Zaburu 103

Pujimo Kawasana Opu, E Ngangarandaku!

103:1-22

1Zaburuna Daud.

Pujimo KAWASANA OPU, e ngangarandaku!

E saangua baatiniku, pujimea o sarona momangkilo!

2Pujimo KAWASANA OPU, e ngangarandaku,

tee bholi umalinguakea bhari-bharia kalapena.

3Incia moʼamponina bhari-bharia kasalahamu,

tee Incia mopauntona bhari-bharia panyakimu.

4Incia mopasalaamatina inyawamu minaaka i koburu,

tee Incia modhawuko rahumati tee kaasina molagina.

5Incia mopatumpuna incamu tee kalape.

Sabutuna ingkoo usadhaadhaa umangura mboomo manu-manu bunia.

6KAWASANA OPU mokarajaana hukumu tee kaʼadili

to bhari-bharia mia motopisaki.

7Incia asusuaka dhalana to Musa

tee apaumbaaka opea mopadhana ipewauna to miana Israel.

8Sababuna o KAWASANA OPU abukeaka kaasina inca tee rahumati,

Incia sadia asabara tee o kaasina molagina ataralabhi-labhi.

9Incia inda mangaraeaka torotorosu,

tee inda bheaʼamara to saʼumurua.

10Incia inda manga hukumu apokana tee dosata,

atawa mangabalasi apokana tee kasalahata.

11Roonamo mboomo kalangana laiana i bhawona alamu,

mboo sumaimo o kaogena kaasina molagina to manga mia momaekaia.

12Mboomo karidhona minaaka i timbu sakawana i bhara,

mboo sumaimo Kawasana Opu ahapusu manga dosata tee abhanakea pekaridho minaaka i karota.

13Mboomo samia ama amaasiaka manga anana,

mboo sumaimo o KAWASANA OPU amaasiaka manga mia momaekaia.

14Roonamo Incia amataua tuaapa ingkita tatopebhangui;

Incia amataua ande ingkita sii tangkanamo ngawu.

15Maanusia o dhadhina amampodho mboomo rumpu;

manga incia akokamba mboomo kamba-kamba i inawu;

16ande atowiia ngalu, amalaumo o kamba-kamba sumai,

tee o tampana indamo atomatau uka.

17Maka o kaasi molagina KAWASANA OPU sadhaadhaa abakaa to manga mia momaekaia,

tee o kabanarana to anana tee siwuluna manga incia,

18siitumo to manga incia mokeniakana pojanjiana

tee moudhania to aose manga parintana.

19KAWASANA OPU padhamo apatotapuaka kauncuramakana i sorogaa,

tee o pamarintana akuasai bhari-bharia ipadhaangiana.

20E bhari-bharia malaaʼekati pujimo KAWASANA OPU,

e manga malaaʼekati mobarani momakaa tee mopewauna firimanina,

tee motaʼatina tee opea ibhoasakana!

21E bhari-bharia tantarana i sorogaa pujimo KAWASANA OPU,

e manga bhatuana moosena parintana!

22Pujimo KAWASANA OPU, e bhari-bharia mahaluku ipadhaangiana,

i sagala tampa ikuasaina!

Pujimo KAWASANA OPU, e ngangarandaku!