Vagiri Vathe Bible
2కొరింథీ 9
అవసరంహుయూతె విష్యాసియేనా భైయ్యేనా మద్దత్
పరిసుద్ధ్ హాఃజెహుయుతె ఇవ్నా ఆ పరిచర్యా కర్నుకరి తుమ్నా ప్రత్యేకంగా బోలను అవసరం కొయిని. తుమారు దిల్ సిద్ధమ్హుయిన్ ఛా కరి మే మాలంకరూకురుస్ ఇనహాఃజె ఆ వరహ్ఃతి అకయ తయార్హుయీన్ ఛా కరి బోలి, మే తుమ్నలీన్ మాసిదోనియాను జనమ్ను హాఃమె తుమ్నా భాడ్డాయికొయిని తుమారు ఆసక్తినా దేఖిన్ హాఃరుజణు మద్దత్కరనా. వుజు తుమారబారెమా హమారు అతిషయమ్ ఆ విషయంమా పాల్తు నాహోనుతిమ్ మే బోల్యొతె ప్రకారంతి తుమే సిద్ధంతి ర్హావనటెకె ఆ విష్వాసుల్నా మొక్లొ. తుమె సిద్ధం నాహుయతో యేక్తారా మాసిదోనియవాలు కోన్బి మారకేడె ఆయిన్ తుమే సిద్ధంతి నార్హావను దేఖ్యతొ, ఆ నమ్మకం హువనబారెమా హామె షరమ్వాలహుసు; తుమేబి సరామ్వాలహుసుకరి అజు బోలతెకిమ్? హుయుతోబి వాత్ దినాక్కిది మేకరి తుమె బోల్యతే ధర్మమ్ ఢరేళునితరా నాదేనుతిమ్ లోట్కొయినితిమ్ దేనుకరి బోలిన్, విష్వాసుల్ తుమారకన అగాఢీస్ ఆయిన్ ఇన జమకరానటేకె ఇవ్న గుర్కావను జరూర్హుయీన్ అవసరంకరి సోఛిలిదొ థొ.
థోడుసు పిక్కావవాలు థోడుసు పంటవాడ్సె, ఘనూ పిక్కావవాలు ఘనుసూ పంటవాడ్సెకరి, ఆ విషయమ్హుయీన్ బోలజైయి. గుణగకొయినితిమ్ జబర్దస్తితి కాహెతిమ్ హార్యేక్ జణు ఇను దిల్మా సొఛిలిదుతే ప్రకారంతి దేను సానకతో దేవ్ ఖుషితి దెవ్వాలనా ఫ్యార్కరస్. బుజు హాఃరామ హమేసా తుమారమా తుమే హాఃరువిషయంమా జాహఃత్బ్హఢవాలహుయిన్ అష్యల్ హర్యేక్ కామ్నా కరనాటేకె దేవ్ తుమారమ్హడీ హరేక్ రకంను కృపనా కరవాలో.
ఆ విషయంనా “యో ధారళంతీ గరిబ్నా దిదో,
ఇను నీతి హమేషా వుబిర్హాసే” కరి లిఖ్కాయిరూస్.
పిక్కావవాలన బింజొళబి ఖావనటేకె ఖానుబి దెవ్వాలొ దేవ్ తుమ్న బింజోళాబి దయాకరిన్ బడ్డాయిన్, తుమె హార్యేక్ విషయాంమ పరిపూర్ణంతి తుమారు నీతి ఫలంనా బడ్డాయిస్. ఆ జాత్ను ధారళంతి దిసెతే తుమ్నా బట్టిన్ హమారబారెమా దేవ్న కృతజ్ఞాతస్తుల్కరూకరిస్. కింకతో ఆ సేవనాలీన్ పరిచర్యా దేవ్ను అద్మియే అవసరం మద్దత్ కరనాటేకెస్ మాత్రమ్ కాహెతిమ్, కెత్రూకిజణు దేవ్నా కృతజ్ఞాత చేల్లించనుమూలంతి ఫైలాంకరస్. కింకతో క్రీస్తు సువార్తన అంగికరించ్నుకరి ఓప్పిలేవనుకనా తుమే విధేయుహుయాతె, ఇవ్ను విషయాంమాహొ హాఃరౌను విషయాంమహో అత్రి ధారళంతి ధర్మమ్ కర్యతే ఇనహాఃజె , ఆ పరిచర్యా బారెమా తుమారు యోగ్యత దెఖ్కావమా ఇవ్నే దేవ్నా మహిమా కరూకరస్. బుజు తుమారప్పర్ దేవ్ జాహఃత్బి కృపనా దేఖిన్ ఇవ్నే తుమార నిమిత్తంతీ ప్రార్థనకర్తూ తుమ్నదేక్నుకరి ఘను ఆహ్ఃవాలుహుయిన్ ఛా. బోలనహువకొయింతే యో వరమ్నాబారెమా దేవ్నా సోత్రమ్.
Vagiri Vathe Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.