Waghri Booli Bible
ಪ್ರಕಾಶಿತ್ 9
ಪಾಚ್ನೊ಼ ದೇವ್ನ ದೂತನೆ ತುತ್ತೂರಿನ ಫೂಕಾನಿವಖ್ಹ್‌ತೆ; ಆಬ್‍ಥು ಜ಼ಮೀನ್‌ಪರ್ ಪಡ್ಯೂತೆ ಏಕ್‌ ಶುಕ್ಕರ‍್ನ ದೇಖ್ಯೊ. ಇನ 1ಪಾತಾಳ್ನು ಬಾವ್ಡಿನು ಬೀಗಾನು ಕೀಲಿ ದೆವಾಯು. ಇನೆ ನರಕ್‌ನಿ ಬಾವ್ಡಿನ ಕಾಡಾದಿನ್ ಬಾವ್ಡಿಮಾಥು ಆಯುತೆ ಧುವೊ ಮೋಟಿ ಕೋಲ್‌ಮಿನು ಧುವಾನಿತರ ಉಪ್ಪರ್ ಆಯು. ಬಾವ್ಡಿನ ಧುವ್ವಾಥಿ ಚಾ಼ಂದ್‌ಬಿ, ಆಸ್‌ಮಾನ್‌ಬಿ, ಕಾಳುರೈಟ್‌ ಹುಯಿಗು. ಧುವ್ವಾಮಾಥು ಚಿಡ್ಡೊಖ್ಹಾರು ಜ಼ಮೀನ್‌ಪರ್ ನಿಕ್ಳಿಆಯು. ಜ಼ಮೀನ್‌ಪರ್ ಛಾ಼ತೆ ವಿಛ್ಛಿಯೇನಿ ಪರಕ್ ಇನ ತಾಖತ್ ದೆವಾಯು. ಜ಼ಮೀನ್‌ಪರ್ ಛಾ಼ತೆ ಘಾಖ್ಹ್‌ನ ರ‍್ಹವೊ ಪಂಡು ಫಲ್ನ ರ‍್ಹವೊ, ಝಾ಼ಡನ ರ‍್ಹವೊ, ನಾಶ್‌ನಾಕರ‍್ನುತೆ, ತಾಳ್ವಪರ್ ದೇವ್‌ನೊ ಮುದ್ರೊಕೊಂತೆ ಅದ್ಮಿವ್‌ನಖಲಿ ನಾಶ್‌ಕರ್ನುಕರಿ ಯೊ ಚಿಡ್ಡಾವ್ನ ಹುಕುಮ್‌ಹುಯು. ಇವ್ಣುನ ನಾ ಮಾರ‍್ನುತೆ ಪಾಚ಼್ ಮಹಿನ ಲಗೂಬಿ ಖ್ಹತಾವ್ಣುಕರಿ ಅದಿಕಾರ್ ಮಳ್ಯು. ಯೋ ಅದ್ಮಿಖ್ಹಾರನ ಹುಯೂತೆ ಅಜ಼ ವಿಛ್ಛಿ ಅದ್ಮಿನ ಕಲ್ಡಾನಿತರಾಸ್ ಥು. ಯೊ ಪಾಚ಼್ ಮಹಿನಾಮ ಅದ್ಮಿಖ್ಹಾರು ಮರ್‌ವಾನ ಹರಖ್ಹ್‌ಷೆ ಕತೋಬಿ ಯೋ ಪೂರ ಕೊಉಷೇನಿ.ಅದ್ಮಿ ಮರಾನಿ ವಾಟ್‌ ಢೂಂಡ್‌ಷೆ, ಕತೋಬಿ ಮರಣ್ ಇವ್ಣೇಥಿ ಲಪಿಜಾ಼ಷೆ. ಯೋ ಚಿಡ್ಡಾವ್ನು ರೂಪ್ ಜಂಗ್‌ನ ತಯಾರ್ ಕರಾಖನು ಘೋಡಾವ್‌ನು ರೂಪ್‌ನಿತರ ಥು.ಇವ್ಣ ಮುಡ್‌ಕ್ಯಾವ್‌ಪರ್ ಖ್ಹೊನ್ನಾನಿ ಕಿರೀಟ್‌ನಿತರಾಬಿ, ಇನು ಮ್ಹೋಡುಖ್ಹಾರು ಅದ್ಮಿವ್‌ನ ಮ್ಹೊಡಾನಿತರಾಬಿ ಥು. ಇನು ಕೇಖ್ಹ್‌ ತಯೇಡಾನ ಕೇಖ್ಹ್‌ನಿತರಾಬಿ ದಾತ್‌ ಶುಂಭಾನ ದಾತ್‌ನಿತರಾಬಿ ಥು. ಯೋ ಅಖ್ಖಾನಿ ಶರೀರ್‌ನ ಖ್ಹಾರ್ನು ಕವಚ್‌ಥು.