi maloni gin aye lutel me dogolagi. Dog odi pa kwarigi onya madwong, 39ci gucako wot nio wa i yoo ma donyo i Gerar, kun girabo dog nota tung kunyango pi yenyo kakwayo romigi ki dyegigi. 40Gin gunongo kakwat maber kunu ma lum olot iye madwong, lobone bene lac ma obedo mot ki kuc. Jo ma gukwongo bedo kunu aye jo Kam. 41Jo meno ma kicoyo nyingini guo kunu ikare pa Kejekia rwot me Juda, ci guneko jo Kam woko, kacel ki jo Meun ma gunongo kunu, gutyekogi woko liweng nio wa i kareni. Kitmeno en aye guleyo kabedogi woko, pien onongo kakwayo romigi ki dyegigi tye kunu maber. 42Jo mogo ma ikin gi, jo Cimeon ma giromo miya abic, gucito wa i got Ceir kun gitye ki jo magi ma lutela wigi: Pelatia, Nearia, Repaya ki Ujiel ma gin lutino awobe pa Ici. 43Gin guneko jo Amalek mayam guringo ci gubwot ma dong onongo gibedo kununi liweng, ci gucako bedo kunu nio wa onyo.