प्रेषित 15

इंगोगाराष्ट्र लोणटोर ख्रिस्ती इंगा मोशेंदी नियमशास्त्र

1आप्पुड काही यहूदी विश्वास फेटेटोर मंदी यहुदियाकेल दिगी बंधूजनलाक इल्ला शिकवण इच्चीर की, मोशेड आंची इचीने नियमला लेका मिद सुंता आईने शिवाय मिद तारण आय्येद शक्य लेद.1 2आप्पुड पौल इंगा बर्णबा इरदी वार संगा संगेमे मतभेद इंगा वाद विवाद आयनेंका इल्ला ठरामतीदेंक वच्या की, पौल इंगा बर्णबा इर इंगा वार पैकी इंगोगो मंदी इ वादविषयला यरुशलेम शहरलोन प्रेषित इंगा आब्बागार इर तीकुड फोवाला. 3मग मंडळी वारणी आंपीची नेन्का वार फेनिके इंगा शोमरोन इ शहरलोन्केल फोईर इंगा इंगोगाराष्ट् तीकुड तीर्गीनेद सविस्तर वर्तमान शपी वार आंता बंधूजनलाक संगेम खुश शेशीर. 4नंतर वार यरुशलेम शहरकी वची नेन्का आंदूड मंडळी, प्रेषित इंगा आब्बागार इर वारदी आगतस्वागत शेशीर, आप्पुड मनाम द्यावार सहवासला उंडीनेन्का वाड जे-जे शेश्या आदी वार शपीर. 5तरी पण परुशी पंथ लोंटोर यंतातरी विश्वास फेटेतोर इल्ला आनीर, वारदी सुंता कावाने बेक इंगा मोशेंदी नियमशास्त्र पाळाशेळद वारकी आज्ञा शैयाने बेक.

यरुशलेम शहर लोंदी धर्मसभा

6मग प्रेषित इंगा आबागारदी वर्ग इ प्रकरणदी विचार शेशेदेंक जमा आय्यीर. 7आप्पुड संगेम वादविवाद आयनेंका पेत्र नीला फडी वारणी आन्या हे बंधूजनलु, मिक यरका उंडाद की, ना नोरकेल सुवार्ता ऐकाशी इंगोगो राष्ट्रटोर विश्वास फेटाला दांचांग सुरवाती दिवसाकेल मी नडमा द्यावार नाद निवड शेश्या. 8इंगा हृदयलु जानाशेतोड द्यावार यला मनाक आले वारकी पण पवित्र आत्मा इच्ची वार विषयला साक्ष इच्या. 9दान्ता वारी अंतकरनलु विश्वासता शुद्ध शेशी वार नडमा इंगा मना नडमा येमीच अंतर फेटा लेद. 10इल्ला उंडीनापुड याद जोखड मना पूर्वजलु इंगा मनाम येतेदेंग समर्थ लेकूनटीम आदी शिष्यल मेडाल मिंदा येशी मीर द्यावार्दी परीक्षा येनटीक सुस्तार? 11तर मग वार लेकाने मनाद तारण प्रभू येशुन कृपाता आय्यी इल्ला मनाद विश्वास उंडाद.

12आप्पुड आंदार मंदी तेपांग निलचीर इंगा बर्णबा इंगा पौल इर द्वारे द्यावार इंगोगो राष्ट्रटोरला याय चिन्हल इंगा अद्भुतलु शेश्या वारी शेशिनेय वर्णनलु वार ऐकाशी तीस्कोनीर.

याकुबद निर्णय

13मग वारदी भाषण संपाशी नेन्का याकोब आन्या; आण्णागारलाला, नाद एकायंडा. 14-15इंगोगाराष्ट्र लोंटोर मना फेर इचांग काही मंदी तिशी तीस्कोणाला आंका द्यावार वारदी भेट यला तीस्कोन्या, इदी शिमोन शापिनाड; इंगा दिन संगा संदेष्ट्याल युक्तीद पण मेळ कुसुंटाद, इल्ला शास्रलेख उंडाद की, 16दिन नंतर नीन वच्यान इंगा दावीद दी फडीनेद मंडप2 डबल नीलाफडामत्यान; इंगा खंडर बुडशी दान परत शिंगार शेश्यान, 3 17दिनकस्रोम की, बाकी नीलचिने मन्सूल इंगा या राष्ट्रलाक नाद फेर इचीनेद उंडाद वार आंदार प्रभूनदी शोध शेयाला. 18इदी जे वान्की युगकाना पहीलाकेल यरका उंडाद आदी शेशेतोड प्रभूड इल्ला आंटाड. 19आप्पुड नाद तर मत इल्ला उंडाद की, यवार इंगोगो राष्ट्रकेल द्यावार तीकुड तीरगुतार वारकी त्रास इया राद; 20तर वारकी इल्ला लीवाशी आम्पीयाला की, मूर्तीद अमंगळपण4, जारकर्म, गोंतू फिस्की मतीनेय प्राणील इंगा नेत्तुर दिनकेल मीर दुराम निलना. 21येनटीक की प्राचीन काळकेल प्रत्येक शब्बाथ नाळ सभास्थानला मोशेंदी पुस्तक वाचाशी सुपीची वांदी घोषणा शेशेतोर मंदी प्रत्येक नगरला उंडार.

