Vagiri Vathe Bible
ఆది 12
దేవ్ అబ్రామ్న బులవను
యెహోవా అబ్రామ్‍తి అమ్ బోల్యో. “తారు దేహ్ః మాతు , తారు మాయమాత్ర కంతు, తారో భా ఘేర్మామాతు నికిలిన్‍, మే తునా దేఖాడ్యుతే దేహ్ఃమా జా. తునా ఏక్ మోటో జనభోతార కరిన్‍, తునా ఆషీర్వదించిన్‍, తారు నామ్‍నా భడ్డాయిస్‍. థూ ఆషీర్వతర ర్హాహిస్‍. తునా ఆషీర్వదించతే ఇవ్నా మే ఆషీర్వదించిస్‍. తునా గాలయ్‍ దేవ్వాలనా షపించిస్‍. జమీన్‍ఫర్‍ ఛాతే ఖాందన్‍ హాఃరు తారేతిస్ ఆషీర్వదమ్‍ హుస్‍.” యెహోవా ఇనా బోల్యోతిమ్‍ అబ్రామ్ కర్యో. ఇనాకేడె లోతుబి కెడే ఆయో. హారాను కంతు నికిల్యాతెదే అబ్రామ్ ఉంబర్‍ పాచ్‍ పర్‍ హాఃడితిన్‍ ఈహ్‍ః వరహ్ః. అబ్రామ్ ఇని బావణ్‍ షారయినా, ఇను భైయ్‍ను ఛియో లోతునా, హారాను దేహ్ః యో, ఇనా వాల, జామకర్యాతె ఆస్తి హాఃరనా, ఇవ్ను సంపాదనా హఃరు లీలిన్‍ కనానా కరి దేహ్ఃమా ఆయో, తెదే అబ్రామ్ యో జోగొమాతో షెకెముమా ఛాతే ఏక్ గామ్మా అయిన్‍ మోరే గామ్మా సింధూర్‍ ఝాడ్‍కన గయో. తెదేమా యో జోగోమా కనానీయుల్‍ ర్హాయాత. యెహోవా అబ్రామ్‍తి “తారు వారసుల్‍నా ఆ దేహ్‍ఃనా దీస్‍” కరి బోల్యో. ఏజ్గా యో యెహోవానా బలిఠమ్ భంద్యో. యో ఏజ్గాతు నికిలిన్‍ బేతేల్నా ఓంద్యే బణే ఛాతే ఫ్డాడ్ కన ఆయో. ఉపర్‍గాట్ బణే ఛాతే బేతేల్న, ఓంద్యేనా ఛాతే హాయికి ఇచ్మా డేర న్హాకిన్‍ ఏజ్గా యెహోవానా బలిఫీఠమ్ దిదో, యెహోవా నామ్‍ ఫర్‍ ప్రార్ధనా కర్యో. అబ్రామ్ అజు ప్రయాణమ్‍ కర్తో మరణ్‍పక్తి బణే గాయో.
ఐగుప్తుమా అబ్రామ్
తెదే యో దేహ్ఃమా ఖాల్ ఆయు. యో దేహ్ఃమా కరవు ర్హావమా అబ్రామ్ ఐగుప్తు దేహ్ఃమా జీవనటేకె ఏజ్గా గాయో. యో ఐగుప్తుమా జావ్వకొయినితె అగాడి యో ఇని బావణ్‍ హుయుతే షారయితి హాదేక్‍ తూ కుప్సురాత్ వాలి కరి మన మాలమ్‍. ఐగుప్తీవాల తునా దేఖిన్‍ యో ఇను బావణ్‍ కరి బోలిన్‍ మన మర్రాఖిన్‍ తునా జీవదీసే. తారు వల్ల మేల్‍హునటేకె తునా బట్టి మే జీవతిమ్‍ తూ మారు బేన్ కరి బోల్‍. అబ్రామ్ ఐగుప్తుమా గాయో తెదే ఐగుప్తీవాల యో బాయికా ఘాను కుప్సురాత్ రవను దేక్యా. ఫరోను అధిపతుల్‍ ఇనా దేక్యిన్‍ ఫరోన హాఃమే ఇనా హాఃరయా అనటేకె యో బాయికోనా ఫరోను ఘేర్మా లీన్‍గాయా. యో ఇనా బట్టిన్‍ అబ్రామ్ మేల్‍ కర్యో; ఆనటేకె ఇను మేంఢా ధండా ఫార్కో గాదేడో దాసుల్‍ కామ్‍కరవాలి టైండా గాదేడో ఉట్‍ దిదో. హుయుతో యెహోవా అబ్రామ్ బావణ్‍ హుయితె షారయిన్‍ బట్టిన్‍ ఫరోనా ఇను ఘేర్‍వాలో రోగ్తి ఘాణు బాధంచో. తెదే ఫరో అబ్రామ్ బులయిన్‍ తూ మన కర్యోతే సాత్‍? యో తారి బావణ్‍ కరి మన సాన బోల్యోకొయిని? ఆ మారి బేన్ కరి కింబోల్యో? మే ఇనా మారు బావణ్‍ కర్యోవోత్తో సాత్‍ హుయోత్కి, హాదేక్‍ తారి బావణ్‍; అనా లీన్‍జా కరి బోల్యో. అజు ఫరో ఇని బావణ్‍ విషయంహుయిన్‍ ఇను ప్రజాల్‍ బోల్యో. ఇనా ఇని బావణ్‍ ఇనా హుయుతే హాఃరు బోలిమొక్లిదో.
Vagiri Vathe Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.