वडार
प्रेषित 27
पौलदी रोम पर्यंतदी न्यळाद प्रवास क्रेतपर्यंत
यपुड मिम समुद्रदावाता इटलीक फोयेळदी ठहरामत्या आप्पुड पौल इंगा इंगोगो काही कैदील युल्य फेरटोळ शताधीपतीन शेईला सोपवाशीर, युल्य इड अगस्तस सेनाटोळ वगा अधिकारी उंड्या. अद्र्मूत्तीय इंदूळ वगा जहाजकेल मिम फोयेटोर उंटीम, इदी जहाज आशिया काटमिंदूळी बंदरलु तीस्कोनी मुंदार फोतुन्या, मिम इ जहाजकेल प्रवासला येलतीम, आप्पुड मासेदोनियालोन थेस्सलनिका इंदू नीलचेटोळ अरीस्तार्ख मासंगा उंड्या. उन्गो नाळ मिम सिदोन नगरकी पोहोचास्तिम, युल्य पौलसंगा संगेम शिंगार वागाश्या, पौल मित्रलकी वांदी काळजी तीस्कोना दाला आंका वाड मोकळीकता इच्या. आंदकेल मिम समुद्रदावाता मुंदारकी येलतीम इंगा कुप्र कंटाम कंटामता येलतीम येनटीक की घाली मा तीकेड उंड्या. किलीकीया इंगा पंफुलीया प्रांतदेगारदी समुद्र पार शेशी लुक्य प्रांतलोन मुर्या बंदरला पोहोचास्तीम. आंदू शताधीपतिक इटलीक फोयेटोर आलेक्सांद्रदी ओकाट जहाज आढळाश्या, वाड ममलान आ जहाजला कुसना मत्या. मिम संगेम दिवस मेलामेलांग प्रवास शेयदुम, कनिदा शहरपर्यंत वदेंक माक संगेम कष्ट फड्या येनटीक की घाली मुतीतीकेल उंड्या, माक मुंदार फोवा ये दाणकदाका फो, दांचांग मिम क्रेत दक्षिण तीकेल सलमोन शहर मुंदार बाजूक फोतीम. दिन मुंदार माद जहाज क्रेत बेट काटता फेदा अडचणला सुरक्षित बंदर इंदू पोहोचाशीर, आंदू देगारे लसया नगर उंड्या.
मिलितपर्यंत तुफान इंगा नौकाभंग
संगेम वेळ वाया फोइन्या इंगा मुंदारदी प्रवास शेशेदेंक संगेम कठीण आयीन्या, येनटीक की येव्हान यहुदीला उपासाद काळ पण येली फोइन्या, आप्पुड पौल वारणी सावधानदी इशारा इच्चीन्या, पौल आन्या, “मोगुरळू, नाक वाटास्ताद, मना प्रवासला जहाजलोन मालनी इंगा जहाजकीने लेद तर मना जेमुकपण धोका उंडाद.” पण पौल मतसंगा जहाजदी कप्तान इंगा मालक सहमत कालेर, उलटा जहाज कप्तान इंगा मालक माटला मिंदाने शताधीपतीद जास्त विश्वास उंड्या. पण इदी सुरक्षित आनीनेद बंदर सलीकालाम मुक्काम शेशेदेंक सोईद लेकुंड्या, दांचांग संगेममतलाता येलाला इल्ला ठहराश्या इंगा फेनिककी फोयेळदी प्रयत्न शेयाला इंगा शक्य आते तर आंदे सलीकालाम तीयाला इल्ला ठहराश्या.
आप्पुड दक्षिणतीकेल मंद घालील फारतुनाय, आप्पुड वार नागर येती क्रेत कंटाम कंटामक तारू हाकादेंक फोयेदेंक आंटीर, जहाज मिन्दुळ मंदीक वाटादू की, इलोळ प्रकारता घाली माक बेकस उंड्या इंगा आले फारतूनाद. पण लगाने क्रेत बेटकेल 'ईश्यान्यद' आनिनेद वादळी ला घाली फारतुनाद. इंगा जहाज वादळी शिक्या इंगा दानक मुदरा फेयादांक दाकुंड इंगा मुदारा फेयेद यीडशी घालीता जहाज भरकटून फोतिम. मग कौदा फेरूद शिना बेट कंटाम कंटामक मिम फोयेदेंक मिम फोतुनाम, इंगा रवा खटपटीनंतर जीवन रक्षक होडी मिंदा येतकोन तीस्कोन्या. जीवन रक्षक होडी नोनिक तीस्कूनेन्का मंदी जहाज दारामखंडता आव्राशी कटीर, जहाज रेती उंडीने सुर्ती फेरूद उथळ जागाला आदळाशी इ बिताता वार शीड किंदा तीशीर, आप्पुड घालिता आदी भरकुटादेंक आंट्या. संगेम वादळी घालीय तडाखाल तिनाबेक आयीने इचांग मंदी उन्गो नाळ जहाज मिन्दुळदी सामान बेटीक येशेशीर.
