Skip to content
BibleKenya

Waddar

गलती 2

पौलइ फणील यरुशलेमवालेर्की स्वीकार उंड्या

नंतर, चौदा वर्षकेल नीन इंगा, बर्णबाबरोबर, येरुशलेम शहरला मिन्दिक फोतीन, नीन नाबरोबर तीतालान पण एका फोतीन. नाक प्रकटी करण आईन्या लेका नीन फोतीन इंगा याद मंचीद बातमी नीन इंगोगो राष्ट्रला शेप तुंटान, आदी नीन वान मुंदार फेटत्तीन; पण जो विशेष मानास्नेयद उंड्या वारकी ओकोरला मांडास्तीन; लेद तर, नीन विनाकारण फारतान किंवा फारतीन, इल्ला शायद आतुण्या. पण नाबरोबर उंडीनेळ तीत इड ग्रीक उंड्या आंका, वांकी पण सुंता शेशी तीस्कूनदेंग भाग शेयदेंग दाल्या. इंगा गुप्तता नोनिक एकोचीनेय खोटा बंधूल कसरोम पण भाग केळपीदेंग दाल्या; वार मंलान गुलाम गिरीला येदेंग, ख्रिस्त येशु न दीतटला याद मोकळीक पना मनाक उंडाद आदी हेराशांदाणक, दोनगा शेशी नोनिक वचीनीर. मंची बातमीद खरेंम मी तीकुड उन्डाला दानचांग मिम वारणी रवा भी वेळ वार शेतला एयाक होतीम. तरीपण, यवार विशेष मानास्नेर यवारना उंडीर वार तीकेल (वार येल्लापन उंडदूर दांदी नाक येमी लेद; द्यावर या मंशीद बी पक्षपात शयाड.) येनटीक की यवार विशेष मानासनेर उंडीर वार नाक एमी जास्त इयालेद. तर उलटा सुंता आईनेर येहुदिलकी मंची बातमी शप्काम यला पत्रस मिंदा इळशिन्या आल्ले सुंता कालेर इंगोगो राष्ट्र मंदीक मंची बातमी शपकाम नामिंदा सोपाशिनेद उंडाद, इदी वार सुशीर. येनटीक की यवार पत्रस देगारकेल सुंता आईनेर मंदी प्रेशीद पना चाला मत्तीदेंग ताकत पुरामत्या वाळ नाक पण इंगोगो राष्ट्रला वाळ नळपिदेंग ताकत पुरामत्या. इंगा वाळ नाक इचीनेय कृपाद दान ओळखाशी, याकोब, केफा इंगा योहान इर जो आधर इचेटोर उंडीर वार नाक इंगा बर्णबान मंची शेईता संगती शेश्या, इदी दिनकस्रोम की, मनाम द्यावार फनीला सहभागी उन्डाम इदी सुपियाला इंगा मिम इंगोगो राष्ट्र तीकुड इंगा वार सुंता आईनेर तीकुद फोवाला. मिम फक्त गरीबोर दी आठवण फेटाला, इल्ला वारदी इच्छा उंड्या; नीन तर आइ माटाल्लाचंग उत्साहित उंटीन.

केफाद (पेत्राद) निषेध

इंगा दान बाद, केफा अनत्युखीयास वची नेन्का, नीन वान मुंदार वांकी आडाम वस्तीन, येनटीक की वाळ दोषी उंड्या. येनटीक की याकोबदेगार नुस यंता मंदी वचेळ पहिला वाळ इंगोगो मंदी बरोबर तिनु पण वाळ वचीनेका वाळ सुंता आईनेर मंदीक आद्री वाळ यंकाक आय्यी वेगळा नीलदू. आपुळ आल्ले दुसरा येहुदील विश्वास फेटेतोर पण वान सोबत ढोंग शेशीर; दानचांग बर्नबापण वार ढोंगता प्रभावित आय्या. पण नीन येपूळ इदी सुस्तीन की, मंची बातमी खरेंम लेका आदी बरोबर नळाद, आप्पुड नीन आंदार मुंदार नीन केफान आनटीन, “नु स्व:ता यहुदी उंडी नु जर इंगोगो राष्ट्र लेका उंटाव इंगा येहुदील लेका निलवाव, तर यवार इंगोगो राष्ट्र टोर येहुदील लेका वागायला आंका नु वार मिंदा अत्याचार शेस्ताव येम?”

नियम शास्त्रद पूर्ण लेनेद

मिम जन्म केले यहुदी उंडाम, पापी इंगोगो राष्ट्रटोर लेर. तरी मनशिल नियमशास्त्रालोणी फनिलता नीतिमान ठहरार तर येशु ख्रिस्तमिंदा विश्वास द्वारा ठहरास्तार, इदी ओळखाशी मिम पण येशुन मिंदा विश्वास फेटतीम; दिनकस्रोम की, विश्वासता मनशी नीतिमान ठहरादेंग वस्ताद, दानचंग मिम येशु ख्रिस्तानमिंदा विश्वास फेटतिम; आंटे मिम ख्रिस्तामिंदा विश्वास्टोर नीतिमान ठरस्ताड, नियमशास्त्रलोणी फनिल शेया रोद, येनटीक की नियम शास्त्रालोणी फनिलता मनशीजातीपैकी यवार पण नीतिमान ठहरार. पण ख्रिस्तला नीतिमान ठेहरा मत्तीदेंग सुस्तार जर मनामपण पापी काम्पिस्तिं तर ख्रिस्त पापदि सेवक उंडाळ येम? येपुळूच लेद. येनटीक की नीन जे केढपितान मातीनान नान आदी इंगा बना मत्तुतीन तर नीन स्व:ताण नियमशास्त्र मोडाशेटोळ ठेहेराशान. येनटीक की नीन नियमशास्त्र तीकेल नियम शास्त्रकोलोनकेल सची फोईनान, दिनकस्रोम की, नीन द्यावर कसरोम जगायाला. ख्रिस्ताबरोबर क्रूसमिंदा खिळाशिणेळ उंडान इंगा दिन मुंदरा नीन जगास्तान इल्ला लेदत तर ख्रिस्त ना-ना दिन्टला जगास्ताळ इंगा इपूळ ह्रदला जो नाद जगास्काम उंडाद आदी द्यावार कोळकूद विश्वासद्वारे उंडाद. वाळ नामिंदा प्रेम शेश्या इंगा स्वतान ना कसरोम इच्या. नीन द्यावार्दी कृपा व्यर्थ शेयान येनटीक की जर नीतीमत्व नियमशास्त्रतीकेल उंटे त ख्रीस्तानदी सचकाम विनाकारण आय्या.

Waddar. Copyright © Bridge Connectivity Solutions Pvt. Ltd. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.