Zaburu 108

Sukuru tee Doʼa

(57:8-12; 60:7-14)

1Lagu. Zaburuna Daud. 21

Ngangarandaku amatangka, e Aulataʼala!

Gauku bhekulaguaka lagu kapujia to Ingkoo.

Bhangumo, e inyawaku!

3Iaku bhekubhangu tee kumagasiaaka gambusu tee kecapi!

Iaku bhekubhangu raneeooge!

4Iaku bhekusukuru i Ingkoo i tanga-tangana manga lipu, e KAWASANA OPU,

tee kulaguaka manga lagu kapujia i manga lipu mosagaanana.

5Sababuna o kaasimu molagina amaoge akawa i laiana,

tee kabanaramu akawa i taʼina ngalu.

6E Aulataʼala, susuakea kaogesamu i laiana,

tee kamuliangimu i saangua alamu. 72

Mangapakana tee kuasamu tee uperangoimea o doʼaku,

mamudhaakana manga mia imaasiakamu atopasalaamati.

8Aulataʼala padhamo afirimani i tampana momangkilo,

"Iaku gauku kukaunde-unde, tee kupodhawu-dhawuaka Tana Sikhem,

tee kuʼukuru Mbolongana Sukot."

9Gilead tee Manasye o pewauaku,

Efraim mboomo helem minaaka i ase mojaganina bhaaku,

tee Yuda katukona pamarintaku.

10Maka o Tana Moab amembali palangga tampana bhanuiana aeku,

tee i bhawona Tana Edom kutudhaaka sandaliku.

E Tana Filistin, Iaku kusambo-sambomo roonamo padhamo kutaloko!"

11Incema bhemobhawaaku i kota mokobentena makaa sumai?

Incema momembalina moʼantaraaku sakawana i Edom?

12E Aulataʼala, buaka mencuana Ingkoo mangabhanakana?

E Aulataʼala, Ingkoo inda umaju upobhawa tee tantaramami to taewangi musu.

13Manga tulungi minaaka i musu,

roonamo o katulungina maanusia inda akoguna.

14Tapobhawa tee Aulataʼala ingkita tamembali tatalo musuta,

sababuna Incia bhemopahancuruna musuta.