प्रेषित 28

मिलिता इंदू पौल

1यपुड माय काळलु सुखरूपता आंदूड भुमिक आंट्या, आप्पुड माक तेलच्या की, आ बेटूद फेर मिलिता इल्ला उंडाद. 2आंदू नीलचेटोर मासंगा संगेम ममताता वागाशीर, वार ओगाट शेकोटी आंशिर इंगा माद स्वागत शेशीर, येनटीक की वाना फडू इंगा सलीपण उंड्या. 3पौल कटलु जमा शेसु इंगा आ शेकोटीला यैयदू, शका कसरोम आंदकेल ओगाट जाहिरीला फाम येल्या इंगा आदी पौल शेईन गुंडाळीच्कुण्या. 4आदी सुशी आंदू नीलचेटोर वगामेगारणी आनेदेंक आंटीर, “इ मणशी खुनी उंडा बेक, समुद्रलोन्केल जरी इड वाचाश्या तरी न्याय द्यावारपण इन जगाय नियाड.” 5पण पौल आदी फाम आग्गीला झटकाशी येश्या इंगा पौलकी येमी कालेद. 6आ बेटमिन्दुड मंदीक वाटाश पौलदी शरीर वास्कुन्नेद किंवा येम पण विकार आईनेद कम्पीयाकुंदू, आप्पुड आ मंदिद विचार पलटाश्या इंगा पौल द्यावारे उंडाड इल्ला वार आनेदेंक आंटीर.

7आंदकेल देगारे पुब्ल्य फेरोन मंशीद शेन उंड्या, पुब्ल्य इड आ बेटटोड अधिकारी उंड्या, वाड मा आंदारदी वान ईलकाडा स्वागत शेश्या इंगा मूड नाळ माद शिंगार पाहूनचार शेशा. 8पुब्ल्यान आब्बाड जडमुता इंगा कडपु खराब उंडीने इचांग बिमार उंड्या, दांचांग पलंग मिन्दा फडी उंड्या, पौल आ बिमार मंशीन भेटादेंक फोया प्रार्थना शेशी पौल स्वताद शेई वानमिंदा फेट्या इंगा आ मन्शीन शिंगार शेश्या. 9इदी घडासनेद सुशीनेन्का आ बेट मिन्दुटोर इंगोगो बिमार मंदी पौलतीकुड वचीर इंगा शिंगार आयीर. 10वार माक सन्मानता संगेम वस्तूल भेटलु पण इच्चीर इंगा यपुड मिम वापस प्रवास इचांग येलतीम आप्पुड माक आंटेळी संगेम माटलु पुरामतीर.

रोमदी प्रवास मुंदारकी सुरु

11मिम इंदू सलीकालाम नीलचीनेन्का आलेक्सांद्र शहरलोन वगा जहाजता मुंदार प्रवासकी येलतीम, आदी जहाज आ बेटमिंदा सलीकालामभर मुक्कामकी उंड्या, आ जहाजला मुंदार बाजूक जुळवा तमुळलाय1 चिन्हळ उंड्या. 12इंगा मिम सुराकुस शहर इंदूक फोई पोहोचास्तिम इंगा आंदू मूड नाळ नीलस्तिम. 13आंदकेल तीर्गीगास मिम येलतीम इंगा रेगीयोन नगरकी फोतीम, आंदू ओगा नाळ मुक्काम शेस्तीम, यंक्सार दक्षिणतीकुड घाली तीर्गी नेन्का इन्गो नाळ पुत्यूलकी शहर फोतीम. 14आ शहरला माक काही बंधूजनलु भेटाशीर, वार शपकाम मिंदा मिम इंदू योड नाळ नीलस्तिम, मग मिम रोम इंदूक फोई पोहोचास्तीम. 15आंदूटोर ताम्मुल इंगा शेलालू मा बद्दलदी माटा ऐकाशीनीर, वार मा भेटइचांग अप्पीयान संतापेठ नंताक इंगा मूड धर्मशाळाल नंताक वचीर, पौलदी वारदी भेट आयीनेन्का वाड द्यावार्दी उपकार मानाश्या इंगा वांकी धीर वच्या. 16मिम रोम इंदू पोहोचाशिनेन्का पौलकी वकांकी निलचेद परवानगी शिक्या, पण वान मिंदा देखरेख शेशेदेंक ओगा शिपाईन फेटदेंक वच्या.

