Waghri Booli Bible
ಮತ್ತಾಯ 18
ಖ್ಹಾರೇಥಿ ಮೋಟು ಕೋಣ್?
(ಮಾರ್ಕ 9:33-37; ಲೂಕ 9:46-48)
ಯೋ ವಖ್ಹತ್‌ಮ ಶಿಷ್ಯರ್‌ ಯೇಸುಕನ ಆಯಿನ್, “ಸೊರ್ಗಾನು ರಾಜ್ಯಮ ಖ್ಹಾರೇಥಿ ಮೋಟು ಕೋಣ್?” ಕರಿ ಪುಛಾ಼ಯ.
ಇನಖ್ಹಾಜೆ ಯೇಸುನೆ ಏಕ್‌ ಅಡ್ಡಾಣಿ ಲಡ್ಕಾನ ಬುಲೈನ್, ಶಿಷ್ಯರ್‌ನ ಖ್ಹಾಮ್ಣೆ ಭಿರಾಖಿನ್, “ಮೇ ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ತುಮೆ ಪಾಛು಼ ಫರೀನ್, ಆ ಅಡ್ಡಾಣಿ ಲಡ್ಕಾನಿ ಘೋಣಿ ನಾ ಹುಯಾತೊ, ತುಮೆ ಸೊರ್ಗಾನು ರಾಜ್ಯಮ ಜಾ಼ಶುಸ್ ಕೊಯ್ನಿ. ಕೋಣ್ ಅಡ್ಡಾಣಿ ಲಡ್ಕಾನಿಘೊಣಿ ಇನು ಯೋ ಝು಼ಕೈಲೇಸ್ಕಿ, ಯೋಸ್ ಸೊರ್ಗಾನು ರಾಜ್ಯಮ ಖ್ಹಾರೇಥಿ ಮೋಟೊ. ಅತ್ರೇಸ್ ಕಾಹೆತೆ ಕೋಣ್‌ತೋಬಿ ಮಾರ ನಾಮ್ಪರ್ ಅಮ್ನಏಕ್ ಅಡ್ಡಾಣಿ ಲಡ್ಕಾನ ಬುಲೈಲೇಸ್ಕಿ, ಯೋ ಮನ ಬುಲೈಲ್ಯವಾಳೊ ಹುಯಿರ‍್ಹೊಸ್.
ಪಾಪ್‌ಮ ಚ಼ಲಾವವಾಳಾನಿ ಬಾರೇಮ
(ಮಾರ್ಕ 9:42-48; ಲೂಕ 17:1-2)
ಮಾರಪರ್ ವಿಶ್ವಾಸ್ ಕರಾವಾಳ ಆ ನ್ಹಾನಾವ್‍ಮ ಏಕ್‌ನ ಕೋಣ್‌ತೋಬಿ ಭೀರಾಖ್ಯೂತೊ, ಇಮ್‌ನಾನ ಘಲೆಂಡ ಕೇಡೆ ಘಟ್ಟಿನ ಬಂಡಾನ ಭಾಂದಿನ್, ಗಧಾರ್ ದರ‍್ಯಾವ್‌ಮ ಡುಬೈನಾಖಾನುಸ್ ಇನ ಅಛ್ಛು಼. ಜಗತ್ನಿ ಹಾಲ್ನ ಶಾತ್ ಬೋಲು! ಶನಕತೊ, ಅದ್ಮಿನ ಪಾಪ್‌ಮ ಚ಼ಲಾವವಾಳು ರಾಛು಼ಖ್ಹಾರು ಛಾ಼! ಇಮ್ನು ರಾಛು಼ಖ್ಹಾರು ಕದೇಬಿ ಚಾ಼ಲ್‌ಷೆ. ಕತೋಬಿ ಇಮ್‌ ಹುವ್ವಾನಿಘೋಣಿ ಕರಾಸ್ತೆ ಯೋ ಅದ್ಮಿನಿ ಹಾಲ್ನ ಶಾತ್ ಬೋಲು!
