Kitabi Momangkilona Wolio
Zaburu 8
Mahaluku Mohina mboomo Mahaluku Momulia
8:1-10
To kapalana molaguna. Mboomo lagu Gitit.1 Zaburuna Daud.
E KAWASANA OPU,2 e Aulataʼalamami,
saromu amulia i saangua alamu!
Kaogesana kuasamu alabhi kalangana minaaka i laiana. 3
Minaaka i ngangana manga anaana momaidhiidhi tee anaana modudu uka apuji kamuliangimu.
Roonamo Ingkoo padhamo upakaro bente potaangia momatangka
sabutuna o ngangana bhari-bharia musu tee bhalimu atosoncongi.
Ande kutonto tee kufikiri laiana ipadhaangiamu,
bula tee kalipopo idhikamu, 4
incema buaka o maanusia sumai, mbakana uudhania,
incema buaka o incia, mbakana udhambaakea?
Maka upewau maanusia saidhepo apokana tee Aulataʼala,5
upakanaakea tee mahakota kamuliangi tee kahoromati. 6
Udhawua kuasa to saangua alamu,
bhari-bharia ipadhaangiamu upatungkua i incia:
Dumba, sapi tee bhari-bharia binata kadhambaaka,
tee manga binata i rumpu;
Manu-manu tee manga ikane
bhari-bharia mahaluku i nuncana tawo.
E KAWASANA OPU, Aulataʼalamami,
saromu amulia i saangua alamu!
Source notes (6)
- Footnote Gitit: Zaburu incia sii aose suarana lagu tee gambusu minaaka i Gat, siitumo sala saangu kota miana Filistin. Gat sumai mopadhana imbooresina Nabii Daud wakutuuna apalaiaka karona minaaka i Raja Saul.
- Footnote KAWASANA OPU: Ande atoburi tee horofu maoge, saro incia sii o sarona karona Aulataʼala i oni Ibrani atosarongi YAHWEH, sainamo ande atoburi tee horofu maidhiidhi, maʼanana o Kawasana Opu (Ibrani: Adonai).
- Cross-reference Mat. 21:16.
- Cross-reference Ayb. 7:17; Zab. 144:3; Ibr. 2:6-8.
- Footnote Aulataʼala: Amembali uka maʼanana manga malaaʼekati atawa o mahalukuna sorogaa.
- Cross-reference 1Kor. 15:27; Ef. 1:22; Ibr. 2:8.
Kitabi Momangkilona Wolio. Copyright © 2024 Wycliffe Bible Translators, Inc. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.