Zaburu 10

1E KAWASANA OPU, pokia Ingkoo upekaridho?

Pokia Ingkoo ubuniaka karomu i wakutuuna ingkami tamaseke?

2Mia madhaki mosombo apajere mia motopisaki,

taroakamo manga incia akangkanaia katapuna momadhaki ihaejatiakana karona.

3Roonamo mia madhaki apuji-puji peeluana incana,

tee o mia masoʼo apekatunda tee ahina KAWASANA OPU.

4Mia madhaki apogau tee kasombo,

"Aulataʼala inda bheatuntua."

I fikirina tangkanamo, "Inda dhaangia o Aulataʼala!"

5Mia madhaki sadia apotibhaaka sagala ipeeluna.

Hukumuna Aulataʼala inda dhaangia o maʼanana to incia.

Incia apandaʼente bhari-bharia bhalina.

6Mia mokodosa apogau i nuncana ngangarandana, "Iaku sadhaadhaa bhekumatangka,

tee saʼumurua inda bheakangkanaiaku balaa."

7Ande apogau, o ngangana abukeaka katunda, gau-gau, tee kapisaki.

Incia sadia abhoasaka pogau madhaki tee apekabanci.

8Incia apekantaa i desa-desa,

Apekamate mia inda mosala, i tampa momalino.

Incia alukuti mia momalute.

9Incia apekantaa i tampa momalino

Mboomo singa i nuncana rumpu.

Incia apekantaa to arako mia motopisaki.

Arako mia motopisaki tee apapesuaia i nuncana jarina.

10Incia aʼungko mamudhaakana apekapapaki,

kasiimpo tee kakaana bukuna incia apakotibu mia malute sumai.

11Pogauna i nuncana ngangarandana, "Aulataʼala inda afaduliakea,

Incia apopiro tee sadia inda akamata opeopea uka."

12E KAWASANA OPU, bhangumo. Hukumumea manga mia madhaki!

Bholi umalinguaka mia motopisaki.

13Apokia manga mia madhaki sadia ahina Aulataʼala?

Manga incia apogau i nuncana ngangarandana, "Ingkoo inda bheutuntua!"

14Maka Ingkoo dhaanamo ukamatea, roonamo Ingkoomo mokamatana manga mia mosukara tee mia monarakaa,

tee uewaaka parakarana manga incia.

Mia momalute apasarakaaka karona i Ingkoo,

roonamo Ingkoomo motulungina manga ana maelu.1

15Katukimea o takiona mia mokodosa tee mia madhaki,

tuntumea o dosana manga incia,

sakawana inda upotibhaakea uka.

16KAWASANA OPU aparinta saʼumurua,

manga lipu inda momatauna Incia bheamofu minaaka i lipuna. 172

E KAWASANA OPU, opea ipeeluna manga mia motopisaki uperangoia.

Ingkoo bheupekatangka incana manga incia,

tee utaaia o talingamu

18to uewaaka ana maelu tee mia motopisaki

mamudhaakana inda dhaangia o maanusia mopekaekana manga incia.