Vagiri Vathe Bible
అపొ 13
బర్నబానా సౌలు ఎంచిలీన్‍ మొక్లొ
అంతియొకయమ ఛాతే సంఘంమ బర్నబా, కాళోరవాళో సుమాయేను, కురేనీయుడ్‍ను లూకియ, హేరోద్‍తి మలిన్‍ అధికారినితరా థోతె వ్యధోతే మనయేను, సౌల్‍ కరి ప్రవక్తల్‍బి, బోధకుల్‍ థూ. ఇవ్నా ప్రభునా సేవకర్తూహుయిన్‍ పస్తు కర్తూ ర్హావమా పరిసుద్దాత్మ మే బర్నబానా సౌల్‍నా బులాయోతే సేవనాటేకె ఇవ్నా మన ప్రత్యేకం కర్‍ కరి ఇవ్నేతి బోల్యొ.
తెదె ఇవ్నే ఉపవాస్‍ రైన్ ప్రార్థనా కరీన్ ఇవ్నాఫర్‍ హాత్‍ మ్హేంధిన్‍ బోలిమొక్‍ల్యా.
కుఫ్రా
పరీసుద్దాత్మతి బోలిమొక్‍లాయ్‍ర్యూతే ఆవ్నే సెలూకయ హాఃయార్‍మా ఆయిన్‍ ఏజ్గాతూ జ్హాజ్‍ చఢీన్‍ కుప్రమా గయా. ఇవ్నే ఏజ్గాతు సలామిమా ఆయిన్‍ యూదుల్‍ను సభాస్థలంమ దేవ్‍ని వాక్యం ప్రచార్‍ కర్తర్హయ. యోహాన్, మార్కు ఇవ్నాకేడెతా.
ఇవ్నే ద్విపాల్‍ హాఃరు పర్తూహుయిన్‍, పాపు కరి ఏక్ గామ్‍మా ఆయాతేదె గారిడి వాళోబి, జుటీ ప్రవక్త హుయిరోతే బర్‍యేసు కరి ఏక్ యూదుడ్‍నా దేఖ్యా. యో సెర్గిపౌల్‍ కరి ఏక్ అధిపతి కనా గణు హాఃగ్‍తి రయో. యో బర్నబానాబి, సౌల్‍నా బులైమంగైన్‍ దేవ్ను వాక్యం హాఃమ్‍జునూ కరి కోర్యొ. రైతోబి ఎలుమ యో అధిపతినా విష్వాసంతి దూర్‍ రాక్ను కరి కోషీస్‍ కరీన్ ఇవ్నా ఆడుపడ్యొ. ఎలుమ కతో గారిఢివాళో కరి. ఇనహాఃజే పౌల్ కరి బోలాతే సౌల్‍ పవిత్రాత్మతి భరైన్‍, ఇనామణీ టర్కిన్ ధేఖీన్‍ కెత్రూకి కపటం దురాలోచన్‍తి భరైరోతే సైతాన్‍నూ ఛియ్యో, నీతినా వైరీంతర ధేఖవాళా, తూ ప్రభును అసేల్‍ వాట్‍నా చేడగోట్టాను మేంధా కోయిన్నా? హధేక్‍ ప్రభు ఇను హాత్‍ తారఫర్‍ పాఢీరాక్యోస్‍; తూ థోడధన్‍ ఖాణోహుయిన్‍ ర్హైస్‍, సూర్యుడ్‍నా దేఖీస్‍ కోయిని కరి బోల్యొ. తెదె యత్రాస్‍మా, అంధారు ఇనాఫర్‍ ఆయిన్‍ ఢఫైజవమా, ఇను నజార్‍ ఛల్‍జైన్‍ ఫర్‍తోహుయిన్‍ కోన్బి మన హాత్‍ ధరీన్‍ ఛలావ్‍స్యేకీ కరి ఢూండ్‍తోర్హయో. ఎత్రమా యో అధిపతి జర్‍గ్యుతే ఇనా దేఖిన్‍ ప్రభు బోధనా హషం హుయిన్‍ విష్వాసించ్యో.
