येशुनदी रुपांतर
येशुड आ मंदीन आन्या, “नीन मिक खरेम शप्तान की, इंदू नीला फडीनोर काही मंदी इल्ला उंडार की, यवार की द्यावारदी राज्य सामर्थ्यता वचीनेद कमशी नंताक सावूद अनुभव दाक फोई.” आर नाळा बाद येशुड पेत्र, याकोब इंगा योहान इरनी वान यंका फेद्दा कोंडा मिन्दिक एका फोया इंगा वार मुंदार वानदी रुपांतर आय्या. वानी बट्टाल चमकदार, शेंगेम तेल्लांग, इंता की पृथ्वीमिंदा येवारूच इंता तेल्लांग उत्की शेकायार, इल्ला आयन्या. आप्पुड एलीयाड इंगा मोशेड वान मुंदार प्रकट आय्यीर, वार येशुन संगा माटलाडदूर. पेत्र येशुन आन्या, “रब्बी, मनाम इंदू उंडाम इदी बागुंडाद. मनाम मूड मंडपलु बना मतुदाम. वगाट निक, वगाट मोशेन कस्रोम इंगा वगाट एलीयान कस्रोम.” पेत्र इल्ला आन्या येनटीक की, येम माटलाडेद इदी वान्की तेलवाकुंडू येनटीक की वार आद्री फोइनीर. आप्पुड वगाट मोडाम वच्या इंगा वार मिंदा सावली शेश्या इंगा मोडाम नुस वगाट आवाज वच्या, “इड ना प्रिय कोडकु उंडाड वानदी मीर इनांडा.” अचानक, वार आजु बाजूक सुशीर आप्पुड वारकी येशुन शिवाय येवारूच कमसालेद.
वार कोंडा मिंदनुस किंदीक वच्चेताप्पुड, येशुड वारकी आज्ञा इच्या की, “मीर येम सुस्तीर आदी मनशी कोडकु सावनुस लेशी नंताक यवारकीच शप्पाकुंडा.” दिनकस्रोम वार पण इदी माटा वार नडमाने फेट्टीर, पन सावनुस लेशेद दिंदि अर्थ येम दिन बद्दल आपसला चर्चा शेयदुर. वार येशुन आडगीर, “पहिला एलीयाड दावा बेक इल्ला नियम शास्त्र शिक्षकलु येनटीक आंटार?” वाड वारनी आन्या, “इंग्या, एलीयाड पहिला वच्चीगास आंता शिंगार शेशी इदी खरेम उंडाद. गान मनशी बिडा बद्दल वाड शेंगेम दु:खल सहन शेशी इंगा नकार शेस्कामला वच्ची इल्ला पवित्र शास्त्रला येनटीक राशिनार? नीन मिक शेपतान, एलीयाड वच्चीनाडूच इंगा वानबद्दल राशिन लेका, वारकी वाटाश्या आल्ला वार वान संगा शेशीर.”
दृष्टात्मा नुस छुटकारा
यप्पुड येशुड इंगा मुग्गुर शिष्यल बाकी शिष्यला देगार वच्चीर, आप्पुड वार यंका फेद्दाद मंदी समुदाय उंड्या इंगा नियमशास्त्र शिक्षकलु वारसंगा जगडाम शेयदूर इल्ला वारकी कमशा. आंता मंदी येशुन सुशी नग्रेम आश्चर्य चकीत आय्यीर इंगा वार वानदी स्वागत शेशेदेंक फारीर. येशुड शिष्यलनी आडग्या, “मीर वार संगा येनटीक जगडाम आडतुनार?” आप्पुड समुदायलोन वगाड वानकी उत्तर इच्या, “गुरुजी, नीन ना कोडकुन नि देगार येकोस्तीन. वान लोना दृष्ट आत्मा उंडाद याद वान माटलाडा नियाद. यप्पुड पण आदी वान फटताद आप्पुड वान किंदा आपटास्ताद इंगा मुतिक फेस येकोस्ताद, फंडलु कोरकुताद इंगा अकडाशी फोयताड. नीन नि शिष्यलनी तीदेंक शेपतीन गान वार तीशी शकायाले.”
येशुड दैयाम फटीने बिडान बागा शेस्ताड
येशुड वारनी आन्या, “हे अविश्वासी पिढी, नीन याडनंताक मी संगा उंड्यान? नीन मी संगा याडनंताक सहन शेयदून? बिडान नादेगार एकादांडा.” मग वार बीडान येशुन देगार येकोचीर, यप्पुड आ दृष्ट आत्मा येशुन तीकुड सुश्या आप्पुड बीडान फिंडेस काड्या इंगा वाड भुमी मिंदा फडी नोरूक फेस एकोची लोळायदेंक आंट्या. मग येशुड वान आब्बान आडग्या, “यप्पुड नुस इड इल्ला उंडाड?” आब्बाड उत्तर इच्या, “फुट्टीननुस इड इल्ला उंडाड. शेंगेम तुकुल मत्तेदेंग आदी वान आग्गीला इंगा नेळाला येश्या. जर नि शेयता येमाना आय्येद शक्य उंटे तर मा मिंदा दया शेय इंगा माक मदत शेय.” येशुड वान आन्या, “शक्य उंटे तर, इल्ला येनटीक आंटाव? विश्वास फेटेतोरकी आंता शक्य उंटाद.” आप्पुड लगेच मोगबिडा आब्बाड बेग्गे कीरली आन्या, “नीन विश्वास शेस्तान, नाद अविश्वास तीशेसकाड.” येशुड मंदी समुदाय मना तीकुड फारका वस्तुनाद इल्ला सुश्या आप्पुड येशुड आ दृष्ट आत्मान बेद्रीची आन्या, “अरे मुकी बहिरी आत्मा, नीन निक आज्ञा इस्तान की, इन नोनुस बैटीक येल इंगा यपुडच इन नोना दुराक.” नग आदी कीरली इंगा वान शेंगेम फिंडी बैटीक येल्या इंगा मोगबीडा सचीन लेका आय्या इंगा मंदीक वाटाश्या, वाड सची फोया. गान येशुड वान शेय फट्टी लेप्या इंगा वाड नीला फड्या.