“ತಾರೊ ಹಾತ್ ನತರ್‌ಕಿ ತಾರೊ ಗೋಡೊ ತುನ ಪಾಪ್‌ಮ ಖ್ಹಪ್‌ಡಾವ್‌ತೊ ಉಶೇತೊ, ಇನ ಕತ್ರೀನ್ ಫೇಕಿದೆ! ಬೇ ಹಾತ್ ಅಜು಼ ಬೇ ಗೋಡ ರ‍್ಹೀನ್, ಹರ್‌ಹಮೇಶಾನಿ ಆಗ್‌ಮ ಫೆಕಾವಥೀಬಿ, ಹಾತ್-ಗೋಡಕೊಂತೆ ಹರ್‌ಹಮೇಶಾನಿ ಜಿ಼ಂದ್‌ಗೀಮ ಜಾ಼ವಾನೂಸ್ ತುನ ಅಶೇಲ್. ತಾರೊ ಡೋಳೊ ತುನ ಪಾಪ್‌ಮ ಖ್ಹಪ್‌ಡಾವ್‌ತೊ ಉಶೇತೊ, ಇನ ಕಚ಼್‌ಕೋರಿನ್ ಫೇಕಿದೆ! ಬೇ ಡೋಳಾ ರ‍್ಹೀನ್ ನರಕ್‌ನಿ ಆಗ್‌ಮ ಫೆಕಾವಥೀಬಿ ಎಕ್ಕಸ್ ಡೋಳೊ ರ‍್ಹೀನ್, ಹರ್‌ಹಮೇಶಾನಿ ಜಿ಼ಂದ್‌ಗೀಮ ಜಾ಼ವಾನೂಸ್ ತುನ ಅಶೇಲ್.
ಗುಮೈಗಯೂತೆ ಮೇಂಢಾನಿ ಬಾರೇಮ ಮತ್ಲಬ್‌ನಿ ಖೇಣಿ
(ಲೂಕ 15:3-7)
ಆ ನ್ಹಾನಾವ್‍ಮ ಏಕ್‌ನಾಬಿ ಕಡ್‌ತೆಲ್ ಕರಿ ನಕೊ ಸೋಚ಼್‌ಶು. ಸೊರ್ಗಾಮ ಅವ್ಣು ದೂತರ್ ಸೊರ್ಗಾಮ ಛಾ಼ತೆ ಮಾರ ಬಾನು ಮ್ಹೋಡಾನ ಹಮೇಶ ದೇಕ್ತುರ‍್ಹೇಸ್ ಕರಿ ಮೇ ತುಮೂನ ಬೋಲುಸ್. ಅದ್ಮಿನೊ ಛಿಯ್ಯೊ ಖರಾಬ್ ಹುಯಿಗಹುಯಾನ ಢೂಂಡಿನ್ ಬಚಾ಼ಡನ ಆಯೊ.
ತುಮೂನ ಕಿಮ್ ದೆಖಾವಸ್? ಏಕ್‌ ಅದ್ಮಿಕನ ಖ್ಹೋ ಮೇಂಢರ‍್ಹೀನ್, ಇನಾಮ ಏಕ್‌ ಮೇಂಢು ಗುಮೈಗಯೂತೆ, ಯೋ ಅದ್ಮಿ ನೌ ಉಪ್ಪರ್ ಖ್ಹಡ್‌ಚಾರೀಖ್ಹ್ ಮೇಂಢಾನ ಮ್ಹೆಂದಿನ್, ಗುಮೈಗಯೂತೆ ಯೋ ಮೇಂಢಾನ ಢೂಂಡಾನ ಜಾ಼ಯಿಕೊಯ್ನಿಕಿ ಶು? ಗುಮೈಗಯೂತೆ ಯೋ ಮೇಂಢು ಮಳ್ಯುತೊ, ಗುಮಾಯುಕೊಂತೆ ಯೋ ನೌ ಉಪ್ಪರ್ ಖ್ಹಡ್‌ಚಾರೀಖ್ಹ್ ಮೇಂಢವ್‌ಥೀಬಿ ಯೋ ಏಕ್‌ ಮೇಂಢಾನಖ್ಹಾಜೆ ಜಾ಼ಖ್ಹತ್ ಖ್ಹುಶಿ ಕರಾಸ್ ಕರಿ ಮೇ ತುಮೂನ ಖ್ಹಾಚಮಾಬಿ ಬೋಲುಸ್. ಇಮ್ಮಸ್ ಆ ನ್ಹಾನಾವ್‍ಮ ಏಕ್‌ಬಿ ಖರಾಬ್ ನಾ ಜಾ಼ವ್ಣು ಕರಿ ಬೋಲಾನುಸ್ ಸೊರ್ಗಾಮ ಛಾ಼ತೆ ತುಮಾರ ಬಾನಿ ಮರ್ಜಿ.
