Zaburu 75

Kawasana Opu, Haakimu Moʼadili

75:1-11

1To kapalana molaguna.

Zaburuna Asaf to lagu: Bholi Upahancurua.

2Ingkami tasukuru i Ingkoo, e Aulataʼala;

ingkami tasukuru i Ingkoo roonamo umakasu.

Manga mia apetulatulaaka bhari-bharia pewaumu inda momentela.

3"I wakutuu mopadhana itantuakaku,

Iaku bhekuhaakimu tee kaʼadili.

4I wakutuuna alamu tee bhari-bharia antona atolendu,

Iakumo bhemopekatangkana manga ariina. Sela

5To manga mia mosombo Iaku kupogau, 'Bholi usombo,'

kasiimpo to mia madhaki, 'Bholi upepujiaka kakaamu;

6bholi upepujiaka kakaamu uewangi sorogaa,

atawa upogau tee upataja bhorokomu.' "

7Roonamo Incia Mokanana minaaka i timbu tee minaaka i bhara,

Inciamo Mokanana minaaka i tana matuu sakawana i tana mokogunu.1

8Aulataʼala o haakimu;

Incia apaporitambe mia mosala tee apekalanga mia mobanara.

9Roonamo pamuruna KAWASANA OPU mboomo tonde i limana,

akoantoaka uwena angguru mokobura, mobukeakana tee kajalona rampa.

Incia bhealali antona,

mamudhaakana o kulimpasana bheasumpua tee apepadhaia

bhari-bharia mia madhaki i dunia.

10Maka iaku saʼumurua bhekupakoleleaka giu incia sii,

Iaku bhekulaguaka lagu kapujia to Aulataʼala isombana Yakub.

11Iaku bhekupekakatu bhari-bharia kakaana mia madhaki,

maka o kakaana mia mobanara bhekurangania.