Zaburu 43

1E Aulataʼala, dhawuakumo kaʼadili,

tee uewaaka parakaraku i aroana lipu modorohaka.

Pabebasiaku minaaka i pande pekagau tee mia madhaki,

2roonamo Ingkoomo Aulataʼala peulusaku.

Pokia Ingkoo umendeuaku?

Pokia iaku sadiamo kusukara

roonamo kapisakina musu?

3Lambokoa o kainawamu tee kabanaramu

to akapalaikiaku

tee abhawaaku i gunumu momangkilo,

i tampana mbooresamu.

4Sumaimo, iaku bhekulingka kuporope i tampa tunuana kurubani to Aulataʼala,

iaku bhekupoaro i Aulataʼala, mopasanaaku tee mopaunde-undeaku.

Iaku bhekupujiko tee kecapi,

e Kawasana Opu, e Aulataʼalaku.

5Pokia umaasi e ngangarandaku

tee pokia ulilaho i nuncana badaku?

Uharapumo i Aulataʼala roonamo iaku uka bhekupuji Incia,

Aulataʼalaku mopasalaamatiaku.