Zabuli 12

Kulanda utanzi

(Kwa yalingwaluchiza kwimba. Kwimba kwa Sheminiti. Zabuli ya Daudi.)

1Ututanze, gwa Mkulu Nguluwi.

Wanhu wanojile nawamala,

wakukundigwa nawajilila hali wanhu.

2Chila yumwe kangumdetelezaga myage,

wangulongaga kwa kudeta na kwa nhumbula ya udesi.

3Gwa Mkulu Nguluwi,

uzidumule azo myango za uhadi,

na ajo milomo jilingidaya lukami.

4Hewo wangulongaga, “Kwa myango za hetwe tosumya,

milomo ja hetwe jina ludali, mkulu wa hetwe ndo whaani?”

5Ila Mkulu Nguluwi kangulonga,

“Kwa vila wazunwa wangubunzwa,

walingugana wangulila kwa usungu,

lelo ndanguya,

nani ndowegalila kikala goya konakwali wokubeteza.”

6Ulonzi wa Mkulu Nguluwi ndo kukomya,

ndo welile kota zahabu yelizwe kuli itanulu,

ena, kota zahabu yelizwe mala saba.

7Kotwamila, gwa Mkulu Nguluwi,

kotuwika kutali mazuwa gose na lulelo alu lwihile.

8Wehile wanguzunguluta chila honhu,

kwajilila kwangutogoligwa hali wanhu.