Zaburu 98

Wakutuuna Pasalaamatia Amakasumo

98:1-9

1Zaburu.

Laguakamo lagu bhaau to KAWASANA OPU

roonamo Incia padhamo apewau manga giu inda momentela;

kasalaamati padhamo akarajaaia lima kaanana,

siitumo o lima kaanana momangkilo.

2KAWASANA OPU apakoleleaka kasalaamatina;

Incia apaumbaaka kaʼadilina i aroana matana manga lipu.

3Incia audhania o kaasina molagina tee akeniaka pojanjiana inda momabhotu

to siwuluna Israel.

Saangua dunia padhamo akamatea

o kasalaamati minaaka i Aulataʼalata.

4Sambo-sambomo to KAWASANA OPU, e saangua dunia!

Kaunde-undemo tee usambo-sambomo, tee ulaguakamea manga lagu kapujia!

5Laguakamea o lagu kapujia to KAWASANA OPU,

poose umagasiaakea tee kecapi tee suara momandii,

6tee torompe tee sangkakala tee suara momandii.

Sambo-sambomo i aroana Raja, siitumo o KAWASANA OPU!

7Taroakamo o tawo akanduu-nduu tee bhari-bharia modhaangiana i nuncana,

tee uka o dunia tee bhari-bharia mombooresia.

8Taroakamo manga umala asambo-sambo,

tee manga gunu alagu apobhawa-bhawa roonamo akaunde-unde

9i aroana KAWASANA OPU

roonamo Incia aumba to ahaakimu dunia.

Incia bheahaakimu alamu tee kabanara,

tee ahaakimu manga lipu tee kaʼadili.