పవిత్ర్ బైబిల్‍
లూకా 2
యేసు పైద హువాను
(మత్త 1:18-25)
యో ధన్నువ్‍మా ములక్‍ ఆ ఖ్కమా జనాభాను గణ్తీ లిఖ్కావనటేకె రోమాను రాజు హుయోతే ఔగస్తుర్‍ ఏక్ వచన్ దిదో. కురేనియ సిరీయ దేహఃనా ఏలుకరతే ధన్‍మా ఆస్‍ ఫైలీ భార్‍ జనాభను గణ్తి. యినటేకె ప్రతి ఏక్‍జణు జాబితమా నామ్‍ లిఖ్కావనా యూవును సోంత గామ్‍మాగయూ.
యోసేపు దావీదునో జాత్మ ఫైధాహూయోతే యినటేకె యో గలీలయమా నజరేతు కరి ఏక్ క్హాయర్‍మాతు యూదయ దేఖ్‍ఃమను దావీదు ఖాయర్‍మా గయో. యిన బేత్లెహేము కరి బోల్తుతూ. యో వోహాఃత్‍మా యోసేపునా మరియతి హఃగాయి హుయిరైన్‍, బేజిన్‍బి హుయిరీతి జానబ లేక్కాన లిఖ్కావనటేకె లీన్‍ గయో.
యూవునే ఎజ్గా రవ్హాదీన్‍ మరియనా జణావను ధన్‍ ఆయు. యో ఏక్ ఛోగరనా జణీన్‍ యూవనా సత్రంమా జోగోబి నామళమా యో ఛోగరనా లుంగఢతి లప్‍టిన్‍ ఢామ్ఢ్హాని తోట్టిమా క్హాఢయిరాక్యు.
కాపరుల్‍నా దర్షనం
యో దేహ్‍ఃమా థోడు జణు బోకఢ చరవళు యూవునే బోకఢవ్‍నా ఖేతర్‍మా రాత్‍నూ కాపల కరూకర్తుథూ. ప్రభును దూత యూవ్నా కనా ఆయిన్‍ ప్రభును మహిమ యూవ్నా ఆష్పీస్‍ ప్రకాషించమా యూవ్నే గణు ఢరీ గయా.
కాని యో దూత యూవ్నేతి, “ఢరోనకో అద్మీఖారవ్‍నా మోటు ఖుషీహూవను అచ్చువాతే మే తూమ్నా మాలమ్కరావ్‍ కరుస్‍. ఆజస్‍ దావీదు క్హాయర్‍మా భచవవాళో తూమార టేకె పైధాహూయిరూస్‍. యోస్‍ అప్నో ప్రభుహూయోతే క్రీస్తు. యో తూమ్నా ఏక్ క్హాణత్‍ బోలుస్‍. డాంఢోని తొట్టిమా ఏక్ లఢూకు ధోళు లుంగఢుమా లఫ్‍టైన్‍ క్హుతోర్హవానూ తూమే దేక్చు” కరి బోల్యు.
తేదెస్‍ పరలోకంమతూ గ్హణు దేవదూతల్‍బి దెఖైయిన్‍ యో దేవదూతతి మలీన్‍ దేవ్నా స్తుతి స్తుహూయిన్‍ ఆమ్‍ బోల్యు.
“మహోన్నత జోగొమా ఛాతే దేవ్నా మహిమబి, ఇనా ఇష్టంహుయుతె జనంనా జమీన్‍ పర్‍ సమాధాన్‍ హూను” కరి దేవ్నా స్తోత్రం కర్యు.
తేదే దేవదూతల్‍ యూవనా మ్హేంధిన్‍ పరలోకంమా చల్‍జావదీన్‍, భోకఢచరవాళు “జరుగ్యుతే వాత్‍నా అప్నా ప్రభు బోల్యొ. బేత్లెహేము జైన్‍ యినదేఖిన్‍ ఆయే” కరి బోల్లీదూ.
యూవునే జల్దీస్‍ ఏజ్గాతూ జైన్‍ మరీయనా యోసేపునా, అజు తొట్టీమా ఖుఢయ్‍రాక్యూతే అఢ్డాని లఢక్వానా దేక్యూ. యో లఢక్వానా దేఖీన్‍, ఇన గురించిన్‍ యూవ్నేతి బోలాయుతే వాతేనా అద్మీక్హారవ్‍తీ బోల్యు. యో భోకఢ ఛరవవాళు బోల్యుతే వాతేనా, క్హామ్జూతే అక్కుజణు హష్యం హూయుగు.
