Zaburu 68

Lagu Kamangantalona Kawasana Opu

68:1-36

1To kapalana molaguna. Zaburuna Daud. Laguna.

2Taroakamo Aulataʼala akakaro tee apewau musuna apogaa-gaa;

taroakamo manga mia mobancia amatalo tee apalai minaaka i aroana.

3Mboomo ombu aila wakutuuna atowiia ngalu, taroakamo Ingkoo uwulu manga incia.

Mboomo taru arere i aroana waa,

taroakamo mia madhaki abinasa i aroana Aulataʼala.

4Maka taroakamo o mia mobanara akaunde-unde,

taroakamo manga incia amasanaa i aroana Aulataʼala,

tee taroakamo manga incia asambo-sambo tee akaunde-unde.

5Lagumo to Aulataʼala, laguakamo lagu kapujia to sarona!

Pasiapuakea dhala oge to Incia mosawina i taʼina ngalu!1

Sarona o KAWASANA OPU,

kaunde-undemo i aroana!

6Amana manga ana maelu tee moewaakana manga iaiaro

siitumo o Aulataʼala i tampana mbooresana momangkilo.

7Mia momboorena samia-miana Aulataʼala aposaangua i nuncana saangu bhanua,

Incia apabebasi mia mototorongku sabutuna manga incia amasanaamo dhadhina,

maka manga mia mobhalia amboore i tana matuu. 82

E Aulataʼala, wakutuuna ukapalai uumatimu wakutuuna apotimbe,

tee wakutuuna ulaloi tana matuu, Sela

9alamu akolendu, tee o laiana apasapo wao,

roonamo umbaana Aulataʼala isombana miana Israel,

siitumo isarongiakana Aulataʼala i Sinai.3

10E Aulataʼala, amaranca mpuu Ingkoo upasapo wao,

tee upasuburu tana tinaurakamu4 i wakutuuna amatuu;

11sabutuna o uumatimu ambooresia.

E Aulataʼala, tee kalapemu udhawuakea

bhari-bharia ifaraluuna mia misikini.

12Kawasana Opu apakawaaka firimanina,

tee rombongana mia bhari5 mobhawana lele malape sumai.

13"Manga raja tee tantarana apalai, umbe, apalaiaka karona!"

Manga bhawine momboorena i nuncana bhanua apodhawu-dhawuaka bara irampasi minaaka i tampana potimbea.

14Moomini ingkomiu apotidhole i tanga-tangana kandana dumba,

bara irampasimiu mboomo panina jarajara ilapisiaka pera,

buluna minaaka i bulawa mokokila!

15Wakutuuna o Kawasana Opu Mokokuasana apapogaa-gaa manga raja iwe sumai,

asapomo salju i Gunu Zalmon.

16Gunu Basan o gunu momakaa.

Gunu mobharina tubuna, siitumo o Gunu Basan.

17E Gunu Basan mobharina tubuna, pokia ingkoo ugigibulu

tee Gunu Sion6 ipilina Aulataʼala to amembali tampana kauncuramakana?

Satotuuna o KAWASANA OPU bheamboore iwe sumai saʼumurua!

18Kawasana Opu aumbamo minaaka i Gunu Sinai

tee apesua i tampana momangkilo

tee puluna rewu kareta potimbeana,

inda atolentu o kabharina. 197

Ingkoo ukompa i tampa momalanga

tee ubhawa manga mia mototaangi i talikumu.8

Ingkoo utarima hadia mobhari minaaka i maanusia,

moomini minaaka i manga mia mobhaliko.

KAWASANA OPU, Aulataʼala,

bheamboore iwe sumai.

20Atopujimo Kawasana Opu,

mosodhana bhawata saesaeo.

Incia o Aulataʼala mopasalaamatina ingkita. Sela

21Aulataʼalata satotuuna o Aulataʼala mopasalaamatina ingkita,

tee KAWASANA OPU motulungina ingkita mamudhaakana inda tamate.

22Maka o Aulataʼala bheapurokoti bhaana musuna,

tee kauwana bhaana mokobulua minaaka i manga mia

mosadhaadhaana modhadhina i nuncana kasalaha.

23Kawasana Opu afirimani, "Iaku bhekubhawea pendua o musumu minaaka i Basan;

bhekubhawea pendua manga incia minaaka i tawo momandala

24mamudhaakana ingkomiu amembali ubhanui aemu tee raana manga incia,

tee manga mantoamu amembali apotibhaaka dhawuna tee atumpu incana adhelapia."

25Manga mia padhamo akamatako wakutuuna ambeliakako mboomo raja, e Aulataʼala;

ambeliakako o Kawasana Opuku, o Rajaku to ulingka uporope i mbooresamu momangkilo.

26Manga molaguna adhaangia i aroa,

momagasiaakana kecapi i taliku,

i tanga-tanga manga kabuabua mobhebhena ganda-ganda. Mboo siimo laguna manga incia,

27"Pujimea o Aulataʼala i tanga-tangana uumatina momaoge,

Pujimea o KAWASANA OPU, e bhari-bharikomiu siwuluna Israel!"

28Bhaa-bhaana o siwuluna Binyamin, momembalina kamia momaidhiidhi mpuu mokapalaina manga incia,

kasiimpo aosea manga lakina Yuda i saangu rombongana,

kasiimpo manga lakina Zebulon tee lakina Naftali.

29E Aulataʼala, palimbamea o kakaamu.

E Aulataʼala, susuakamea o kakaamu,

mboomo mopadhana ipewaumu to ingkami.

30Rampaakanamo Bhanuamu i Yerusalem,

manga raja abhawa pasombaa to Ingkoo.

31Gorampangia o Mesir, lipu mboomo binata maila i tanga-tangana gelaga,

gorampangia o Mesir, lipu mboomo gulumana sapi umane tee manga anana, siitumo manga lipu mokokuasa.

Pahancurua manga incia momasoʼoakana pera,

papogaa-gaaia manga lipu momaasiakana potimbea.

32Manga potolowea bheaumba minaaka i Mesir,

tee miana Etiopia lausaka bheataanaka limana tee adhawu pasombaana i Aulataʼala.

33Lagumo to Aulataʼala, e bhari-bharia lipu i dunia sii!

Laguakamo lagu kapujia to Kawasana Opu, Sela

34to Incia mosawina i kareta modhalana i bhawona laiana, siitumo laiana modhaangiana pepuu minaaka i zamani mangenge.

Rangoa, Incia apaperangoaka suarana,

suarana amakaa tee akoguntu.

35Akuimea o kuasana Aulataʼala!

Kaogena dhaangia i bhawona lipu Israel,

kuasana akawea i laiana.

36E Aulataʼala, Ingkoo inda umentela mpuu

wakutuuna ulimba minaaka i tampana mbooresamu momangkilo!

Aulataʼala isombana miana Israel adhawuaka kuasana tee kakaana to uumatina.

Atopujimo Aulataʼala!