Yoshua

Chitabu cha

Yoshua

Chilongolelo

Chitabu cha Yoshua chikusala ndaŵi ja ngani sya ŵandu ŵa chilambo cha ku Isilaeli, kutandilila apala pachipelele chitabu cha chikumbuchisyo cha malajisyo. Chitabu cha Yoshua pachikutandilila ngani syakwe, Ŵaisilaeli aŵisile chigono cha kumaswelelo lyuŵa kwa lusulo lwa Yolodani. Chitabu chi chikusalilisya nkati Ŵaisilaeli iŵatite komboka lusulo lwa Yolodani, ni kuchigunguluchila chilambo cha ku Kanaani kwa kulongoswa ni che Yoshua. Ŵatesile yeleyo ligongo, Akunnungu ni iŵatite kwalamulila atende. Pa chindu chi, Akunnungu ŵaliji nkutindimisya chilanga chiŵalanjile, chakwapa iŵelesi i che Ibulahimu chilambo chati kuundanda ŵatamaga Ŵakanaani (Ndandililo 12:7).

Ngaikumanyika juŵalembile ni kuchiŵika kwa ukotopasyo chitabu cha Yoshua. Katema kane jwakulemba akuŵecheta nti juŵalembile jo ŵaliji jumo jwakwe payakopochelaga yele indu yo (mpela ila mu sula ja 5:1, 6). Kwaligongo li, ŵaumanyilisi achajinji wa indu ya mu Bibilia akuganisya kuti che Yoshua nsyene ni juŵalembile mwamujinji mu chitabu chi. Nombe ili yangasisika kuti mundu jwine, ni ngaŵa che Yoshua, ŵalembile malo gampepe ga chitabu chi, mpela ila ngani sya malilo ni masiko ga che Yoshua (Sula ja 24:29). Ŵaumanyilisi ŵane akukulupilila kuti chitabu chalembekwe pa yaka mia nane pakumala kukopochela indu yo. Indu yaili mu chitabu cha Yoshua ilembekwe mpela ikopochele pa yaka 1250 Akanaŵe kupagwa Kilisito, mpela yaka alobaini pakumala Mwenye che Lamisesi kuchitawala chilambo cha ku Misili. Aŵa che Lamisesi ŵa ali jwakutawala jwakuganichikwa kuti ŵatawele ku Misili katema Ŵaisilaeli paŵatyokaga ku Misili.

Yaili mwelemo

Liunjili likusala nkati Ŵaisilaeli iŵatite komboka lusulo lwa Yolodani ni kwinjila mu chilambo cha ku Kanaani mu sula ja 1 mpaka sula ja 5:12.

Liunjili likusala ngani sya Ŵaisilaeli iŵatite kuchigunguluchila chilambo cha ku Kanaani mu sula ja 5:13 mpaka sula ja 12.

Liunjili likusalilichisya yachitite chilambo cha ku Kanaani kugaŵikwa kwa ŵandu ŵa ngosyo sya ku Isilaeli mu sula ja 13 mpaka sula ja 21.

Liunjili likusala ŵandu ŵa ngosyo simpepe iŵatite kuujila ku ngopochelo lyuŵa kwa lusulo lwa Yolodani, ni maloŵe gaambesi ga che Yoshua kwa ŵandu ŵa ku Isilaeli, chiwa chakwe ni masiko gakwe pamo ni iŵatite Ŵaisilaeli iŵaujile kuŵika lilangano ni Akunnungu, mu sula ja 22 mpaka sula ja 24.