పన్కి మరియ ఆ క్హారూ వాతే దీల్‍మా జతన్‍తీ లఫళ్ళిన్‍ యో వాతేనా గురించిన్‍ సోస్తీర్హహీ. బోకఢచరవవాళు యూవునే ష్యాత్‍ ఖామ్జూకీ, ష్యాత్‍ దేక్యుకీ యోహఃరు దూత బోల్యుతీమ్మస్‍ హూయుకరీన్‍ యోవాత్‍నా గురించిన్‍ వాతే బోల్‍లేతూ హూయిన్‍ దేవ్నా స్తూతిస్తు హూయిన్‍, యిన మహిమకర్తు హూయిన్‍ పాచుఫరీన్‍ చల్యుగు.
యేసున నామ్‍ మ్హేందను
(లూకా 1:59)
యో ఛోగరనా ఆట్‍మనూ ధన్నే సున్నతి కరవాను ధన్‍ ఆయుతేదె, బేజీని హూవన ఆగడీస్‍ దేవదూత యేసు కరి నామ్‍ మ్హేంధో కరి బోల్యుతిమ్మస్‍ యోస్‍ నామ్‍ మ్హేందు.
మోషే ధర్మషాస్త్రంమా కిమ్ఛాకీ ఇం మరయబి యోసేపు యూవునే పరీసుద్ద హూవనూ ధన్‍ హూయిజావదీన్‍, యూవునే యో ఛోగర్వాన ప్రభునా ఆర్పించనటేకె యోరుషలేమ్‍నా గయు. ప్రభునూ ధర్మషాస్త్రంమా లీఖ్యుతిం. సాత్‍కాతో ఫైలేటు ఛోగరనా ప్రభువ్నా పవిత్రుకరి బోల్ను. అజు ప్రభునూ ధర్మషాస్త్రంమా బోల్యుతీమ్‍; ఇవ్నే బే పర్యావొనాహో, బే హీలోయ్‍నాహో, జైన్‍ బలి దేనూకరీ ఇవ్నే ఇనా యెరూషలేమ్‍ బులైలిగయు.
యేసున సమార్పణ్‍ కరను
అజ్గ యేరూషలేంమా సుమాయోను కరి ఏక్ అధ్మీ ర్హాస్‍. యో భక్తీతీ నీతి మంతతి భక్తీమా భరైన్‍, ఇష్రాయేల్‍నా దేవ్‍ కేదె బఛ్చావుషే కరి కావల్‍ కాసీలీన్‍ ర్హతుథూ. ఇనావుఫర్‍ పవిత్రాత్మ థూ. యో ప్రభు హూయోతే క్రీస్తునా ధేఖాతోడీ మర్‍సేకోయిని కరి పవిత్రాత్మ యిన మాలంకరాయో. పవిత్రాత్మ యినా ఉపర్‍ ఆవమా యో మందిరంమా గయో. మరియబి, యోసేపు యోస్‍ సమయంమా ధర్మషాస్త్రం బోల్యుతిం కరనాటేకె లఢక్వానా బులాలిన్‍ ఎజ్గా ఆయూ. సుమెయోను యో లఢక్వానా ధేఖీన్‍, ఇన హతేతీ పళ్లీన్‍ దేవ్నా ఆంబోలిన్‍ స్తుతించనా సురుకర్యో
ప్రభూ తారు వాత్‍ ప్రకార్‍ తార సేవ కరుకరూతే
మన షాంతీతి జావదేంగ్రస్‍.
ష్యానకతో తూ హమారటేకె బోలిమోకల్యోతే రక్చణనా మార ఢోలాతీ ధేక్యో.
తూ యిన లోకంమా ఛాతే
అన్యుల్‍నా అక్కవ్‍నా హాఃమే యెంచ్యో.
అన్యుల్‍నా ఏక్ ఉజళునుతరబి,
అజు తారు ఇష్రాయేల్‍నా మహిమనితర.
యేసునూ ఆయా భా సుమెయోన్‍ బోల్యోతే వాత్‍నా ఖామ్జిన్‍ ఆష్చర్యపఢు. యినబాద్‍మా యూవునా సుమాయోను ఆషీర్వదించిన్‍ యేసుని ఆయాతీ ఆంబోల్యో, క్హారవ్‍ను దీల్‍నూ సోచ్‍ భాదర్‍ ఫడాఖార్‍కు “ఆ లఢక్వానా టేకె కేత్రూకీ ఇష్రాయేలిలు గణు అభివ్రుద్ది హూసే అజు కెత్రూకిజణు పఢీజావనా కారణ్‍నా ఆలఢుకు ఏక్ చిహ్నం. బుజు ఏక్ ఛరీ తారు దిల్మామా టోఛవ్‍సే.”
