Vagiri Vathe Bible
అపొ 25
పౌల్‍ చక్రవర్తినా హాఃమె వాతె బోలను
ఫేస్తు యో దేహ్‍ఃనూ అధికార్‍మా ఆయోతే తీన్‍ ధన్నా కైసరయ కంతు యెరూషలేమ్‍నా గయో. తెదె ప్రధానయాజకుల్‍బి యూదుల్‍మా ముఖ్యుల్‍ పౌలు ఫర్‍ యూవ్నే లాయూతే ఫిరాద్‍ని సంగతి పేస్తునా మాలంకరాయు. బుజు వాట్‍ఫర్‍ ఇనా మర్రాక్ను కరి జఫీరిన్‍ ఇనా యెరూషలేమ్‍నా బులైమంగౌ కరి ఇనా గూర్చీ ఫేస్తు కనా బోల్లిదు. ఇనహాఃజే ఫేస్తు, పౌలు కైసరయనూ కావ్లీమా ఛా; మే యగ్గిస్‍ ఏజ్గా జావనూ ఛా. ఇనటేకె తూమారమా నాయుకులు ర్హవాళా మారకేడె ఆయిన్‍ యో అద్మి కనా ఖయు తప్పు రైతోబీ ఇనాఫర్‍ నాఖాజై కరి బోల్యొ.
యో ఏజ్గా ఆట్‍, ధహ్‍ః ధన్‍ యూవ్నా కనా ర్హైన్‍ కైసరయనా జైన్‍ బుజాధన్నే న్యాయ పీఠ్‍ఫర్‍ బేసిన్‍ పౌలునా లీన్‍ ఆవో కరి హూఖం దిదో. పౌలు ఆయో తెదె యెరూషలేమ్‍థూ ఆయూతే యూదుల్‍ ఇనా ఆష్పిష్‍ భరైన్‍, కేత్రెకీ కఠీన్‍ ఇంజామ్‍ ఇనాఫర్‍ నాఖా గాని ఇనా సాబుత్‍ కరనా యూవ్నా హాత్‍కోహుయిని. ఇనహాఃజే పౌలు యూదుల్ను ధర్మషాస్త్రంమా పన్కి, దేవాలయ్‍నూ గూర్చీ పన్కి, రోమా రాజోగూర్చీ పన్కి, మే ఆత్రేబి తప్పు కర్యోకోయిని కరి బోల్యొ.
హుయుతో ఫేస్తు యూదుల్నా హాతె అచ్చో అద్మి కరి బోలైలేనూ కరి యెరూషలేమ్‍నా ఆయిన్‍ ఏజ్గా మార హాఃమే ఆ సంగతుల్‍ నా గూర్చి విచారించిన తూనా ఇష్టమస్నా? కరి పౌలునా పుఛాయో.
ఇనహాఃజే పౌలు కైసర్‍ న్యాయపీఠ్‍న్‍ హాఃమే భిరిరోస్‍; మే విచారించ బడానూ జోగో ఆస్‍, యూదుల్నా మే ఖయు అన్యాయం కర్యో కోయిని కరి తూనా అసేల్తి మాలం. మే అన్యాయం తప్పి మరణ్‍ షిక్చ ఏత్రె ఖయుబి కర్యొహూసేతో మరానాబి హాటీస్‍ కోయిని; ఆవ్నే మారఫర్‍ నాఖూ కరాతే ఇంజామేమా ఖయూబి హాఃఛీ నాహూయుతో మన యూవ్నా అప్పగించనా కినా హాత్‍బి కోహూసేని; రోమరాజొ హాఃమేబి బోల్లీస్‍ కరి బోల్యొ.
తెదె ఫేస్తు ఇనూ సభనూ అద్మీయేతి హూఃజ్‍ కరనా బాద్మా రోమ‍రాజోనా హాఃమే జీయ్యే, కరి బోలోకున్నా రోమరాజో కన జీయ్యే కరి బోల్యొ.