मग येशुड इल्लुक फो इल्काडा वान शिष्यल वान एकांतला आडगीर, “मिम आदी अशुद्ध आत्मा येनटीक तिशी शकायालेम?” येशुड वारनी आन्या, “इदी जात प्रार्थना इडशी इंगा दुसरा येनटीताच येल्लेद शक्य लेद.”
मना सचे बद्दल येशुनदी दुसरा भविष्यवाणी
येशुड इंगा वान शिष्यल आंदनुस येल्लीर इंगा गालील प्रांतनुस प्रवास शेस्का नडदूर. इदी यवारकीच येरका कावाराद इदी येशुनदी इच्छा उंड्या. येनटीक की वाड मना शिष्यलकी नेरपु. वाड वारनी आन्या, “मनशी कोडकुन विश्वासघात शेशी फट्टी मन्सुला शेतल्या इच्काम्ला वच्ची. वार वान मतेश्यार. गान सचीनेन्का वाड मुड नाळाक लेशी.” गान इ माटाद अर्थ वारकी तेल्वालेद इंगा आ विषयला वान आडगेदेंक वार येरस्कूनदूर.
आंदार काना फेद्दावोड यवार
येशुड इंगा वान शिष्यल मुंदारकी कफर्णहुमकी वच्चीर. येशुड इल्काडा उंड्या आप्पुड वाड वारनी आडग्या, “दावाता मीर या माटामिंदा चर्चा शेयदूर?” गान वार तेप्पांग निलचीर येनटीक की दावाता आंदार काना फेद्दावोड येवाड इ माटामिंदा चर्चा नडशिन्या. मग येशुड किंदा कुसन्या, वाड बारा शिष्यलनी फिलची वारनी आन्या, “जर यवारकी आना फेद्दावोड आय्येद उंटे तर वाड आंदारकाना शिन्नावोड कावाला इंगा आंदार सेवक कावाला.” मग येशुड वगा बीडान वार नडमा नीला फडामत्या इंगा आन्या? “यवाड पण इ शिन्ना बीडान ना फेरता स्वीकार शेस्ताड वाड नन्नु स्विकार शेस्ताड इंगा यवार पण नन्नु स्वीकार शेस्ताड वाड फक्त नन्ने स्वीकार शेस्ताड इल्ला लेद तर यवाड नन्नु आंपीनाड वान पण स्वीकार शेस्ताड.”
यवाड मना विरोधला लेड वाड मनातीकुड उंडाड
योहान येशुन आन्या, “गुरुजी, मिम वगान नी फेरता दैयाल तीशेतापुड सुस्तीम इंगा मिम वान लेद आंटीम, येनटीक की वाड मना दिंटल्योनटोड लेकुंड्या.” गान येशुड आन्या, “वान लेद आनाकुंडा, येनटीक की यवार पण ना फेरता चमत्कार शेस्ताड वाड इंगा ना विषयला वाईट माटलाडाड. यवार मना विरुद्ध लेर वार मनातीकुड उंडार. नीन मिक खरेम शेपतान, ख्रिस्त सेवक आंका येवाडाना मिक वगा शंबाड नेळ इच्यार वाड नक्की वान प्रतीफळकी चुकायाक फोई.”
तटरायदी कारण आय्येद
नामिंदा विश्वास फेटेतोर इ शीन्नावोरलोन वगान पण येवाडाना पाप शेयामती, वान गोन्तुला इसरायदी पाट कट्टी वान समुद्रला फेकेशेद वान कस्रोम बागुंडाद. जर नीद मंची शेय नीनु पाप शेशेदेंक आंस्ते तर आदी कोसकाड. रोंड शेतुल उंडी नरकला यप्पुडूच आराद इल्लोन आग्गीला फोये काना वगा शेय लेन्दे अनंतजीवनला फोयेद शिंगार उंडाद. इंगा जर नीद काल नीनु पाप शेयदेंग आंस्ते तर आदी तीस्काड. रोंड काळलु उंडी नरकला फोयेकाना लंगडा आय्यी अनंतजीवनला फोयेद शिंगार उंडाद. जर नीद मंची कन्नु नीनु पाप शेयदेंग आंस्ते तर आदी तीस्काड. रोंड कंडलु उंडी यंदु फुल्गुल येपुडूच सैयाव इंगा आग्गी आराद इल्लोन नरकला फेकेस्कामला दावाला दानकाना वगा कन्नु उंडी द्यावार राज्यला फोयेद इदी शिंगार उंडाद, येनटीक की आंदारदी आग्गीता परीक्षा तीस्कुनदेंक वच्ची. “उप्पु शिंगार उंडाद. जर उप्पु दानदी खारटपना इडस्ते तर आप्पुड दान यल्ला रोस शेस्यार. मीर स्वताला उप्पु उंडा निंडा इंगा वगामेगार संगा शांतीता निलवांडा.”
वडार. Copyright © 2024 Bridge Connectivity Solutions Pvt. Ltd. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.