Waghri Booli Bible
ಪ್ರಕಾಶಿತ್ 8
ಖ್ಹಾತ್‌ನೊ ಮುದ್ರೊ
ಮೇಂಢಾನುಚೆಲ್ಕು ಹುಯಿರ‍್ಹಾವಳನೆ ಖ್ಹಾತ್‌ನೊ ಮುದ್ರಾನ ಫೋಡಾನಿವಖ್ಹ್‌ತೆ; ಖ್ಹುಮಾರ್ ಆಧ ಘಂಟಾಲಗು ಸೊರ್ಗಾಮ ಶೊಪೊಹುಯ್ಗು. ತದೆ ದೇವ್ನ ಖ್ಹಾಮ್ಣೆ ಭಿಯುತೆ ಖ್ಹಾತ್ ದೇವ್‌ದೂತರ್‌ನ ಮೇ ದೇಖ್ಯೊ. ಇವ್ಣುನ ಖ್ಹಾತ್ ತುತ್ತೂರಿಯೆ ದೆವಾಯು. ಇನಪಾರ್ ಬಿಜೇಕ್ ದೇವ್‌ನೊ ದೂತ ಆಯೊ ಯೋ ಖ್ಹೊನ್ನಾನಿ ಖ್ಹಾಲರ‍್ಯಾನಿ ಢಾಕ್ಣಿ ಧರಿಲೀನ್ ಚಾ಼ಚ಼ರ್‌ಕನ ಆಯಿನ್ ಭೀಯೊ ಸಿಂಹಾಸನ್ನು ಮುದ್ರಾನು ಖ್ಹೊನ್ನಾನ ಚಾ಼ಚ಼ರ್‌ನ ಉಪ್ಪರ್ ಅದ್ಮಿಖ್ಹಾರು ಪ್ರಾರ್ಥನೆಥಿ ಸಮರ್ಪಣ್‌ ಕರಾನಖ್ಹಾಜೆ ಇನ ಘಣು ಢಪ್ಕಾರ್‌ ದೆವಾಯು. ತದೆ ಖ್ಹಾಲರ‍್ಯಾನು ಧುವೊ ದೇವ್ನದೂತರ‍್ನ ಹಾತ್ಮಥು ನಿಕ್ಳಿನ್, ದೇವ್ನ ಅದ್ಮಿವ್‌ನು ಪ್ರಾರ್ಥನೆನಿ ಜೋ಼ಡ್ಮ ಮಳಿನ್ ದೇವ್‌ಕನ ಉಡಿಗಯು.
ಆ ನಾಹುಯಿನ್ ಯೋ ದೇವ್‌ನೊ ದೂತ ಢಾಕ್ಣಿನ ಲೀನ್ ಚಾ಼ಚ಼ರ್‌ನಿ ಆಗ್‍ಥಿಯಿನ ಭರಿನ್ ಜ಼ಮೀನ್ನ ಉಪ್ಪರ್ ಫೇಕ್ಯೊ. ತದೆ ಘಲಾರಿನ್ ಘೂಂಜಿನ್, ಮೋಟಿಅವಾಜ್‌, ವಿಜ಼್‌ಳಿ ಖಡ್‌ಕಿ, ಭೂಕಂಪ್ ಹುಯು.
ತುತ್ತೂರಿ ಖ್ಹಾರು
ಖ್ಹಾತ್ ತುತ್ತೂರಿಯೇವ್ನ ಧರಿರಾಖ್ಯುತೆ ಖ್ಹಾತ್ಜ಼ಣು ದೇವ್‌ನೊ ದೂತರ್ ಫೂಕಾನ ತಯಾರ್‌ಹುಯು. ಪಹಿಲೊ ದೇವ್ನು ದೂತಾನೆ ಇನು ತುತ್ತೂರಿನ ಫೂಕಾನಿವಖ್ಹ್‌ತೆ ಲ್ಹೋಯಿ ಮಳಿಹುಯು ಗಾರಾನೊ ಪಾಣಿಬಿ, ಆಗ್‌ಬಿ,ಜ಼ಮೀನ್‌ಪರ್ ರಂಚಾ಼ಯು. ಜ಼ಮೀನ್ನು ತೀನ್‌ಮಾನು ಏಕ್‌ಭಾಗ್ ಬಳಿಗಯು. ಝಾ಼ಡವ್‌ಮ ತೀನ್‌ಮಾನು ಏಕ್‌ಭಾಗ್ ಬಳಿಗಯು. ಹರ‍್ಯು ಘಾಖ್ಹ್‌ಅಖ್ಖು ಬಳಿಗಯು. ಬೇನೊ ದೇವ್ನದೂತನೆ ಇನು ತುತ್ತೂರಿನ ಫೂಕ್ಯೊ. ತದೆ ಆಗ್‌ಥಿಲಾಗುಕರಾತೆ ಮೋಟೊ ಪಹಾಡ್‌ನಿತರನು ಏಕ್‌ ರಾಛು಼ ದರ‍್ಯಾವ್‌ಮ ಫೇಕೈಗಯು.