Yunus 3

Tobaana Miana Niniwe

3:1-10

1To kamondona rua mpearo KAWASANA OPU afirimani i Nabii Yunus, pogauna, 2"Lingkamo pekadhei i Niniwe i kota momaoge sumai, tee upakawaakea to manga raʼeatina o kasamea idhawuakaku to ingkoo sii."

3Yunus uka alausakamo alingka i Kota Niniwe mboomo mopadhana ifirimaniakana KAWASANA OPU to incia. Niniwe sii satotuuna saangu kota momaoge mpuu, tee o kaogena kota incia sii mboomo kangengena mia modhalana aena talu eo. 41 Wakutuuna Yunus apesuaiki kota incia sumai sapadhana adhala ae saeoa, incia apepuumo apakawaaka kasameana Aulataʼala, pogauna, "Pata pulu eopo Kota Niniwe sii bheatopabinasamo!" 5Raʼeatina Niniwe sii aparacaeamo mpuu tee kasameana Aulataʼala ipakawaakana Yunus, sabutuna minaaka i kaogesa sakawana i raʼeati biasa apoasamo. Manga incia uka apakemo kae kadhu to tandana asosoakamo bhari-bharia dosana.

6Wakutuuna lele incia sumai arangoa rajana Niniwe, raja alausakamo akakaro tee asapo minaaka i kauncuramakana, kasiimpo jubana arambasakea tee o badana abulilingiakea kae kadhu, kasiimpo auncura i bhawona ngawuna rapu. 7Sapadhana sumai o rajana Niniwe tee manga kaogesana apalimbamo saangu parinta:

"Malape maanusia atawa o binata kadhambaaka, siitumo gulumana sapi atawa o dumba inda amembali akande opeapo uka, inda amembali akande atawa asumpu uwe. 8Maka bhari-bharia maanusia atawa o kadhambaaka tabeana apake kae kadhu, tee bhari-bharia mia tabeana adoʼa tee mpuu-mpuuna incana i Aulataʼala, tee samia-samia tabeana atoba minaaka i pewauna momadhaki tee minaaka i dosa mopadhana ipewauna. 9Tapalaka o Aulataʼala bheabhaliia o haejatina tee indamo aʼamara, sabutuna ingkita inda asidha tabinasa."

10Pewauna manga miana Niniwe sumai akamatea Aulataʼala, ande manga incia atobamo minaaka i manga giu momadhaki sabutuna Aulataʼala apabatalamo haejatina mboomo mopadhana imambotuakana bhaa-bhaana, tee manga incia indamo asidha ahukumua Aulataʼala.