Zaburu 91

I nuncana Kajaganina Kawasana Opu

91:1-16

1Mia modhadhina i nuncana kajaganina Aulataʼala Momalanga,

bheamboore i nuncana peulusana Kawasana Opu Mokokuasa,

2bheapogau i KAWASANA OPU,

"Ingkoomo o tampana peulusaku tee o bentena potaangiaku; Aulataʼalaku, iparacaeaku."

3Incia bhemorambasakako minaaka i katapu,

tee minaaka i panyaki imateaka.

4Incia bheasalibumbungiakako tee panina,

tee ingkoo bheuʼamani i nuncana peulusana.

Incia atoparacaea tee bheamembali katangkesi tee o bentemu.

5Ingkoo inda bheumaeka tee balaa moumbana i wakutuu malo,

atawa o kahumbuni inda inamu-namu moumbana i wakutuu eo.

6Ingkoo inda bheumaeaka tee panyaki imateaka moumbana i nuncana kalalanda,

atawa tee kalelei ibinasaaka moumbana i wakutuu pontanga eo.

7Moomini sarewu mia amate i saripimu,

tee sapulu rewu mia amate i weta i kaanamu,

maka ingkoo inda bheucilaka.

8Ingkoo tangkanamo bheutontoa tee matamu karomu,

tee ukamatea tuaapa Aulataʼala bheahukumu mia madhaki.

9Roonamo KAWASANA OPU upamembalia tampana peulusamu,

tee Aulataʼala Momalanga upamembalia mbooresamu,

10siitumo ingkoo inda bheucilaka,

tee balaa bheamaridho minaaka i bhanuamu. 111

Roonamo Incia bheatumpu manga malaaʼekatina to apobhawa tee ingkoo,

mamudhaakana ajaganiko iapaipo uka o lingkaamu.

12Manga malaaʼekati sumai bheaangkako tee rua mbalia limana

mamudhaakana o aemu inda atosunu i bhatu. 132

Singa tee ulo bheulempagia,

singa mangura tee ulo mokobisa bheulanda-landakia.

14Firimanina Kawasana Opu, "Roonamo manga mia momaasiakaaku, bhekupasalaamatia;

tee Iaku bhekujagani manga mia momatauna saroku.

15Wakutuuna manga incia agoraakaaku, siitumo Iaku bhekulawania;

Iaku bhekupobhawa tee manga incia i nuncana kaseke,

tee bhekupasalaamatia tee kumuliangia.

16Tee umuru marambe bhekupatumpua incana,

tee bhekususuakea ande Iaku bhemopasalaamatia."