WolioNT
Yunus 2
Doʼana Nabii Yunus
2:1-10
Minaaka i nuncana kompona ikane sumai, Yunus adoʼamo i KAWASANA OPU Aulataʼalana. Tee apogau,
"E KAWASANA OPU, i nuncana kanarakaaku, iaku kugora kuemani tulungi tee Ingkoo
tee Ingkoo ulawaniaku.
Iaku kupekee minaaka i nuncana duniana mia mate,
tee urangoa o suaraku. 1
Ingkoo padhamo utudhaakaaku i tampa momandala mpuu
i tanga-tangana andala oge,
iwe sumai abulilingiaku solo momakaa mpuu,
lolebhatamu tee o ewomu apekalameaku.
Kasiimpo iaku kupogau, 'Iaku padhamo kutobhanaka minaaka i aroamu.
Maka iaku bhekupotonto uka i Bhanuamu momangkilo.'
Uwena tawo abulilingiaku, tee bheaala inyawaku,
andala oge abulilingiaku,
tee o koncena tawo aburu bhaaku.
Iaku kutondu i tambena kulesena manga gunu,
manga kapasona bhambana alamu aopiaku saʼumurua.
Maka o inyawaku upalimbaia minaaka i bhalona koburu,2
e KAWASANA OPU, e Aulataʼalaku."
"Wakutuuna kufikiria ande o ajalaku bheakawamo,
iaku kutoudhanimo tee Ingkoo, e KAWASANA OPU,
tee iaku kuemani doʼa,
sakawana i Baitullamu momangkilo."
"Manga mia mosombana barahala inda mokoguna,
amendeu kaasi molagina Aulataʼala momembalina ipotibhaakana manga incia.
Maka iaku bhoasaka kusukuru
tee bhekupasombaakako kurubani.
Iaku bhekupomea opea mopadhana momembalina tolauna oniku.
Kasalaamati satotuuna minaaka i KAWASANA OPU!"
Kasiimpo KAWASANA OPU afirimanimo tee ikane sumai, tee o ikane sumai atoluaakamo Yunus i ati.
Source notes (2)
- Cross-reference Zab. 42:8.
- Footnote bhalona koburu: Maʼanana duniana mia mate, apokana tee aeati 2:2.
WolioNT. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.