Zaburu 67

Kasukuru to Bhari-bharia Barakati Idhawuakana Aulataʼala

67:1-8

1To kapalana molaguna.

Tee kagasiana kecapi. Laguna Zaburu.

2Maasangia o Aulataʼala manga maasiaka tee manga barakati,

maasangia Incia manga kamata tee kalapena incana, Sela

3tee mboo sumai, maanusia i bhawona alamu sii amataua opea ipeelumu to manga incia,

tee bhari-bharia lipu amataua ande Ingkoo mokokuasana to mopasalaamatina manga incia.

4E Aulataʼala, maasangia manga lipu apujiko,

maasangia bhari-bharia lipu apujiko.

5Maasangia manga lipu akaunde-unde tee asambo-sambo

roonamo Ingkoo tee kaʼadili uhaakimu manga lipu,

tee utonda bhari-bharia lipu i bhawona alamu. Sela

6Maasangia manga lipu apujiko, e Aulataʼala,

maasangia bhari-bharia lipu apujiko.

7Alamu padhamo adhawuaka hasilina;

Aulataʼala, Aulataʼalata, padhamo abarakati ingkita.

8Maasangia Aulataʼala manga barakati torosu;

maasangia bhari-bharia lipu i bhawona dunia amaekaia.