ತದೆ ದರ‍್ಯಾವ್‌ಮ ತೀನ್‌ಮಾನು ಏಕ್‌ಭಾಗ್ ಲ್ಹೋಯಿ ಹುಯಿಗು. ದರ‍್ಯಾವ್‌ಮಾನು ಜೀವಿಮ ತೀನ್‌ಮಾನು ಏಕ್‌ಭಾಗ್ ಮರಿಗಯು ಬಿಜು಼ ಜ಼ಹಾಜ಼್‌ಮಾನು ತೀನ್‌ಮಾನು ಏಕ್‌ಭಾಗ್ ನಾಶ್‌ಹುಯಿಗಯು. ತೀನ್ನೊ ದೇವ್ನ ದೂತನೆ ಇನಿ ತುತ್ತೂರಿನ ಫೂಕ್ಯೊ; ತದೆ ಢಿಟಂಬನಿತರ ಬಳುಕರಾನು ಏಕ್‌ ಮೋಟೊ ಶುಕ್ಕರ್ ಆಬ್‌ಪರ್ ಅಜು಼ ನದ್ದಿನು ಅಜು಼ ಪಾಣಿನು ಝೀಲ್‌ನು ತೀನ್‌ಮಾನು ಏಕ್‌ಭಾಗ್ ಪರ್ ಪಡ್ಯು. ಆ ಶುಕ್ಕರ್‌ನು ನಾಮ್ ಝಾ಼ರೇಲಿ. ತದೆ ಪಾಣಿನು ತೀನ್‌ಮಾನು ಏಕ್‌ಭಾಗ್ ಝಾರ್‌ಹುಯಿಗು. ಬಿಜು಼ ಯೊ ಪಾಣಿ ಪೀದೂತೆ ಕೈಏಕ್ ಜ಼ಣು ಮರಿಗಯು, ಶನಕತೊ ಯೊ ಝಾರ್‌ ಹುಯಿರುಥು. ಚಾರ‍್ನೊ ದೇವ್‌ನೊ ದೂತನೆ ತುತ್ತೂರಿನ ಫೂಕ್ಯೊ, ತದೆ ಚಾ಼ಂದ್‌ನು ತೀನ್‌ಮ ಏಕ್‌ಭಾಗ್, ಇಮ್ಮಸ್ ಚ಼ಂದರ್‌ಮಾನು ಅಜು಼ ಶುಕ್ಕರ್‌ಮಾನು ತೀನ್‌ಮಾನು ಏಕ್‌ಭಾಗ್‌ನ ಖರಾಬ್‌ಹುಯಿನ್‌ ಅಂಧಾರು ಹುಯಿಗು. ಇನಖ್ಹಾಜೆ ದನ್ಮ ತೀನ್‌ಮಾನು ಎಕ್‌ಭಾಗ್ ಉಜಾ಼ಳುಕೊಂತೆ ಅಂಧಾರು ಹುಯಿನ್, ರಾತ್ನಿ ಘೋಣಿಸ್ ಹುಯಿಗು1. ಇನಪಾರ್ ಮೆ ದೇಖ್ಯೊತೊ ಏಕ್‌ ಗರದ್ ಆಸ್ಮಾನ್ನ ಇಚ಼್‌ಮ ಉಡ್ತುಫಂಡ್‌ತೂಥು. ಯೊ ಅವಾಜ಼್ ಮನ ಖ್ಹಮಜ್‍ಪಡ್ಯು. ಅಜೂ಼ಬಿ ಥೂತೆ ತೀನ್‍ಜ಼ಣು ದೇವ್‌ದೂತರ್‌ ತುತ್ತೂರಿನ ಫೂಕಾಖ್ಹತರ್‌ ಜ಼ಮೀನ್‌ಪರ್ ಜಿವ್ಣುಕರವಾಳ ಅಖ್ಖಾನ ಖರಾಬ್, ಖರಾಬ್, ಖರಾಬ್‌ಕರಿ ಊಚಿ ಅವಾಜ಼್‌ಥಿ ಚಿಕ್ರಾನು ಖ್ಹಮ್‌ಜ್ಯೊ.
Source notes (1)
- Footnote ಚಾಂದ್‌ಮನು ತೀನ್‌ಮ ಏಕ್‌ಭಾಗ್
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.