పౌలు అగ్రిప్పా బుజు బెర్నీకేనా హాఃమె లీజావను
థోడధన్నా బాద్మా రాజో హూయోతే అగ్రిప్పబి బెర్నీకేబి ఫేస్తు దేకిన్‍ బోలవాలన హాఃజే కైసరయనా ఆయా. ఇవ్నే ఏజ్గా కెత్రాకీ ధన్‍ ర్హవమా, ఫేస్తు పౌలునూ సంగతి రాజోనా మాలంకరాయో; ష్యాత్‍ కతో ఫేలిక్సు మ్హేంధి చలీగోతే ఏక్ ఖైది ఛా. మే యెరూషలేమ్‍మా ర్హయోతేదె ప్రధాన యాజక్‍బి యూదుల్ను మోట్ట ష్యాణ ఇనాఫర్‍ ల్యాయతే ఫీరాద్‍నా మాలంకరైన్‍ ఇనా షిక్చ నాఖౌనూ కరి వేడిల్దు. ఇనహాఃజే మే ఇంజామ్‍ నాఖ్యో హుయుబి, నఖైహూయోబి ఆయిన్‍ మోఢానా హాఃమే ఇనాఫర్‍ నఖైరూతే ఇంజామ్‍ నా హాఃజే యో సమాధాన్‍ బోలాన అవకాష్‍ దేవాన ఆగడీ ఖయూ అద్మీయేనాబి అప్పగించనూ రోమియుల్‍నా ఆచార్‍ కాహేకరీ ఉత్తర్‍ దిదో. ఇనహాఃజే ఇవ్నే అజ్గ భరైన్‍ ఆయుతేదె మే అలస్యం నాకర్నూ తిమ్‍, బుజా ధన్నే న్యాయ పీఠ్‍ఫర్‍ బేసిన్‍ యో అద్మినా లీన్‍ ఆవో కరి హూఖం దిదో. ఇంజామ్‍ నాఖ్యుతె ఇవ్నే భిరిగు తేదె, మే రైగోతే ఇంజామ్‍మా ఏక్‍బి ఇనాఫర్‍ నాఖ్యుతె ఇవ్నే కాహే. హుయుతో ఇవ్ను మతంనా హాఃజే, మరీగయోతే యేసు కరి ఏక్నా హాఃజే అనేతి ఇవ్నేతి థోడు లఢాయే ర్హవానింతర దేఖాయు. హుయుతో యోయేసు జీవ్తోస్‍ ఛాకరీ పౌలు బోల్యొ. మే ఇమ్నూ వాదనల్‍నా కిమ్‍ విచారించ్నూకీ కాయిబి తోచవకోయిన్తే, యెరూషలేమ్‍నా జైన్‍ ఏజ్గా ఆనా హాఃజే విమర్షించనా పౌలు ఇష్ట పడాస్‍షీకీ కరి పుఛాయో థో. హుయుతో పౌలు, చక్రవర్తి విమర్షనినా ఇనా భిరకాణ్నూ కరి బోల్లేవమా మే ఇనా రోమరాజో కనా బోలీమొక్‍లా తోడి హుభర్కును కరి ఆజ్1ఞ దిదో కరి బోల్యొ మానవి కర్లిదో.
ఇనటేకె అగ్రిప్ప యో అద్మి బోల్‍స్యేతే మేబి హాఃజ్నుకరీ ఫేస్తుథీ బోలమా యో కాల్‍ హాఃజాజై కరి బోల్యొ.
ఇనహాఃజే బుజాధన్నే అగ్రిప్పబి బెర్నీకేయు ఘణు ఆడంబర్‍తీ ఆయిన్‍, సైనికుల్నా అధికారి తి హాఃయార్‍నూ ప్రముఖుల్తీ మోట్టో సభ ఘార్ జవాను బాద్మా ఫేస్తు హూఖం దేవామా పౌలునా బులైమంగయా. తెదె ఫేస్తు, అగ్రిప్ప రాజా ఆజ్గా హామారేతీ ఛాతే హాఃరూ జణా, తుమె ఆ అద్మినా దేఖూకరాస్‍. యెరూషలేమ్‍మాబి అజ్గాబి యూదుల్‍ హాఃరు ఆ అజు నాజివ్నుకరి అధికార్‍ కోయిని కరి కైఖార్‍ మ్హేన్‍థూ హుయిన్‍ ఇనాఫర్‍ మారేతి మనవి కర్‍లిదు. ఆ మరణ్‍నా తగిన్‍నూ ఖయూబి కర్యుకోయిని కరి మే మాలంకరీన్‍, ఆ జారొనా హాఃమే బోలిస్కరీ బోలమా ఇనా బొలిమొకల్‍నూ కరి రైగో. ఆనా గూర్చీ అప్నో యేలినా వాడ్‍నా లిఖ్కానా కాయిబి దేఖాయు కోయిని ఇనహాఃజే విచారించదీన్‍ లిఖ్కానా ష్యాత్‍బి మన మళ్‍సే కరి తూమార హాఃమేబి, అగ్రిప్ప రాజో, ముఖ్యం తూమార హాఃమేబి, ఆనా బులైమంగై రాక్యోస్‍. ఖైదినా ఫర్‍ నాఖ్యూతే ఇంజామ్‍నా నావివరించ్ను తిమ్‍ ఇనా బోలిమొక్‍లాను అసేల్‍ కాహే కరి మన తోచుకరాస్‍ కరి బోల్యు.
Source notes (1)
- Footnote హూకుమ్‍
Vagiri Vathe Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.