అంతియొకయమా ఏక్ పిసిదియ
ఇనాబాద్‍మా పౌల్‍బి ఇనాకేడె ర్హవళు ఝాజ్‍ చఢీన్‍ పాపుతూ నిక్లీన్‍ పంపులియామా ఛాతే పేర్గేనా ఆయు ఏజ్గా యోహాన్నా మార్క ఇవ్నా మ్హేంధిన్‍ యెరూషలేమ్‍నా పాఛు చలెగో తెదె ఇవ్నే పేర్గేతు నాకీన్‍ పిసిదియామా ఛాతే అంతియొకయనా ఆయిన్‍ ఆరామ్నూ ధన్‍మా యూదులనా సభామా జైన్‍ బెట్టా ధర్మషాస్ర్తంబి ప్రవక్తల్‍నూ లేఖనం ఫడదదీన్‍ ఇనబాద్మా న్యావ్‍నుజొగొనూ అధికారుల్‍ భైయ్యే జనాల్ తుమె కేయూబి బోల్నూ కరి హూస్యేతొ బోలో కరి కభార్‍ కర్యా తెదె పౌల్ హిభ్రీన్‍ హాత్‍తి సైగ్‍ కరీన్ అమ్‍ బోల్యొ ఇష్రాయేలీల్‍వాళా దేవ్‍తి ఢరవాళా హాఃజో. ఇష్రాయేల్‍ ప్రజల్‍నూ దేవ్‍ అప్ను అప్నా పితరుల్‍నా ఏర్పచిలీన్‍ ఇవ్నే ఐగుప్తునూ దేఖ్‍ఃమా పరదేషిల్‍ హూయిన్‍ ర్హయ తెదె యో ప్రజల్‍నా ఉఫర్‍ పాఢీన్‍ ఇను అధ్బుతంనూ షక్తీతి ఇవ్నా ఎజ్గాతు బులాలిన్‍ ఆయో. బరోభర్‍ ఛాళీఖ్‍ః వరఖ్‍ఃతోడీ ఝాఢీయేవ్‍మా యూవ్ను చేష్టల్‍నా హాఃమాళ్యో. బుజు కనాన్‍ దేఖ్‍ఃమా హాఃత్‍ గోత్‍వాళానా నాషనం కరీన్ ఇవ్ను దేఖ్‍ఃనా ఆవ్నా వారసుల్నితర కర్యో. బరోభర్‍ ఛార్‍ఖోః ఆఢైఖ్‍ః వరఖ్‍ః ధర్యు ఇమ్‍ కరానా. ఇనబాద్మా సమూవేలు ప్రవక్త తోడీ యో యూవ్నా న్యాయాపతిల్‍నా దయకర్యో. ఇనబాద్మా యూవ్నే రాజో హూణు కరి కోరమా దేవ్‍ బెన్యామీన్ గోత్‍నూ కీషునూ ఛియ్యో సౌల్‍రాజొ ఛాళిఖ్‍ః వరఖ్‍ఃతోడి ఏల్యో. ఇనబాద్‍ ఇనా కణ్నాకీన్‍ దావీద్‍నా రాజోంతర కర్యో దావీద్‍ విషంమా దేవ్‍ ఇనూ మన్‍నూ వాత్‍ అమ్‍ బోల్యొ యెష్షయినో ఛియ్యో దావీద్‍ మారు ఇష్టనూసారంగా ఛాలావళో, మారు మే సోఛీ రాక్యోతే హాఃరు క్హాఛీ కర్సే కరి బోలిన్‍ సాక్చ్యం దిదో. దేవ్‍ వాగ్దన్‍ కర్యోతిమస్‍ ఇను సంతాన్‍మతూ ఇష్రాయేల్‍నాటేకే రక్చకుడ్‍ యేసునా ఫైధాకర్యొ. యెహాన్‍ ఇను కామ్‍ కరుథూరావ్వమా మే కోణ్ కరి తుమే రైజోంగ్రస్‍ తుమె ఎదురుదేకుకరతె యో మే కాహె, హదేక్‍ మార పీటే ఏక్జణో ఆవుంక్రస్‍, ఇను చప్లేనా ఛోడనబి మన ఎత్రే అర్హత కోయిని. ఇను ఆవానూ అగడీ యెహాన్‍ ఇష్రాయేలీల్‍ అద్మీయే హాఃరవ్‍నా దిల్‍ బద్‍లాయిలేవనూ గూర్చీ బాప్తిస్మమ్‍ ప్రచార్‍ కర్యో.
