Zabuli 46

Nguluwi ka hamwe na hetwe

(Kwa yalingwaluchiza kwimba. Lwimbo lwa Wakola. Kwa kiwhana na Alamoti.)

1Nguluwi ndo honhu ha hetwe ha kubilimila na mong'ho wa hetwe,

heye ndo utanzi wa hetwe mazuwa gose mhela wa magazo.

2Ahyo hatudumba choneche,

hanga limachinyhina holilawila na vidunda kugwa mbahali,

3hanga bahali yobuguma na kukabusa

na vidunda hovikakama kwa kukabusa kwake.

4Hana lwanda luwele mazi gake ganguusangalaza muji wa Nguluwi,

honhu helile ha kikala Nguluwi Yawele Kuchanya.

5Nguluwi ka kuli muji awo, nawo hauweza kutigaswa,

Nguluwi koutanza lufuku.

6Wanhu wa isi zeng'ha wangulila kwa kukabuswa,

na ulongozi wangukakama,

Nguluwi kangubuma na isi yangusungulumuka.

7Mkulu Nguluwi Yawele na Mong'ho ka hamwe na hetwe,

Nguluwi wa Yakobo ndo ngome ya hetwe.

8Muye mlole madito ga Mkulu Nguluwi,

mlole vinduzanduza vya kudumbiza vyoyaditile muisi.

9Kangudumya ngondo muisi yeng'ha,

kangubenanga mipinde na migoha,

ngawo kanguzilakaza kwa chiluli.

10Kangulonga, “Mnyamalile na kuvizela kota heni nda Nguluwi.

Ndina ukulu kuli wanhu wa isi zeng'ha,

ndikomya, ndina ukulu muisi.”

11Mkulu Nguluwi Yawele na Mong'ho ka hamwe na hetwe,

Nguluwi wa Yakobo ndo ngome ya hetwe.