Vagiri Vathe Bible
అపొ 14
ఈకోనియామ హూయుతే ష్యాత్‍ కతో, యూవ్నే హఃరూ మలిన్‍, యూదుల్ను సమాజమందిరంమా జైన్‍ ఖూల్లా కరీన్‍ బోధించమా, హఃరుజణు యూదుల్‍బి, గ్రీసు యూదుల్ కాహెతె దేహ్‍ఃవాళుబి విస్వసించ్యు. హుయుతో దేవ్‍తి ఢరకోయినితే యూదుల్ అన్యాజనుల్‍నా ఉషి కరైన్‍ ఇవ్నా దిల్‍మా భైయ్యేఫర్‍ ధావోనా ఫైదాకర్యు. ఇనహఃజే యూవ్నే ప్రభునా అనిలీన్‍, హిమ్మత్‍తి వాతె బోల్తుహుయిన్‍ ఏజ్గా ఘణా ధన్‍ ర్హయా. ప్రభు యూవ్నా హాతె సూచక క్రియాల్నా అధ్బుతాల్నా కరనా తాఖాతి దిదో, ఆమ్‍నితర ఇను గూర్చీ సాబుత్‍ దేతొ ర్హయో. యో హఃయర్నూ ప్రజల్మా విభేధాల్‍ హూవమా థోడు జణు యూదుల్‍మ్హణి, థోడు జణు అపొస్తుల్‍ మ్హణి ర్హయూ.
బుజు అన్యుల్‍బి, యూదుల్‍బి యూవ్నా అధికారుల్‍థీ మలిన్‍, అపోస్తుల్‍నా ఇజ్జాత్‍ కాడీన్, ఫత్రావ్‍తీ మారీన్ మర్రాక్నుకరీ దేఖ్యు. ఇవ్నే ఆ వాత్ మాలంకరీన్‍ లుకయమానూ హఃయార్‍మా లుస్త్రనా, దెర్బేనా అస్పీస్‍ ఛాతె ఇలాఖోవ్‍నా మిలైలిన్‍, ఏజ్గా సువార్త ప్రచార్‍కర్తోథొ.
లుస్ర్తా బుజు దెర్బె
యో ఫైధావహ్‍ఃతూస్‍ ఛాలకోయింతే లంగ్డు హుయిన్‍ కంజోర్నూ గోఢాను ఏక్ జణు లుస్త్రామా థూ. తెదె పౌలు వాఇనా ఠర్కీన్‍ దేఖిన్‍, హూఃదోహువానా ఇనా విష్వాష్‍ ఛాకరీ మాలంకరీన్‍, తార గోఢా జమీన్‍ఫర్‍ మ్హేందీన్‍ హఃఢక్‍ వుభార్‍ కరి ఘట్‍ బోలమా యో కూథో హుయిన్‍ వుటీన్‍ చాలనిక్యో.
జనాల్‍ హఃరు పౌలు కర్యోతె ఇనా దేఖిన్‍, దెవతల్‍ అద్మీయేనూరూప్‍మా ఆప్నాకనా వుత్రీఆయి ర్హాస్‍ కరి కైఖార్‍ మ్హేందిన్‍, బర్నబానా ద్యుపతి కరిబీ, పౌలు ముఖ్య ప్రసంగీ హుయిర్హవమా ఇనా హేర్మే కరీన్‍ నామ్‍ మ్హేంద్యా. హఃయర్నా హఃమే ఛాతే ద్యపతినూ పూజారీ ఢాండవ్‍నా పూల్‍నూ మాళవ్‍నా వాట్‍కనా లీన్‍ ఆయిన్‍, గల్లోవ్తి మలీన్‍, బలి దేనూ కరి థూ.