భైయ్యే, అబ్రాహామ్‍నూ జాత్‍వాళా, దేవ్‍తి ఢరవాళా, ఆ రక్చణ వాక్యం అప్నా కనా మొక్లాయిరూస్‍. యెరూషలేమ్‍మా కాపరం ర్హవళాబి, ఇవ్ను అధికారుల్‍బి, హార్‍ ఆరామ్నూ ధన్నే ఫడావ్‍ంగ్రతే ప్రవక్తల్‍నూ వచన్‍నా ధ్యాన్‍ నాదీన్‍ ఇనా యేసునా మరణ్‍ షిక్చ నాఖీన్‍ యో వచన్‍నా హాఃఛి కర్యా. ఇనాహాఃమె మర్రాఖ ఏత్రే తప్పు నాధేఖాయుతోబి, ఇనా మర్రాక్ను కరి యూవ్నే పిలాతునా వేడిలిదా. ఇవ్నే ఇన గూర్చీ నిఖైర్యూతే హాఃరు క్హాఛీ హూవదిన్‍, ఇనా సిలువతూ ఉత్రాయిన్‍ సమాధిమా రాఖ్యా. రైతోబి దేవ్‍ ఇనా మర్యాహూయమతూ ఉఠాడ్యొ. యో గలిలయమతూ యెరూషలేమ్‍నా ఇనేతి కేడె మళిన్ ఆయుతే యూవ్నా కెత్రాకీ ధన్‍ దేఖాయో. ఇవ్నేస్‍ ఇస్రాయేల్నా సాక్చిహుయీన్‍ రయు. దేవ్‍ యేసునా ఉఠాడీన్, పితరుల్‍నా కర్యోతే వాగ్దన్‍ అప్నా లఢ్‍క్వా కనా క్హాఛీ కర్‍రాక్యోస్ కరి, హమేబి తుమ్నా ప్రచార్‍ కరూకరుయేస్‍, ఇమ్మస్‍ తూ మారో ఛియ్యో మే తూనా జణీరాక్యోస్‍ కరి బెంమ్మనూ కీర్తనమా నిఖైర్యుస్‍. బుజు అజు హాఃడ్నూనాతిమ్‍ ఇనా మర్యాహూయమతూ ఉఠాడనూబి, దావీద్‍నా దీదోతే పవిత్రమ్‍హుయుతే వరాల్‍ తూమ్నాబి దీస్‍, యో నమ్మకంనూస్‍ కరి బోల్యొ. ఇనహాఃజే అజేక్‍ కీర్తనమా తారు పరీసుద్దుడ్‍నా గోరాడమ హాఃఢదీస్‍కోయిని కరి బోలుకరాస్‍. దావీద్‍ దేవ్‍నూ సంకల్ప ప్రకార్‍ ఇనూ పీఢీనూ అద్మీయేనా సేవ కరీన్ హూఃయిజైన్, ఇనా పితరుల్‍ కనా చేర్చాయి జైన్‍ ఆంగ్తాన్‍ హాఃఢీగయో. పన్కి దేవ్‍ ఉఠాడ్యోతే ఇనా యో హాఃడదీదోకోయిని.
