Vagiri Vathe Bible
అపొ 26
పౌలు అగ్రిప్పనా హాఃమె ఇనబారెబా వాతె బోలను
అగ్రిప్ప పౌలు మ్హణీ దేఖీన్ తారు బాజు బోలిలేవాన తునా ఆవకాష్ ఛా కరి బోల్యొ. తెదె పౌలు హాత్ పాడీన్ అమ్ బోలనిక్యో.
ఇనటేకె యూదుల్ మారఫర్ నాఖ్యూతే ఇంజామ్ హాఃరవ్నా గూర్చీ ఆజ్ తూమార హాఃమే సమాధాన్ బోలుకరూస్తే మే ధన్యుడ్ కరి రైజోంగ్రూస్; అనటేకే మేబి తార ఖామే బొలిలేంకురుస్ తూ యూదుల్మా ఛాతే సమస్త ఆచారాల్ వివాదాల్బి అసేల్తీ మాలంకర్రాక్యోస్ తాల్మిథీ మారు మనవి హాఃమజ్ను కరి వేడుకరూస్.
ఆగడీథూ యెరూషలేమ్మా మారు దేహ్ఃను ఇఛ్మా మారు అఢ్డాని ఫర్థూ మే జీయోతే జీవ్ణు కీమ్నూకీ యూదుల్ హాఃరవ్నా మాలం. ఇవ్నే ఆగడీతూ మన మాలంకర్యు హూయు కాబట్టి సాబుత్ దేవాన యూవ్నా ఇష్టం హూసేతో మే మారు మతంమనూ ఘణుమాలంహుయూహు జాత్నా ప్రకార్ ఛాలీన్, పరిసయ్యుడ్నితర ప్రవర్తించనితర బోల్స్యు. హాంకేహుయుతో దేవ్ అప్నా పితరుల్నా కర్యోతే వాగ్దన్నూ విషయంనూ నీరిక్చణ్నా గూర్చీ మే విమర్షింప బడనా హాఃజే మే భీరీరోస్. అప్ను భార గోత్నూ యూవ్నే విసక్నూ నాతిమ్ ఎక్కస్ రాత్ దేవ్నా హమేషా సేవిస్తూ హూయిన్ యో వాగ్దన్ పోంద్స్యు కరి నిరిక్చించు కరాస్. ఓ రాజో ఆ నిరీక్చణ్నూ విషయంమస్ యూదుల్ మారఫర్ ఇంజామ్ నాఖ్యు రాక్యుస్. దేవ్ మర్యుహుయునా ఉఠాడ్సేతే సంగతి నమ్మనూ కాహే కరి తుమె కిమ్ యేంచుకరాస్?
నజరేయుడ్నో యేసునూ నామ్థీ ధావోతి కెత్రూకి మే కామ్ కర్నూ కరి రైగో. యెరూషలేమ్మా మే ఇమ్మస్ కర్యోథో. మే ప్రధాన యాజకుల్తి అధికార్ లీన్, దేవ్ను అద్మి హాఃరవ్నా చెరసాల్మా నాఖీన్, ఇవ్నా మార్యుతేదె ఒప్పి గయోథో కెత్రూకి చోట్ సభ జోగోమా ఇవ్నా ఢరైన్ ఇవ్నా హాతేస్ దేవ్నా దూషించహాఃర్కు కర్తోథో. జోర్ కరనా దేక్తోథో. బుజు ఇవ్నాఫర్ ఘణు ఛండాల్ వాళో హూయి అలదు హాఃయారేవ్మా జైన్ ఇవ్నాబి హాఃతావ్ కర్యో.
పౌలు బద్లిగయోతె బారెమా బోలను (అపోకా 9:19 అపోకా 22:6,16)
ఇనహాఃజె మే ప్రధాన యాజకుల్నా హాతె అధికార్బి, హూఖం లీన్ ధమస్కునా జౌంకరతో రాజో ధోఫర్ను వోహాఃత్ మార ఆష్పిష్బి మారకేడె అయూతే యూవ్నా ఆష్పిష్ ఆకాష్ థూ సూర్యుడ్నూ తెజస్సుథీబి ఘణూ జమ్కాత్తు ఏక్ ఊజాళు వాట్ఫర్ ఆవానూ దేఖ్యో. హామె హాఃర జమీన్ఫర్ పడీగయాతేదె సౌల్, సౌల్ తూ ష్యాన మన హాఃతావ్ంకరాస్? మునికోలల్నా హాఃమే మారనూ తూనా ఇష్టం కరి హెబ్రీ భాషామా మారేతి బోల్యుతే ఏక్ ఆవాజ్నా హాఃజో, దాండో ఇను బందుతే కల్డినా మార్యుతో దాండానాస్ మార్లగ్సే. తెదె మే, ప్రభు తూ కోన్ కరి పుఛ్చావమా తూ హాఃతావ్ంకరాతే యేసు. పన్కీ, తూ దేఖ్యోతే సంగతి, మే తూనా దేఖాయోతే సంగతి, తూనా పరిచార్ కరావాళో నింతర, సాబుత్నితర నియమించ నాటేకే దేఖైరోస్. తూ వుటీన్ తార గోఢా ఘట్ మ్హెందిన్ హుభర్; మే ఆ ప్రజల్ థీ హో, యూదుల్కాహెతె థీహో తూనా ఖయూ హాని నా హోణుతిమ్ బఛైస్. ఇవ్నే అంధారమథూ ఊజాళమా సైతాన్నూ అధికార్మతూ దేవ్ మ్హణీ ఫరీన్, మారమ విష్వాషంతి పాప్ మాపి, పరిసుద్ధ్ దేవ్ను అద్మిహూయుతే ఇవ్నామా స్వాస్థ్యం పోందనా హాఃజే ఇవ్నా డోలా ఖఢావనాటేకె మే తూనా ఇవ్నా కనా బోలిమొక్లీస్ కరి బోల్యొ.