पौल रोमलोन यहुदीलाद भेट तीस्कोंटाड

17मूड नाळा बाद पौल आंदार यहुदी पुढारीलान ओगातळा कुतेश्या, यपुड आंदार जमा आय्यीर आप्पुड पौल वारणी आन्या, “बंधूलाला, मना तम्मूळा विरुद्ध नीन येमपण शेया लेन, तरी नन्नु यरुशलेम इंदू फटीगास रोमी मंदी शेतल्या कैदी आंका इच्चीर. 18इंगा यपुड वार नाद चौकशी शेशीर, आप्पुड वारदी नन्नु इडशेद इच्छा उंड्या, येनटीक की मरण शिक्षाक योग्य इल्ला यादूच गुन्हा नीन शेया लेकुंटीन. 19पण यहुदी मंदी यपुड नन्नु ईडशेदेंक लेद आनीर, आप्पुड कैसरतीकुड न्याय आडगुकाम नाक भाग फड्या, दिंदी अर्थ इल्ला लेद की, यहुदी मंदी उलटा नाक दोष आंचेद इच्छा उंडाद. 20इ कारण इचांग मींमलान भेटाशेद इंगा मी संगा माटलाडेदी नीन इच्छा सुपिस्तीन, येनटीक की इस्राएल आशा तोंन2 नीन इ साकळीलता कटीनोड उंडान.” 21यहुदी पुढारी पौलनी आनीर, “माक निबाबत यहुदीया नुस यादुच पत्र दालेद, जर आला नुस वचेतोर बंधूजनला पैकी ओगाड पण तमूड मीविषयला खराब शपालेद किंवा माटलाडालेद.” 22पण मि मतलु येम उंडाय इदी समजाशी तीस्कुनेद माद इच्छा उंडाद, येनटीक की इ गट विरुद्ध3 आन्नी तीकुड माटलाडतार इदी माक यरका उंडाद.

23आप्पुड यहुदी मंदी ओगाट बैठकदी नाड ठरामतीर, यंदू पौल निलदू, आंदू वार फेदा संख्याता जमा आय्यीर, आप्पुड पौल वारकी समजामती शप्या इंगा द्यावार राज्य बद्दल स्वताद साक्ष इच्या, मोशेन नियमशास्रकेल इंगा संदेष्ट्यालकेल फग्लामती शेप्या येशुन विषयला वारदी खात्री पटामतेद प्रयेत्न शेश्या इदी वाड फदिनकेल मापसार नंताक शेश्या. 24वाड फग्लामती शपीने माटला विषयला काही मंदीद खात्री पटाश्या, तर काही मंदी वाड माटलाडे माटलामिंदा विश्वास फेटालेर. 25पौल मुंदार्दी ओगाट माटा माटलाड्या, दान मिन्द्केल मतभेद आयी वार पैकी काही मंदी लेशीर इंगा आंदकेल फोयेदेंक आंटीर, पौल आन्या, “यशया संदेष्ट्याल तीकेल पवित्र आत्मा मना आबातातागार संगा येम आन्या, आदी खरेखरेमे येंता खरेम उन्डाद! यशया आनिंड्या.”

26इ मंदीतीकुड मीर फोंडा इंगा वारकी शपना: मीर ऐकाश्यार तर खरेम पण मिक समजाक फोई, मीर सुश्यार मिक कम्पीची पण मीर येम सुस्तुणार आदी मिक तेला फोई.

27येनटीक की इ मंदि अंतकरणलु जड आयीनाय वार गुम्मालता वारकी इना दाद इंगा वार स्वताय कंडलु बंद शेशिणार लेकाते वार स्वता कंडलाता सुस्तुनीर इंगा स्वता गुम्मालता ऐकास्तुनीर इंगा ना तीकुड तीर्गु तुनीर इंगा नीन वारणी शिंगार शेस्तुन्टीन.4 28दांचांग द्यावार इदी तारण इंगोगो राष्ट्रटोर मंदीतीकुड आम्पीच कामला वच्या, इदी मी यहुदी मंदीक तेलाला, वार ऐकाश्यार. 29वाड इल्ला माटलाडीनेन्का यहुदयाल वार दिन्टल्या संगेम विवाद शेस्का येलीर.

संपास्काम

30पूर्ण रोंड येन्डलु वाड वान भाडा इंटल्या नीलच्या, यवार वान भेटादेंक वदुर, वारदी वाड स्वागत शेयदू. 31वाड द्यावार राज्यविषयला प्रचार शेश्या, वाड प्रभू येशुन विषयला शिक्षण इच्या, वाड इदी फनी संगेम धेर्यता शेयदू इंगा यवार पण वान माटलाड देंक अडाय मती शकायलेर.