ಇವ್ಣು ಫಾಕ್ಡಿಯೇನು ಅವಾಜ಼್ ಜಂಗ್‌ನ ನಾಖ್ಹಾತೆ ರಥ್‌ನ ಘೋಡಾನ ಅವಾಜ಼್‌ನಿತರ ಥು. ವಿಛ್ಛಿಯೇನ ರ‍್ಹೇಸ್ತೆತಿಮ್ ಇವ್ಣುನ ಡೊಂಡೋಬಿ, ಕಾಟೋಬಿ ಥು. ಅದ್ಮಿವ್‌ನ ಪಾಚ಼್ ಮಹಿನಲಗೂಬಿ ಖರಾಬ್ ತಾಖತ್ ಇವ್ಣ ಡೋಂಡವ್‌ಮಸ್ ರ‍್ಹಿಶೆ. ಪಾತಾಳ್‌ನೊ ಮುಖ್ಯ ಹುಯಿರ‍್ಹೋತೆ ದೂತಾಸ್ ಯೋ ಚಿಡ್ಡಾವ್ನ ರಾಜ಼ ಹುಯಿರೋಥೊ. ಇನ ಹಿಬ್ರು ವಾತೇಮ ಅಬದ್ದೋನ್‌ ಕರೀಬಿ, ಗ್ರೀಕ್ ಬೋಲಿಮ ಅಪೊಲ್ಲುವೋನ ಕರೀಬಿ ನಾಮ್‌ಥು. ಪಹಿಲು ಖತ್ರ ಖತಮ್‌ಹುಯಿಗು. ದೇಕ್ ಬಿಜೂ಼ ಬೇನು ವದೇಖ್ಹ್‌ಖ್ಹಾರು ಇನ ಪೀಠೇಸ್ ಆಯು.
ಛೋ಼ನೆ ದೇವ್‌ನೊ ದೂತನೆ ತುತ್ತೂರಿನ ವಜಾ಼ಡನಿ ವಖ್ಹ್‌ತೆ ದೇವ್‌ಕನ ಥೂತೆ ಖ್ಹೊನ್ನಾನು ಚಾ಼ಚ಼ರ್‌ನ ಶಿಂಗ್ಡಾವ್‌ಥು ನಿಕ್‌ಳ್ಯೂತೆ ಏಕ್‌ ಅವಾಜ಼್‌ನ ಖ್ಹಮ್‌ಜೊ. ಛೋ಼ನೆ ದೇವದೂತ ಯೊ ತುತ್ತೂರಿನ ಧರಿರಾಖ್ಯುಥೂತೆ ದೇವ್ನ ದೂತಾನ, “ಯೂಫ್ರಟಿಸ್ ಕರಿ ಮೋಟಿ ನದ್ದಿಕನ ಭಾಂದಿರಾಖ್ಯೋತೆ ಚಾರ್‌ಜ಼ಣ ದೇವ್ನ ದೂತರ‍್ನ ಛೋ಼ಡಿನಾಕ್‌” ಕರಿ ಬೋಲ್ಯು. ತದೆ ಅದಮ್‌ಜ಼ಮಾನಮ ತೀನ್‌ಮಾನು ಏಕ್‌ಭಾಗ್ ಅದ್ಮಿನ ಸಂಹಾರ್ ಕರಾನಖ್ಹಾಜೆ ಯೋಸ್ ವರಖ್ಹ್, ಯೋಸ್ ಮಹಿನೊ, ಯೋಸ್ ದನ್, ಯೋ ವಖ್ಹತ್‌ನಖ್ಹಾಜೆ ತಯಾರ್‌ಥಾತೆ ಯೊ ಚಾರ್‌ಜ಼ಣ ದೇವ್ನ ದೂತರ‍್ನ ಛುಟ್ಕಾರ್ ಕರಾಯು. ಇನು ಘೋಡಾನು ಶಿಪಾಯ್ನಿ ಗಣ್ತಿ ವೀಖ್ಹ್‌ ಕರೋಡ್‌ಕರಿ ಮನ ಖ್ಹಮಜ್‍ಪಡ್ಯು. ಮೇ ದರ್ಶನ್‍ಮ ದೇಖ್ಯೊತೆ ಘೋಡಾವ್‌ಬಿ ಅಜು಼ ಇನಪರ್‌ಲ್ಯ ಸವಾರಿನ ಬಾರೇಮ ಬೋಲಾನು ಕಿಮ್‌ಥು ಕತೊ, ಸವಾರಿವ್‌ನು