Zaburu 7

Doʼa Emaniana Kaʼadili

7:1-18

1Lagu kaporona incana Daud, ilaguakana to KAWASANA OPU roonamo Kus, miana Binyamin sumai.

2E KAWASANA OPU, e Aulataʼalaku, Ingkoomo peulusaku,

pasalaamatiaku tee rambasakaaku minaaka i bhari-bharia mia mopajereaku

3mamudhaakana manga incia inda apapakiaku mboo singa

asoroaku tee abheka-bhekaaku wakutuuna inda dhaangia motulungiaku.

4E KAWASANA OPU, e Aulataʼalaku, ande kupewau giu incia sii:

Ande kupewau inda aʼadili i mia mosagaanana,

5ande kuhianati sabhangkaku,

atawa kurampasi musuku inda tee sababuna,

6taroakamo musuku apajereaku tee arakoaku,

kasiimpo alandalandakiaku i tana,

tee adhika kamuliangiku i nuncana ngawu. Sela

7E KAWASANA OPU bhangumo i nuncana pamurumu,

kakaromo to uewangiaka manga musuku!

Bhangumo to iaku, roonamo Ingkoomo moʼadilina maanusia.

8Rombusakamea bhari-bharia lipu i saripimu,

tee ukapalaimea manga incia i bhawona kauncuramakamu momalanga.

9KAWASANA OPU moʼadilina parakarana manga lipu.

E KAWASANA OPU, dhawuaku kaʼadili,

roonamo ipewauku abanara tee amakate totona incaku. 101

Pauntoa o mia mokodosa apewau momadhakina,

tee upekatangkea incana mia mosaalihi,

sababuna Ingkoo Aulataʼala mobanara,

momatauna incana tee baatinina maanusia.

11Katangkesiku satotuuna o Aulataʼala,

mopasalaamatina mia momakatena totona incana.

12Aulataʼala satotuuna haakimu mobanara,

Incia apamuru saesaeo tee mia mopewauna kadhaki.

13Ande dhaangia o mia inda motoba, sumaimo Kawasana Opu bheawinto hancuna,

tee apasiapu panana.

14Incia apasiapuaka karona tee ewanga motomateaka,

tee akarajaa matana pana mokowaa.

15Satotuuna o mia incia sumai akokadhumaaka kadhaki,

incia abhawa kasega i nuncana karona tee apalaahiri gau-gau.

16Incia aseli kabhalongko to mia mosagaanana,

maka o karona mokotibuna.

17Jadi incia ahukumua kasegana tee haejatina karona,

tee o kasega ipewauna bheapanarakaa karona.

18Iaku bhekusukuru i KAWASANA OPU roonamo Incia aʼadili,

tee kulaguaka kapujia to KAWASANA OPU Momalanga.