Zaburu 59

Doʼa Emaniana Mamudhaakana Tasalaamati minaaka i Manga Musu

59:1-18

11

To kapalana molaguna.

Mboomo lagu: Bholi upahancuru. Zaburuna Daud, siitumo wakutuuna Raja Saul atumpu mia to alibu bhanuana Daud tee ahaejati to apekamatea.

2E Aulataʼalaku, rambasakaaku minaaka i manga musuku,

jaganiaku minaaka i manga mia moewangiaku.

3Rambasakaaku minaaka i manga mia mopewauna kadhaki,

tee pasalaamatiaku minaaka i pande pekamatena mia.

4Kamatea, manga incia aopo tee aantagiaku kulalo mamudhaakana amembali apekamateaku,

manga mia makaa aporomusaka to aewangiaku,

garaaka iaku inda kupewau kasalaha,

tee uka inda kupewau dosa, e KAWASANA OPU.

5Moomini inda dhaangia o kasalahaku,

manga incia abuntuli tee amakanu aewangiaku.

Bhangumo, upokawaakaaku tee ukamata kadhaangiaku!

6E KAWASANA OPU, Ingkoo Aulataʼalana saangua alamu isombana miana Israel.

Maasangia ubhangumo to uhukumu bhari-bharia lipu!

Bholi umaasi i bhari-bharia mia mopewauna kadhaki tee pande hianati. Sela

7I wakutuuna konowia manga incia ambulimo,

tee akaolu-olu mboomo mantoa mobulilingina kota.

8Kamatea, ngangana manga incia apekasindiri!

Dhelana manga incia mboomo ewanga momatadha,

roonamo manga pande hianati afikiri, "Inda dhaangia manga rangona!"

9Maka Ingkoo, upotawaiki manga incia, e KAWASANA OPU,

Ingkoo uele-ele bhari-bharia lipu.

10E kakaaku, iaku bhekuantagiko;

roonamo Ingkoo, e Aulataʼala, satotuuna o kota benteku.

11Aulataʼala i nuncana kaasi molagina bhemopokawaakaaku,

tee bheataroakaaku kukamata manga musuku atotalo.

12Bholi upekamate manga incia mamudhaakana lipuku inda amalingu;

maka tee kuasamu upapogaa-gaaia

tee pakotibumea manga incia, e Aulataʼala, peulusamami!

13Roonamo dosa minaaka i muncuna tee pogau ibhoasakana dhelana,

taroakamo manga incia atorako i nuncana kasombona.

Roonamo katunda tee kagau-gau ibhoasakana manga incia,

14pabinasamea i nuncana amaramu;

pabinasamea sampe amapupu.

Tee mboo sumai, mia bheamataua ande Kawasana Opu aparintangi lipuna Israel,

tee uka bhari-bharia lipu i dunia. Sela

15I wakutuuna konowia manga incia ambulimo,

tee akaolu-olu mboomo mantoa atiingi kota.

16Manga incia apekalingka-lingka apeelo kinandena,

tee akaolu-olu ande inda amambosu.

17Maka iaku bhekulaguaka kuasamu,

i saeona iaku bhekusambo-sambo roonamo kaasimu molagina,

sababuna Ingkoo mboomo bente mojaganiaku

tee tampana peulusaku i wakutuuna kanarakaaku.

18E kakaaku, i Ingkoomo iaku bhekulaguaka manga lagu kapujia,

roonamo Ingkoomo, e Aulataʼala, benteku mojaganiaku,

Kawasana Opu momaasiakaaku.