ఇనహాఃజే భైయ్యే తూమ్నా ఆనేతిస్‍ పాప్‍ మాఫి హూంక్రస్‍ కరి తుమె మోషే ధర్మషాస్ర్తంమా క్హయు విషంమా నీతి మంతుడ్‍ కరి బోలావ్‍స్యుకి యో విషం హాఃరమా విష్వసించతె హార్‍ ఏక్ ఆనేతిస్‍ నితి మంతుడ్‍ కరి తీర్చబడ్‍స్యు కరి తూమ్నా మాలంహోణు. ప్రవక్తల్‍నూ గ్రంథంమా బోలాయుతిమ్‍ తుమారఫర్ నాఆవునుతిమ్‍ దేఖీలేవో; యో ష్యాత్ కతో
హధేకో నక్లే కాడవాళా, హాషంహువో నషించ్వో, యో ధన్నువ్‍మా మే ఏక్ కార్యం కరీస్‍, ఇనా కోన్‍బీ బోల్యుతోబి తుమె జరాబి నమ్‍స్యు కోయిని. ఇవ్నే1 పౌల్ యూదుల సభమతు ఛల్‍జౌంగ్రతో ఆవాతే హంకేనూ ఆరామ్నూ ధన్నేబి హమారేతి బోల్‍జో కరి జనాల్ గోజ్‍లాడ్యు. యూ యూవ్నే వూటాదిన్‍ కెత్రూకి జణు యూదుల్‍బి, యూదమతంనూ ప్రవిష్టుల్‍ పౌలునా బర్నబానా కేడెగయా. అవ్నే యూవ్నేతి వాతె బోల్తూహూయిన్‍, దేవ్‍ని కృపమా నిలకడ్‍గా ర్హనూ కరి యూవ్నా ఉసీకర్యొ.
బెంమ్మనూ ఆరామ్నూ ధన్నే యో హఃయార్నూ హాఃరూస్‍ దేవ్‍నూ వాక్యం హాఃమ్‍జ్ను కరి భరైన్‍ ఆయు. యూదుల్‍ జనాల్నూ గుంపుల్‍నా దేఖిన్‍, కుట్రతి భరైన్‍, దూషించతా దేతాహూయిన్‍, పౌలు బోలాతే వాతేనా ఆడే బోల్తా ర్హయా. తెదె పౌలుబి, బర్నబా హిమ్మత్‍తి అమ్‍ బోల్యా, దేవ్‍నూ వాక్యం ఆగడీ తూమ్నా బొలానూ కాయామస్‍ హుయితోబి తుమె ఇనా దకల్‍ నాఖీన్‍, తూమరు తూమేస్ నిత్యజీవంనూ పాత్రుల్‍ కాహేతిమ్‍ కర్‍లేంగ్రస్‍, ఇనహఃజే హామే అన్యుల్‍ కనా జౌంగ్రుయేస్‍ కిమ్కతో ప్రభు హమ్నా జమీన్‍నూ అంతంతోడి అన్యాజనుల్‍నా రక్చణగా బుజు ఊజాళుంతర ర్హాకరీ ఆజ్ఞదిదో.
అన్యాజనుల్‍ యో వాతె హఃమ్‍జీన్‍ హూఃషీహూయిన్‍, దేవ్‍ని వాక్యంనా మహిమ కర్యు బుజు నిత్యజీవంనా నిర్ణయించ్యుతే యూవ్నే హఃరు నమ్మిలిదు.
ప్రభునూ వాక్యం యో ప్రదేషాల్‍ హఃరూమా ఫైలాయు. కాని యూదుల్‍ భక్తిమా మర్యాదితి ర్హవాళి బాయిక్వాన, యో హఃయార్నూ ప్రముఖుల్నా, ఉషీ కరైన్‍ పౌలునా, బర్నబానా హఃతాయిన్‍ యూవ్నా ఇవ్నూ ప్రాంతంనా నాహఃడ్‍నాక్యు. అపోస్తుల్‍ యూవ్నూ గోఢాను ధుళ్‍నా యూవ్నా మ్హణీ జట్కీనాఖీదిన్‍ ఈకోనియానా ఆయా. కాని అంతియొకయలోని సిష్యుల్‍ హూఃషీతి, పవిత్రాత్మతీ భరైన్‍ ర్హయా.
Source notes (1)
- Footnote భర్నబ, పౌల్
Vagiri Vathe Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.