అపొస్తుల్‍ హుయాతే బర్నబాబి, పౌలు ఆ వాత్ హఃమ్‍జీన్‍, యూవ్న లుంగఢా ఫళ్ళీన్‍ అద్మీయేను గల్లావ్‍మా పేషీన్‍, హాఃయాప్‍ వో తుమె హాఃరూ ష్యాన అమ్‍ కరుకరాస్‍? హామేబి తూమారిన్‍ జోణ్‍నస్‍ అద్మీయే. తుమె ఆ బేకార్నూ హాఃరూ మ్హేందీన్‍, ఆకాష్‍నా జమీన్‍నా ధర్యావ్‍, ఇనమానూ సమస్తంనా బణాయోతే జీవంనో దేవ్‍మ్హణీ పర్నూకరీ హామే తుమ్నా ఆ సువార్తనా ప్రచార్‍ కరూకరుయేస్‍. యో పాషళ్‍నూ కాలంమా సమస్త ప్రజల్‍నా ఇవ్నూ యూవ్నూ వాట్‍ఫర్‍ చాలాదిదో. హూయితోబి యో ఆకాష్‍థూ తూమ్నా వరహాఃత్‍నా, ఫల్‍ దేవానూ రుతుల్‍నా, దేతోహూయిన్‍, ఖాణు దేతోహుయిన్‍, హూఃషీథీ తూమారు దిల్‍నా భర్తూహూయిన్‍, అషల్ కరన హాఃజే ఇనా గూర్చి సాబుత్‍ కోయింతే కర్యాకోయిని కరి ఘట్‍ చిక్రీన్‍ బోల్యు. ఇవ్నే ఆం బోలిన్‍ ఇనా బలి దేనూనా తిమ్‍ అద్మీయేనా రూకావనూ ఘనూ కోషీష్‍ హూయు.
పిసిదియమాఛాతె అంతియొకయతూ ధరీన్‍, ఈకోనియథూబి యూదుల్ ఆయిన్‍, అద్మీయే హాఃరవ్‍నా యూవ్నా మ్హణి కర్లీన్‍, పౌలునా ఫత్రావ్‍థీ మారీన్, తెదె యో మరిగయోకరీ ఇనా హాఃయార్‍నా భార్‍ లీయిన్‍ ఖేఛీన్‍ మ్హేంద్యూదు ఆ హుయుతో సిష్యుల్‍ ఇనా ఆష్పిష్‍ భరైజవమా యో వుటిన్‍ హాఃయార్‍మా జైన్‍ బుజా ధన్నే బర్నబాతి మలిన్‍ దెర్బేనా నిక్లీగయా.
సిరియామా ఛాతె అంతియొకయనా పాచు ఫరీన్‍ ఆవను
భర్నబా పౌలు హఃయార్‍మా సువార్త ప్రచార్‍ కరీన్‍, కెత్రాకీ జణానా సిష్యుల్‍నితర కరనూ బాద్‍మా, లుస్త్రనా, ఈకోనియానా, పిసిదియమా ఛాతె అంతియొకయనా ఫరీన్‍ ఆయా. సిష్యుల్‍నూ మన్‍నా ఘట్‍ కరీన్‍, విస్వాసంమా నిలకడ్‍గా ర్హనూ కరి, కెత్రూకి మిన్హత్‍నా హఃమాలీన్‍, అప్నె దేవ్‍నూ రాజ్యంమా జానుకరి యువ్నా ప్రోత్సహించొ. బుజు హర్‍ సంఘంమా యూవ్నా ష్యాణవ్‍నా ఏర్పరచిన్‍, ఉపాస్‍ ర్హైన్‍, ప్రార్ధన కరీన్‍ ఇవ్నే నమ్మిరాక్యతేవాలనా దేవ్నా అప్పగించ్యా.
ఇనబాద్మా పిసిదియ దేహ్‍ఃమా జైన్‍, బుజు ఏజ్గాతూ నికీన్‍ పంపులియానా గయా. బుజు పేర్గేమా వాక్యం బోధించిన్‍, ఏజ్గతూ అత్తాలియనా గయా. బుజు ఎజ్గతు జ్హాజ్‍ ఛడీన్‍, ఇవ్నె ఖతం కర్యాతే కామ్‍నా టేకె దేవ్‍ను కృపనా దరాటిదిదో బడ్యాహుయాహుయిన్‍, అగాఢి బయల్దేరీ గయాతేస్‍ అంతియొకయన జోగోకనాస్‍ బుజు ఆయా.
యూవ్నే ఆయిన్‍, సంఘంనా ఏక్ జోగో జోడ్‍ కరీన్‍, దేవ్‍ యూవ్నా కేడె ర్హైన్‍ కర్యోతే అక్కుబి, బుజు అన్యుల్‍1 విష్వాసించనా టేకె యో వాట్‍ కిమ్‍ కాడ్యోకి యూవ్నా ఖూల్లా కరీన్‍ బోల్యొ. యూవ్నే ఎజ్గాస్‍ ఎజ్గాను సిష్యుల్‍తీ గ్హణా ధన్‍ ర్హయా.
Source notes (1)
- Footnote మూలభాషమా యూదుల్ కాహెతె
Vagiri Vathe Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.