इंगोगो राष्ट्रटोर मंदीक ओगाट पत्र

22आप्पुड पौल इंगा बर्णबा इरसंगा मना लोन्केल निवडाशिनोर मन्सूल आंटे बंधूजनलोन्टोड प्रमुख बर्शब्बा आनिनोड यहुदा इंगा सिला इरनी अंत्युखीयाक आंपडीच्या तर शिंगार आय्यी इल्ला आंता मंडळी जताक प्रेषित इंगा आब्बागार इरकी वाटाश्या.

23इर शेईता वार इल्ला लीवाशी आंपीर: “अंत्युखीया, सिरीया इंगा किलीकीया इंदूटोर इंगोगो राष्ट्रलोंटोर तम्मुळलु इरकी प्रेषित इंगा आबागारदी वर्ग ई तम्मूळलाद सलाम. 24मा पैकी काही मंदीक फोई वार माटलाता मिद जेम घोटाळाला केडपी त्रास इच्या इल्ला मा गुम्मामिंदा वचीनाद: पण वारकी मिम आला शेशेदेंक शपा लेकुन्टीम. 25दांचांग माद ओकामत आय्यी नेन्का माक इदी बरोबर वाटाश्या की, 26मना प्रभू येशु ख्रिस्तन फेर इचांग जेम धोकाला येशीने मना प्रिय बंधूल बर्णबा इंगा पौल इर संगा काही निवडाशिनेर मन्सूल मी तीकुड आंपाला. 27दिनकस्रोम यहूदा इंगा सिला इरनी मिम आंपीनाम वार स्वता इ माटलु मिक नोरता शप्यार. 28येनटीक की मुंदार इचीनेय इ आवश्यक माटला शिवाय मी मिंदा जास्त वजन येया राद इल्ला पवित्र आत्माक इंगा माक योग्य वाटाश्या: 29आय आंटे मूर्तीलाक अर्पण शेशिनेय पदार्थल, नेत्तुर, गोंतू फिस्की मतीनेय प्रानील इंगा जारकर्मल इ मीर इड्स्काडाला; इटलाता स्वतान वाचायमत्यार तर मिद शिंगार आय्यी, मुन्दार प्रवास इचांग शुभेच्छा.”

30वारणी आंपीची नेन्का वार अंत्युखीयाक फोईर इंगा वार आंदार मंडळीन जमा शेशी आदी पत्र सादर शेशीर. 31दांटल्योंदी बोध वाचाशी वारकी आनंद आय्या. 32यहुदा इंगा सिला इर स्वता संदेष्ट्याल उंडीर, दांचांग वार संगेम माटलाळी तम्मुळलाक बोध शेशीर इंगा स्थिर आय्यीर. 33आंदू वार काही नाळ नीलचीनेन्का यवार वारणी आंपीनीर वार तीकुड फोयेदेंक तम्मुळलू वारणी शांतीता आंपडीच काडीर. 34पण सिलान्की आंदू इंगा निलदेंक शिंगार वाटाश्या. 35इंगा पौल अन बर्णबा इतर संगेम मंदी सोबत प्रभूनदी वचन शिकामतका इंगा सुवार्ताद घोषणा शेस्का अंत्युखीयाक निलचीर.

पौल इंगा बर्णबा अलग आतार

36मग काही दिवस नंतर पोल बर्णबान आन्या “या-या नगरला मनाम प्रभून वचनलाद घोषणा शेशीर आंदू डबल फोईगास बंधू जनलान भेटाशी वार यला उंडार इदी सूदाम.” 37बर्णबानदी इच्छा उंड्या की, यवान मार्क आंटार आ योहाननी बरोबर तीस्कोनाला. 38पण पौल की वाटाश्या की, पंफुलीया नुस यवाड मनालनी इडशी फोइन्या इंगा मना संगा फनी शेशेदेंक दाल्या वान सोबतिक तीस्कूनेद बरोबर लेद. 39दिन मिन्द्केल शेंगेम मतभेद निर्माण आय्यी वार वगारमेगार नुस अलग आय्यीर इंगा बर्णबा मार्कनी तीस्कोनी जहाजला कुसनी कुप्रास की फोया; 40पौल सिलान निवडाशी तीस्कोन्या इंगा बंधू जनलु वान प्रभून कृपा मिंदा सोपाशी नेन्का वाड आंदकेल यल्या. 41इंगा मंडळीक धेर्य इचका सिरीया इंगा किलीकीया दिन्टल्योन्केल फोया.