Zaburu 97

KAWASANA OPU o Raja Momaoge

97:1-12

1KAWASANA OPU o Raja! Taroakamo alamu akaunde-unde;

taroakamo o pulo-pulo mobhari sumai akaunde-unde!

2Taʼina ngalu tee kalalanda abulilingi KAWASANA OPU,

kabanara tee kaʼadili amembali polandakana kauncuramakana.

3Waa arore i aroana,

apekangau manga bhali i saripina.

4Manga bhibhitona asuluwi alamu,

tee o dunia akamatamea tee arengku.

5Manga gunu arere mboomo taru i aroana KAWASANA OPU,

i aroana Aulataʼalana saangua alamu.

6Laiana apakoleleaka kabanarana,

tee bhari-bharia lipu akamata kamuliangina.

7Bhari-bharia mia mosombana barahala bheatopekaea,

siitumo manga incia mosomboakana karona roonamo barahalana;

bhari-bharia dewa bheasuju tee asomba i aroana Kawasana Opu.

8Raʼeatina Sion akaunde-unde tee manga kampo modhaangiana i Tana Yuda uka amasanaa,

wakutuuna arango kambotumu, e KAWASANA OPU.

9Ingkoomo, e KAWASANA OPU, Momalangana i bhawona saangua alamu;

Ingkoo utomuliangi mpuu alabhi minaaka i bhari-bharia dewa.

10E ingkomiu momaasiakana KAWASANA OPU, bancimea o kadhaki!

Sababuna KAWASANA OPU ajagani dhadhina uumatina mosaalihi,

tee arambasakea manga incia minaaka i limana mia madhaki.

11Kainawa asuluwi mia mobanara,

tee o kasanaa to mia momakatena incana.

12E manga mia mobanara, kaunde-undemo roonamo KAWASANA OPU,

tee usukurumo to sarona momangkilo.