Yao Bible Version Translation Project

Yoshua 16

Chilambo chiŵapegwilwe ngosyo sya Efulaimu ni Manase ŵa kungopochelo lyuŵa

Malo gaŵapegwilwe uŵelesi wa che Yusufu kwakutenda gudugudu gatandilile chiŵandi ni lusulo lwa Yolodani, chakungopochelo lyuŵa kwa iliŵa ya ku Yeliko, wapitile mu ukweti mpaka ku chilambo cha ikwesya ya ku Beteli. Kutyochela ku Beteli mpika wajendelechele mpaka ku Lusu ni wapite ku Ataloti kuŵatamaga Ŵaaliki. Nipele watulwiche chakumaswelelo lyuŵa ku chilambo cha Ŵayafileti mpaka ku Beti Holoni ja Kwichela ni ku Geseli kumalila ku bahali ja Meditelania. Uŵelesi u che Yusufu, yaani lukosyo lwa Manase ni lukosyo lwa Efulaimu ŵapegwilwe chilambo cho kuŵa chao.

Chilambo chiŵapegwilwe ŵandu ŵa lukosyo lwa Efulaimu

Ŵandu ŵa lukosyo lwa Ŵaefulaimu malinga ni mitundu jao ŵapegwilwe malo gawo, gati mpika wakwe watandilile chakungopochelo lyuŵa mwa musi wa ku Ataloti Adali mpaka ku Beti Holoni ja kulutando, ni kumalila ku bahali ja Meditelaniani. Chakumpoto mpika wapitile ku Mikimetati ni chakungopochelo lyuŵa ŵasyungwile ni kwaula ku Taanati Shilo, kuwapitile chakungopochelo lyuŵa mpaka ku Yanoa. Kutyochela ku Yanoa mpika wajawile mpaka ku Ataloti ni ku Naala, ni waiche ku Yeliko ni kumalila mu lusulo lwa Yolodani. Kutyochela ku Tapua mpika wajendelechele chakumaswelelo lyuŵa mpaka ku kasulo ka Kana ni kumalila ku bahali ja Meditelania. Chele chili chilambo chaŵapegwilwe ŵandu ŵa lukosyo lwa Efulaimu malinga mitundu jao, pamo ni misi ni misinda jiŵapegwilwe kutyochela ku chilambo cha ŵandu ŵa lukosyo lwa Manase. Ŵaefulaimu nganiŵatopola Ŵakanaani uŵatamaga ku Geseli. Ŵakanaani wo ŵajendelechele kutama pasikati ja Ŵaefulaimu mpaka lelojino, akuno achakanganichisyaga kwapanganyichisya masengo.

Yao Bible Version Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.