Zabuli 14

Wihe wa wanhu

(Kwa yalingwaluchiza kwimba. Zabuli ya Daudi.)

1Wapoka wangilonjelaga mnhumbula,

“Haduhuli Nguluwi.”

Weng'ha nawajilila lukami,

nawadita mbuli za kuzudiza,

haduhuli ne yumwe yalingudita linojile.

2Mkulu Nguluwi kanguwalola wanhu kulawa kilanga,

yalole kota hana yoneche yawele na luhala,

kota hana yoneche yalingumuwinza Nguluwi.

3Ila weng'ha nawali hafungo,

nawajilila hamwe,

haduhu ne yumwe wa hewo yaditile ganojile,

haduhuli ne yumwe.

4Ndaze, hewo weng'ha walingudita wihe wahela nyhala?

Wanguwabunza wanhu chila zuwa,

hambe wandande heni Mkulu Nguluwi.

5Wobatigwa na kukabusa kukulu,

kwa vila Nguluwi ka hamwe na watanganiche.

6Hemwe mlingudita gehile, mwangulemeza majesa ga mzunwa,

ila Mkulu Nguluwi ndo honhu ha heye ha kubilimila.

7Ndangugana ng'hatu ulohozi wa Isilaeli wahafichile kulawa Siyoni.

Mkulu Nguluwi hoyowahilula goya wanhu wa heye,

walelwa wa Yakobo wotowa luchenze,

Waisilaeli wosangalala.