Zaburu 104

Kaogesana Kawasana Opu i nuncana Bhari-bharia Ipadhaangiana

104:1-35

1Pujimo KAWASANA OPU, e ngangarandaku!

E KAWASANA OPU, e Aulataʼalaku! Ingkoomo momaogena!

Ingkoo uposalibumbuaka kaogesa tee kamuliangi,

2tee upakana kainawa mboomo juba.

Ingkoo ubhakesaka laiana mboomo saangu kema,

3tee upakaro ariina bhanuamu i uwe i bhawona kubana laiana.

Manga taʼina ngalu upamembalia karetamu,

tee Ingkoo usawi i bhawona ngalu.

4Ngalu upamembalia potumpuamu,

tee o bherese amembali bhatuamu.

5Ingkoo udhika alamu i bhawona fondasina tee upekatangkea,

sabutuna inda bheakohudha saʼumurua.

6Ingkoo apake andalaoge mboomo juba to usalibumbu alamu,

o uwena mawa apene atutubhi manga gunu.

7Roonamo pamurumu o uwe sumai asiwulu makaa tee apalai,

tee roonamo arango ruuna guntumu o uwe sumai apalai pekadhei.

8Uwe sumai akompa i manga gunu tee asapo i nuncana manga mbolonga,

i tampa mopadhana itantuakamu to uwe sumai.

9Ingkoo padhamo utantuakea o tidha inda momembalina ilaloina

mamudhaakana o uwe sumai inda apendua uka asalibumbu alamu.

10Ingkoo upewau matana uwe alua i manga mbolonga,

kasiimpo asiwulu i tanga-tangana manga gunu,

11tee apasumpu bhari-bharia binata maila;

apaila katuuna bhorokona manga keledai maila.

12I bhiwina uwe sumai manga manu-manu i antara amboore,

kasiimpo manga incia apekawowo i tanga-tangana manga puuna kau.

13Minaaka i paana bhanuamu upasapoakea wao to manga gunu;

alamu abukeaka hali momalape mopadhana ipadhaangiamu.

14Ingkoo mopatuwuna rumpu to binata kadhambaaka,

tee upatuwu penembula to maanusia

mamudhaakana o alamu amembali akohasiliaka giuna ikande,

15siitumo o angguru ipeeluna maanusia,

mina zaitun mopewauna rou akocahea,

tee o roti mopekatangkana dhadhina maanusia.

16Manga puuna kauna KAWASANA OPU apotibhaaka wao motaralabhi-labhi,

siitumo manga puuna aras i Libanon ipombulana karona.

17Iwe sumaimo manga manu-manu akarajaa poteona,

manu-manu ranggung1 akarajaa bhanuana i puuna sanobar.

18Manga gunu momalanga amembali tampa mbooresana bhembe maila,

tee manga kabumbu mokobhatu amembali tampana peulusana paapaando.2

19Ingkoo upadhaangia bula to amembali tanda to motantuakana wakutuuna bula mobhaau,

tee o matanaeo amataua naepia o wakutuuna bheatondu.

20Ingkoo mopadhaangiana kalalanda, kasiimpo amembali amalo,

i wakutuumo incia sumai sagala binata i koo aposawele.

21Manga singa mangura akomburu apeelo kinandena,

aemani kinande minaaka i Aulataʼala.

22Matanaeo uka abhete,

kasiimpo manga binata sumai ambuli apotidhole i nuncana mbooresana.

23Kasiimpo maanusia alimba to akarajaa,

tee apajala usahana sakawana konowia.

24E KAWASANA OPU, abhari mpuu mopadhana ipewaumu!

Tee hikimati upamembalia bhari-bharia;

alamu abukeaka tee mahalukumu.

25Kamatea o tawo momaewa motobhakesakana sumai,

iwe sumako dhaangia tee sagala giu mahaluku mopondele inda atogagari o kabharina,

dhaangia o binata momaidhiidhi tee manga binata maoge.

26Iwe sumai manga kapala adhala,

tee iwe sumai uka o Lewiatan3 mopadhana ipadhaangiamu amagamagasia.

27Bhari-bharia aharapu i Ingkoo,

mamudhaakana udhawua kinande ande akawa wakutuuna.

28Wakutuuna udhawuakea kinande,

manga incia arombusakea;

wakutuuna ubungkale limamu,

manga incia akandea sakawana amambosu.

29Wakutuuna ubuniaka roumu,

manga incia atokidha;

Wakutuuna uala poinuncana, amatemo manga incia,

kasiimpo ambuli pendua amembali ngawu.

30Maka ande manga incia udhawua poinunca,4 manga incia atopamembali;

Ingkoo udhawu dhadhi bhaau to alamu.

31Taroakamo o kamuliangina KAWASANA OPU asadhaadhaa saʼumurua;

taroakamo KAWASANA OPU akaunde-unde tee opea mopadhana ipewauna!

32Wakutuuna Incia atonto alamu, sumaimo o alamu akorende,

tee wakutuuna adhingku manga gunu, sabutuna akoombu manga gunu incia sumai!

33Iaku bhekulaguaka lagu to KAWASANA OPU saʼumurua dhadhiku;

iaku bhekupuji Aulataʼalaku kananteana dhaangiapo kudhadhi.

34Maasangia opea ifikiriku amasanaakea incana;

iaku bhekukaunde-unde roonamo KAWASANA OPU.

35Taroakamo o mia mokodosa amapupu minaaka i bhawona alamu,

tee manga mia madhaki indamo dhaangia.

Pujimo KAWASANA OPU, e ngangarandaku!

Pujimo KAWASANA OPU!