ಕವಚ್‌ನು ರಂಗ್ ಆಗ್‍ನಿತರ ಲಾಲ್, ಧುವ್ವನಿತರಾನು ನೀಲು, ರಂಜ಼ಕ್‌ನಿತರ ಪೀಳು ಥು. ಘೋಡಾವ್‌ನು ಮುಡ್‌ಕ್ಯು ಖ್ಹಾರು ಶುಂಭಾವ್‌ನ ಮುಡ್‌ಕ್ಯಾನಿ ಘೋಣಿ ಥು. ಅಜು಼ ಇನ ಮ್ಹೋಡೇಖ್ಹು ಆಗ್ ರಂಜ಼ಕ್‌ ಧುವ್ವೊ ನಿಕ್‌ಳ್ಯು. ಯೋ ಅಖ್ಖಾನ ಮ್ಹೊಡಾಮಾಥು ನಿಕ್‌ಳ್ಯೂತೆ ಯೊ ಆಗ್, ಧುವ್ವೊ, ರಂಜ಼ಕ್‌, ಕರಿ ಬೋಲಾನು ತೀನ್ ಖ್ಹತಾಪ್ಣಿಥಿ ಜ಼ಮೀನ್‌ಪರ್‌ನು ಅದ್ಮಿನು ತೀನ್‌ಮಾನು ಏಕ್‌ಭಾಗ್ ಮರೈಗಯು. ಯೊ ಅಖ್ಖಾ ಘೋಡಾನಿ ತಾಖತ್ ಯೋಅಖ್ಖಾನ ಮ್ಹೊಡಾಮಾಬಿ, ಡೋಂಡಾಮಾಬಿ ಥು. ಇನು ಡೋಂಡೊಅಖ್ಖು ಮುಡ್‌ಕ್ಯು ರ‍್ಹವಾಳು ಹುಯಿನ್ ಖ್ಹಾಪ್‌ನಿತರ ಥು. ಇನೇಥಿಸ್ ಖರಾಬ್ ಉಷೆ. ಆ ಖ್ಹತಾಪ್ಣಿಥಿ ಮರ‍್ಯುಕೊಂತೆ ಬಚಿರ‍್ಹಾವಳು ಅದ್ಮಿಖ್ಹಾರು ಇವ್ಣೇಸ್ ಕರಿಲಿದುಥೂತೆ ಮೂರತ್‌ಅಖ್ಖಾನ ಮ್ಹೇಲಿನ್ ದೇವ್‌ಭಣಿ ಫರ‍್ಯುಕೊಯ್ನಿ. ಇವ್ಣೆ ಭೂತ್ ಪಿಶಾಚಿಖ್ಹಾರಾನು ಆರಾದನೆನಾಬಿ ಬಿಜು಼ ಖ್ಹೊನ್ನು, ರೂಪು, ತಾಂಬು, ಬಂಡೊ, ಝಾ಼ಡ್‌ ಆಸ್ ಅಖ್ಖಾಥಿ ಬಣಾವಟ್ ಹುಯಿನ್ ದೇಖಕೊಂತೆ, ಖ್ಹಮ್‌ಜಾ಼ಕೊಂತೆ, ಚಾ಼ಲಕೊಂತೆ ರ‍್ಹವಾನ ಮೂರತ್‌ನ ಪೂಜಾ಼ನ ಕೊಮ್ಹೆಲ್ಯೂನಿ. ಆನಾಹುಯಿನ್ ಇವ್ಣೆ ಚ಼ಲಾವ್ತುಥೂತೆ ರ‍್ಹೇ಼ಖ್ಹಾನು, ಜಾ಼ದುಜ಼ಮ್‌ಕರ್‌, ಪಾಪೇಲು ಕಾಮ್, ವ್ಯಬಿಚಾರ್‌ನ, ಚೋ಼ರ್‌ಚ಼ಖಾಟ್ ಆ ಅಖ್ಖಮಾಥು ಏಕ್‌ಬಿ ಮ್ಹೇಲಿನ್ ದೇವ್‌ಭಣಿ ಫರ‍್ಯುಕೊಯ್ನಿ.
Source notes (1)
- Footnote ಖರಾಬ್ ಆತ್ಮವ್‌ನ ಖ್ಹರ್ತಿನ ತೀರ್ಪ್‌ನ ದನ್‌ಲಗು ರಾಖನ ಭಾಂದಿಹುಯಿ ಝ಼ಗೊ
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.