तिसरा नाळ जहाजदी काही समान वार स्वता शेईता बेटीक तीशेशीर. संगेम दिवस माक सूर्य इंगा अ चंद्र काम्पीयालेव, वादळ संगेमे भयंकर इल्ला माक वाटादू. संगेम काळपर्यंत मंदीक उपवास घडाशी नेन्का, इंगा पौल वान मुंदार नीला फड्या इंगा आन्या, “नीलचेटोर, क्रेतमिंदकेल मुक्काम हालामता कुंडा, इदी नाद सल्ला मीर ऐकादेंक बेकस उंड्या, आंटे इदी त्रास इंगा इदी नुकसान टाळास वस्तुन्या.” गान इपुड मीर धीर फटाला इल्ला नाद विनंती उंडाद, येनटीक की मीपैकी ओकोनपण जेमुक धोका पोहोचाखोई, मनाद जहाज फक्त गमवाबेक आयी. नीन या परमेश्वर सेवक उंडान इंगा यवांदी उपासना नीन शेस्तान, वान दूत नीना ना बाजूक नीला फड्या. इंगा वाड दूत आन्या, “पौल आद्राक! निक कैसरमुंदार नीला फडाने बेक, नि संगा प्रवास शेशेटोर आंदार मंदी परमेश्वर वान दयाता निक इच्चीनाड. आप्पुड नीलचेटोर, मीर आंदार धीर फटना! येनटीक की नाक यला परमेश्वर शप्या, अगदी आले आयी इल्ला नाक विश्वास उंडाद. पण मनाक यादाना बेटमिंदा दिगी थांबाबेक आयी.”
चौदावा मबुला माद जहाज अद्रिया समुद्रकेल फोदू, आप्पुड खलाशेर जहाज यादाना भुमी मिंदा पोहोचाशीर इल्ला अंदाज शेशीर. वार न्यळाद लोत मोजाशीर आप्पुड आदी चाळीस मिटर निंड्या, इंगा काही वेळता वार इंगा ओकादम समुद्रद लोत मोजाशीर आप्पुड आदी तीस मीटर निंड्या. ओबडधोबड खडक जागा मिंदा म्नाद जहाज आदळाशी इल्ला बीता आंट्या तर वार नालुंग नांगरलु जहाज यंकाळ बाजूक येशीर इंगा फदू फुटेळदी प्रार्थना शेस्का दावा सूळदूर. खलाशील जहाजलोन्केल ईळेळदी प्रयत्न शेशीर, वार जहाजमुंदार भागकेल नांगर येशिनेद भास आयी जीवन रक्षक होडील समुद्रला येशीर. पण पौल शताधीपतीक इंगा इंगोगो शिपाईलान आन्या, “जर इ मंदी जहाजला निलार, तर मीर वाचायार.” दिन मिंदा शिपाइल जीवन रक्षक होडीदाय दारामलु कोशेशीर इंगा आयी किंदा न्यळाला फडा निचिर.
फदु फुटेळ पहिला पौल वार आंदारकी येम तरी तीणेलदी आग्रह शेश्या, वाड आन्या, “इफोद चौदावा दिवस उंडाद, मीर आतुरतागोन दावा सुस्तुणार पण तीनातागालेर, अन्नामदी कणपण तिनालेर. मीर रवा तरी तिंडा, येनटिकीमीर वाचायाला आंटीदेंक मीद तिनकाम फनीद उंडाद, मीर तीनाला इल्ला नीन मिक विनंती शेस्तान, मीपैकी यवार यंडकाक पण धक्का आंटाखोई.” इल्ला माटलाळीनेन्का पौल रोट्या तीस्कोन्या इंगा आंदार मुंदार परमेश्वरदी उपकार मानाशीर, आदी रोट्या तेंपी वाड तिनदेंक आंट्या. आदी सुशी वार आंदारकी धीर वच्या इंगा वार तीनीर. मिम आंदार मिळाशी जहाजला दोनशे शहात्तर मंदी उंटीम. वार आंदार संगेम तिनी तागी नेन्का धान्य समुद्रला येशेशीर इंगा जहाजलोंदी वजन कमी शेश्या.
फदु फुटीनेन्का वारकी भूमीद ओळख पटालेद, पण आंदू काट उंडीने लेका उपसागरलेका आदी जागा काम्पीचीवच्या, दांचांग शक्य आते आंदूळ काटूक जहाज आंचेळदी वार ठहरामतीर. दांचांग वार नांगरलु कोशिर इंगा समुद्रला फडा निचिर, दान संगाने सुकाणूलाय दारामलु ओकाताळा शेशीर, इंगा वार जहाज मुंदार भागुद शीड घाली नीनडाला दांचांग नीला फेटीर इंगा जहाज काटूक येकोचीर. इंगा रोंड समुद्रलोंटोर इसका मिन्दिक वचीने ढीग मिंदा जहाज बेग्याता आदळाश्या, आप्पुड जहाजदी मुंदारदी बाजू उसका सचकोनी कुसन्या इंगा गलबताद यंकाळदी भाग लाटला तडाखाइचांग तेगदेंक आंट्या. आप्पुड शिपाइल कैदीलान मतेळदी ठहरामतीर, दिनकस्रोम की वार लोन्केल यवार पोहाशीगात फारारोद. गान शताधीपतीक पौलनी वाचामतेळदी उंड्या दांचांग वाड शिपाइलाक आदी विचार इडशीदेंक शपीर इंगा यवार्की पोवादेंक वस्ते वार जहाजलोन्केल उडील मती काटूक फोवाला इल्ला आज्ञा शेश्या बाकी मंदी फळलाद अगर जहाजइ तेगीनेय कटला आधारता भूमी गाठाला इल्ला शप्या, इल्ला रीतीता जहाजलोन्टोर आंदार सुखरूपता भूमीमिंदा पोहोचाशीर.
वडार. Copyright © 2024 Bridge Connectivity Solutions Pvt. Ltd. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.