Zaburu 58

Doʼa Emaniana Kabalasina to Mia Madhaki

58:1-12

1To kapalana molaguna.

Mboomo lagu: Bholi upahancuru. Zaburuna Daud.

2E manga mia mokokuasa,1 atotuu buaka udhawu kambotu mobanara?

Buaka ujujuru i wakutuuna uʼadili maanusia?

3Inda, uhaejatiaka momadhakina i nuncana ngangarandamiu,

tee upewau kasega tee limamiu i bhawona alamu.

4Mia madhaki asaladhala pepuu minaaka alaahiri,

tee agau-gau minaaka i nuncana kadhuma.

5Manga incia mboomo ulo mokobisa

tee mboomo ulo momabhongo momendeuna morango

6sabutuna inda arango suarana pande parikana ulo,2

moomini suarana pande baca doʼa moʼahalii.

7E Aulataʼala, upahancurumea o ngincina i nuncana ngangana.

Hobutimea nginci mantoana manga singa mangura, e KAWASANA OPU!

8Taroakamo manga incia aila mboomo uwe motobusaka kasiimpo indamo atokamata.

Wakutuuna manga incia ahela panana, o panana manga amembalimo amakundu.

9Taroakamo manga incia mboomo bhiku morere amembali nggalanggala,

mboomo rahasia momatena i nuncana kadhuma tee indapo akamata matana eo.

10Indapo asadaria, manga incia abinasamo,

ibaratina mboomo rumpu mokorui momaijo tee indapo amaoge,

maka aporikanamo atowiia ngalu tee apolakaakea mboomo penembulana momalau.

Amarana Kawasana Opu bheakangkanaia

i wakutuuna manga incia dhaangiapo adhadhi.

11Mia mobanara bheakaunde-unde wakutuuna manga incia akamata kabalasina to mia madhaki,

tee abhanui aena tee raana manga incia.

12Mia bheapogau, "Totuu dhaangia fahala to mia mobanara!

Satotuuna, Aulataʼala modhawuna kaʼadili i alamu!"