యో మందిరంమా, “అన్న” కరి ఏక్ ప్రవక్తీ తీ. యో పనూయేలుని ఛోరీ, ఆషేరు జాత్‍ని. య్హా హూయిన్‍ ఖాత్‍ వరఖ్‍ఃమా భావూరీ కోయిన్‍తిమ్ హూయిగి. తెదె యిన ఛారుఫర్‍ ఛారీఖ్‍ః వరఖ్‍ః. యో మందిరం నా మ్హెందీన్‍ భాధర్‍ జైబి కోయిని. కేదెబి ప్రార్దన, ఉపాస్‍ కర్తీ ర్హతీతి. మరియబి, యోసేపు ఏజ్గా రావానూటేమ్పర్‍ యో అవ్‍ణకన ఆయిన్‍, దేవ్నా మహిమ కరీన్‍, ఛుట్‍కార్‍ హూవనాటేకె దేక్హూకరతే యూవనా ఖ్హారనా, యో లఢక్వానూ వాతే బోలి.
నజరేత్‍న ఫరీన్‍ ఆవను
యత్రమా మరియ, యేసేపు ప్రభు ధర్మషాస్త్రం బోలాతిం కరీన్‍ హూయిజావదీన్‍, యూవ్నే యూవ్నూ గలీలయమానూ నజరేతునా గామ్నా ఫాచు ఫరీన్‍ చలిగయు. యో ఛొగ్రు మోటొహుయిన్‍ అఖ్కాల్తీ, కువ్వాత్ లేతొర్హయో, దేవ్ను కృప ఇనఫర్‍ ర్హయూ.
యేసు యెరూషలేమ్‍మా యాత్ర
యూవునే పస్కాపండగనా ఇన ఆయ, భా హార్‍ వరహ్‍ఃనా యెరూషలేమ్‍నా జాతుర్హాస్‍. యినటేకె యూవునే యేసునా బ్హార వరఖ్మా యో పండగ కరానా ఖాజె అధాత్‍ ప్రకార్‍ యెరూషలేమ్‍నా గయు. ఏజ్గా పండగ హూయిజావదిన్‍ యూవునే పాచు ఫరీన్‍ యూవునూ గామ్‍మా ఛల్‍జౌంగ్రతో, యేసు యెరూషలెమా ఏజ్గాస్‍ రైగో. కానీ యో వాత్‍ యిని ఆయా భానా మాలంకోహూయిని. యూవునే అప్నా అద్మీయే మాస్‍ ఛాకరీ లహిజైన్‍ ఏక్ ధన్‍ని పయనంతోడీ ఛలీగూ. యూవనమా కోయిని కరి మాలంహూవమా, యూవునూ అద్మీయేమా, దోస్తుల్‍మా ఢూండు.
యూవ్నాకనాబీ నాదేఖావమా అజు పాచూ ఫరీన్‍ యెరూషలేమ్‍నా గయు. తీన్‍ రోజ్‍ ఢూంఢమా యో మందిర్‍మా దేఖాయో. యో ఏజ్గా దేవ్‍నూ వాతే బోల్‍దేంగ్రతే యూవనా ఇచ్మా భేసీన్‍ యూవ్‍ని వాతే ఖామ్జూతోహూయిన్‍, యూవ్నా పాచు ప్రష్నల్‍ పుఛావ్‍తూహూయిన్‍ థో. యిని వాతేనా క్హామ్జీన్‍ ఇనూ ఛాతుర్నా దేఖిన్‍, అక్కుజనూ అష్చర్యం హూయుగు.
ఇని ఆయా భా యిన దేఖిన్‍ గణు హాషంహూయిన్‍, ఇని ఆయా ఛియ్యా హామ్నా ఆం ష్యాన కర్యో లా? మేబి, తార భా దిగుల్‍ పడీన్‍ ఖారీ జోగో ఢూండ్యా! కరి బోలమా,
యో “తూమే షాన మన ఢూండుకరాస్‍. మే మారు భాను ఘేర్మా ర్హనూ కరి తూమ్నా మాలంకోయిన్‍నా?” కరి యూవ్నేతి బోల్యొ. యో బోల్యొతే వాతే యువ్నా అర్థమ్ కోహూయిని.
ఇన బాద్‍మా యో యిని ఆయా భాన కేడె నజరేతునా ఛల్‍జైయిన్‍ యూవ్నా లోబడి ర్హయో. కాని యిని ఆయా జరుగుకరతే కరు దీల్‍మా గల్లీన్‍ సోస్తిరహీ. యేసు అఖ్కల్‍మా, ఉంబర్‍మా, దేవ్ను కృపమా, అద్మీయేనూ కృపమా బడ్తొహుయీన్‍ మోటొహూయో.
పవిత్ర్ బైబిల్‍. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.