Vagiri Vathe Bible
ఆది 11
బాబెల్న గోపురమ్
తెదే జమీన్‍ ఫర్‍ హాఃరు ఎక్కస్‍ భాషబీ ఎక్కస్‍ వాత్ థూ. ఇవ్నే ఓంద్యేనా గాయు తెదే షీనారు1 జోగొమా ఇవ్నా ఏక్‍ బల్డో దేఖయు. ఇవ్నే ఏజ్గా ర్హాహిగా. ఇవ్నే ఏక్తి ఏక్‍ “అప్నే రిటే కరిన్‍, అష్యాల్తి బలియే ఆవో” కరి వాత్ బొలిదా. ఫత్రాను బదుల్‍ రిటే, లఘనటేకె ఢామర్‍ ఇవ్నా హాఃదే ఛా. ఇవ్నే “అప్ను జమీన్‍ హాఃరు చెదరకొయిన్తిం ర్హావనుతిం ఏక్‍ హాఃయార్‍నా, ఆకాష్‍నా లగాతిం ఎత్రె ఊచ్చు ఛాతే ఏక్‍ గోపురమ్ బందిలిన్‍ నామ్‍ కామలియే ఆవో” కరి వాత్ బోలిదు. యెహోవా ఆదాము ఖాందన్ భంద్యుతె హాఃయర్న, గోపురంన, దేఖాన ఉత్రిన్ ఆవ్సే. యెహోవా “హాదేక్, ఏకస్ భాష ఛాతే ఆ అద్మియే కామ్‍ కరను సురుకర్యు అజు అగాడి ఇవ్నే కర్నుకరి కేవు కామ్‍హుయితోబి ఇవ్నాకర్లిస్. అనటేకె అప్నే హేట్‍ జాయిన్‍, ఇవ్నామా ఏక్ను వాత్ ఏక్తి మాలంకోయిన్తిం ఏజ్గాను భాషనా బద్లయిదియే ఆవో” ర్హాహిగో. ఇంనితార యెహోవా ఇవ్నే ఏజ్గాతు జమీన్‍ హాఃరు చెదిరిజావ్వానుతిం కర్యో. యో హాఃయార్‍ బందాను ఉబ్రిగు. అనటేకె ఇనా బాబెల్‍ కరి నామ్‍ మేంద్యు. సానకాతో, ఏజ్గా యెహోవా జమీన్‍ పర్‍ ఛాతే జనాబో హాఃరు భాషనా బద్లాయిదిదో. ఏజ్గాతు యెహోవా ఇవ్నా జమీన్‍ పర్‍ ఘాను జోగో చెదరగొట్యో.
షేము ఖాందన్
(1:24-27)
షేము ఖాందన్ ఆస్. షేమునా హోః వరహ్ః ఉంబర్మా, వరదను బద్మా బే వరహ్ఃన అర్పక్చదు పెద్యో. షేమునా అర్పక్చదు పేదయాతే బాద్మా అజు ఇనా ఛియ్యా, ఛోరియే పేద్యా. యో పాచ్‍ వరహ్ః జీవ్యో. అర్పక్చదునా పాచ్‍ ఉపార్ డోడిఈహ్‍ః ఉంబర్‍పార్‍ షేలహు పేదహుయో. అర్పక్చదునా షేలహు పేద్యోతే బద్మా ఇనా ఛియ్యా, ఛోరియే పేదహుయో. యో ఛార్‍ హోః వరహ్ః తీన్‍ వరహ్ః జీవ్యో. షేలహునా డోడిఈహ్‍ః వరహ్ఃమా ఏబెరు పేద్యో. షేలహునా ఏబెరు పేదయోతె బద్మా అజు ఇనా ఛియ్యా, ఛోరియే పేదయే. యో ఛార్‍ హోః తీన్‍ వరహ్ః జీవ్యో. ఏబెరునా ఛార్‍ ఉపార్ డోడి ఈహ్ః వరహ్ఃమా పెలెగు పేదయో. ఏబెరునా పెలెగు పేద్యోతె బద్మా అజు ఇనా ఛియ్యా, ఛోరియే పేదయే. యో ఛార్‍ హోః డోడి ఈహ్ః వరహ్ః జీవ్యో. పెలెగునా డోడి ఈహ్ః వరహ్ః ఉంబర్మా రయూ పేదయో. పెలెగునా రయూ పేదయోతె బాద్మా అజు ఇనా ఛియ్యా, ఛోరియే పేదయే. యో బే హోః నావ్‍ వరహ్ః జీవ్యో. రయూ బే పర్‍ డోడి ఈహ్ః వరహ్ఃమా సెరూగు పేదయో. రయూనా సెరూగు పేద్యాతే బాద్మా అజు ఇనా ఛియ్యా, ఛోరియే పేద్యే. యో బే హోః హాఃత్‍ వరహ్ః జీవ్యో. సెరూగునా డోడి ఈహ్ః వరహ్ఃమా నాహోరు పేదయో. సెరూగునా నాహోరు పేద్యోతె బాద్మా అజు ఇనా ఛియ్యా, ఛోరియే పేదయే, యో బే హోః వరహ్ః జీవ్యో. నాహోరునా ఏక్‍ పర్‍ డోడి ఈహ్ః వరహ్ఃమా తెరహు పేదయో. నాహోరునా తెరహు పేదయోతే బాద్మా అజు ఇనా ఛియ్యా, ఛోరియే పేద్యే. యో ఏక్‍ హోః ఏక్‍హాఃమి ఈహ్ః వరహ్ః జీవ్యో.
తెరహు ఖాందన్
తెరహు హాఃడితిన్‍ ఈహ్ః వరహ్ఃమా అబ్రామ్, నాహోరు, హారానుల్‍ పేదయా. తెరహు ఖాందన్ ఆస్ తెరహునా అబ్రామ్, నాహోరు, హారానుల్‍ పేద్యా హారానునా లోతు పేదయో. హారాను, యో పేదయోతే జోగొమా ఊరు కరి కల్దీయుల్‍ హాఃయర్‍మా ఇనో భా తెరహు కన ఆగాడిస్‍ మరిగో. అబ్రామ్ అజు నాహోరు య్హాయే కర్లిదా. అబ్రామ్ బావణ్ షారయు. నాహోరు బావణ్ నామ్‍ మిల్కా. యో మిల్కా, ఇస్కాక్నా భా హుయోతే హారాను ఛోరి. షారయు వాంజిణి2 థి, ఇనా లడ్కా కొయిని. తెరహు ఇనా ఛియ్యో అబ్రామ్‍నా, ఇను నాత్యో, హారాను ఛియ్యా లోతున, ఇను ఛియ్యోహుయుతె అబ్రామ్ బావణ్ హుయుతె షారయికరి ఇను ఓవ్‍నా లీలిన్ కనానున జావ్వనటేకె కల్దీయుల్‍ ఊర్ కరి హాఃయార్మా మాతు ఇవ్నా కెడే జైయిన్‍ హారాను తోడి ఆయిన్‍ ఏజ్గా ర్హాహిన్‍ థా. తెరహు బే హోః పాచ్‍ వరహ్ః జీవిన్‍, తెరహు హారానుమా మరిగో.
Source notes (2)
- Footnote షీనార్కి లీఖ్యురాక్యుతె జోగోమా బాబెల్నో కరి బోలజాయ్
- Footnote వాంజిణి కతో గోడ్రాల్ కరి అర్ధమ్
Vagiri Vathe Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.