పౌల్ యోకర్యోతె కామ్నా బోలను
“ఇనహాఃజే అగ్రిప్ప రాజో, ఆకాష్థూ హూయూతే యో దర్షన్నా మే అవిధేయుడ్ నాహూయిన్, ఆగడీ ధమస్కు వాళానా, యెరూషలేమ్మాబి యూదయ దేహ్ఃమాబి, ఇనబాద్మా యూదుల్ కాహేతె, యూవ్నే మారు మనస్సు లీన్ దేవ్ మ్హణీ ఫరీన్ మారుమనస్సునా తగిన్నూ కామ్కర్నూ కరి ప్రచార్ కర్తో ర్హయో. ఆ కారణంతి యూదుల్ హాఃరూ దేవాలయ్మా మన ధరీన్ మర్రాక్ను కరి కోషీష్ కర్యా హూయుతోబి మే దేవ్నూ మదత్ లీన్ ఆజ్ తోడీ భిరోస్; ప్రవక్తల్బి మోషేబి ఆగడీస్ బోల్యుతే కాహేతిమ్ కరీఅజు ఖయూబి నాబోలిన్, అల్పుల్నా ఘనుల్నా సాక్చ్యం దేతోర్హయో. క్రీస్తు మ్హీనత్ పడీన్ మర్యా హూయామా జీవీ ఉఠ్స్యేతే యూవ్నామా ఆగడీహూవమా ఇనహాఃజే ఆ ప్రజల్నా యూదుల్కాహెతెనా ఊజాళు ప్రచుర్ హూసే”
యో ఇమ్ వాతె బోల్తో ర్హవమా ఫేస్తు, పౌలా తూ జాహఃత్ ఫడీన్ పాఘాల్ అద్మి, ఘణూ ఫడాయి కర్యో ఇనహాఃజే తూనా పాఘాల్ ఛడీగుకరీ మోటు ఆవాజ్తి చీక్రీన్ బోల్యొ.
ఇనహఃజే పౌలు అమ్ బోల్యొ, నామ్ గౌరవంహుయోతె ఫేస్తు, మే పాఘాల్ కాహే పన్కి హఃచి అచ్చుబుద్దిథీ వాతేనస్ బోలుకరూస్. రాజోనా ఆవాత్ మలం ఇనహాఃజే మే ఇనహఃమే భీరీన్ వాత్ బోలుకరూస్; ఇనమా ఏక్బి ఇనా మాలంనాహూనూ తిమ్ ధబిర్యూస్ కోయిని కరి మే ఖచ్చితంగా నమ్ముకరుస్; ఆ ఏక్ రహస్యంతి జర్గ్యూతే వాత్ కాహే. అగ్రిప్ప రాజో, తూ ప్రవక్తల్నా నమ్ముకరాస్నా? నమ్ముకరాస్ కరి మన మాలం.
ఇనహాఃజే అగ్రిప్ప, అత్రే సులభంగా మన క్రైస్తవుడ్ నితర మన కర్నూ కరి దేఖూకరాస్ని కరి పౌల్తి బోల్యొ.
ఇనటేకె పౌల్, సులభంథీస్కీ, కారబ్ థీస్కీ తూ మాత్రం కాహే గాని, ఆజ్ మారు వాత్ హాఃజా వాళు హాఃరూబి ఆ బంధక్ మాతు తప్ప మారుతార ర్హవాహాఃర్కూ దేవ్ అనుగ్రహించ్నూ కరి బోల్యొ.
ఎత్రమా రాజోబి అధిపతిబి బెర్నీకేయు యూవ్నేతి భెటు1తే యూవ్నేబి వుటీన్ పార్ జైన్ ఆ అద్మి మరానహో, భందై ర్హవానబిహో ఇనా ఏత్రె ఖాయిబి కోకర్యోని కరి యూవ్నామా యూవ్నే వాత్ బోల్లిదా. ఇనటేకె అగ్రిప్ప ఆ అద్మి రోమరాజొతి హఃమే బోల్లేవ్స్ కరి నా బోల్యుహోత్తో అనా ఛుట్కార కర్యాహోత్ కరి ఫేస్తుతీ బోల్యొ.
Source notes (1)
- Footnote మూలభాషమా బెటుతు
Vagiri Vathe Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.