ಪಾಪ್ ಕರಾಸ್ತೆ ಭೇನೆ ನತರ್ ಭೈನಿ ಬಾರೇಮ
ತಾರೊ ಭೈ ತಾರಿ ವಿರೋದ್ ಗಲತ್‌ ಕರ‍್ಯೋತೊ, ತೂ ಜೈ಼ನ್, ಯೋ ಎಕ್ಲೋಸ್ ರ‍್ಹವಾನಿ ವಖ್ಹತ್‌ಮ, ಇನಿ ಗಲ್ತಿನ ಇನ ಬೋಲಿವತಾಳ್. ಯೋ ತಾರಿ ವಾತೇನ ಖ್ಹಮ್‌ಜಿಗಯೋತೊ ತಾರ ಭೈನ ತೂ ಪಾಛೊ಼ ಕಮೈಲಿದೊ ಕರಿ. ಕತೋಬಿ ಯೊ ತಾರಿ ವಾತೆನ ನಾ ಖ್ಹಮ್‌ಜ್ಯೋತೊ, ತಾರ ಜೋ಼ಡೆ ಬಿಜು಼ ಏಕ್‌ ನತರ್‌ಕಿ ಬೇ ಜ಼ಣಾನ ಬುಲೈಲಿ ಇನಾಕನ ಜಾ಼, ಶನಕತೊ ‘ಹರೇಕ್ ವಾತೇನ ಬೇ ನತರ್‌ಕಿ ತೀನ್ ಅದ್ಮಿನಿ ಸಾಕ್ಷಿ ರ‍್ಹೇಣು. ಯೋ ಇವ್ಣಿ ವಾತೇನಾಬಿ ನಾ ಖ್ಹಮ್‌ಜ್ಯೊತೊ, ಸಭೆನ ಬೋಲ್, ಯೋ ಸಬೇನಿ ವಾತೇನಾಬಿ ನಾ ಖ್ಹಮ್‌ಜ್ಯೋತೊ ಯೋ ದೇವ್‌ಮ ವಿಶ್ವಾಸ್‍ಕರಾಕೊಂತೆ ನತರ್‌ಕಿ ಶುಂಕ ಮಾಂಗವಾಳ ಅದ್ಮಿನಿಘೋಣಿ ಇನ ದೇಕ್.
ಮೇ ತುಮೂನ ಖ್ಹಾಚಮಾಬಿ ಬೋಲುಸ್: ತುಮೆ ಆ ಧರ್ತಿಪರ್ ಶಶ್ಶಾತ್ ಭಾಂದಾಸ್ಕಿ, ಯೋ ಖ್ಹಾರು ಸೊರ್ಗಾಮಾಬಿ ಭಂದೈರ‍್ಹೀಶೆ, ಅಜು಼ ತುಮೆ ದರ್ತಿಪರ್ ಶಶ್ಶಾತ್ ಛೋ಼ಡಾಸ್ಕಿ ಯೋ ಖ್ಹಾರು ಸೊರ್ಗಾಮಾಬಿ ಛೋ಼ಡಾವ್‌ಶೆ.
ಎತ್ರೇಸ್ ಕಾಹೆತೆ, ತುಮಾರಾಮ ಬೇ ಜ಼ಣು ಆ ಧರ್ತಿಪರ್ ಎಕ್ಕಸ್ ಮನ್‌ಥಿ ಶಾತ್ ಮಾಂಗಿಲಿದುತೋಬಿ ಸೊರ್ಗಾಮ ಛಾ಼ತೆ ಮಾರೊ ಬಾ ಇವ್ಣುನ ದಿಶೆ ಕರಿ ಮೇ ತುಮೂನ ಖ್ಹಾಚಮಾಬಿ ಬೋಲುಸ್. ಶನಕತೊ ಬೇ ನತರ್‌ಕಿ ತೀನ್ ಜ಼ಣು ಮಾರ ನಾಮ್ಪರ್ ಕಿಜ್ಗಾ಼ ಎಕ್ಟು ಹುಯಿನ್ ಐರ‍್ಹೇಸ್ಕಿ ಹಿಜ್ಜಾ಼ ಇವ್ಣ ಇಚ಼್‌ಮ ಮೇ ರ‍್ಹೆವುಸ್‌.
ಮಾಪ್‌ ಕರಾಕೊಂತೆ ಆಳ್ನಿ ಬಾರೇಮ ಮತ್ಲಬ್‌ನಿ ಖೇಣಿ
ತದೆ ಪೇತ್ರನೆ ಯೇಸುಕನ ಆಯಿನ್, “ಪ್ರಭು, ಮಾರೊ ಭೈ ಮಾರಿ ವಿರೋದ್ ಗಲತ್‌ ಕರ‍್ಯೋತೊ, ಮೇ ಇನ ಕೆತ್ರಿಹಲ್ಲ ಮಾಪ್‌ ಕರ‍್ನು? ಖ್ಹಾತ್ ಹಲ್ಲಾಕಿ ಶು?” ಕರಿ ಇನ ಪುಛಾ಼ಯೊ.
ಯೇಸುನೆ, “ಖ್ಹಾತ್ ಹಲ್ಲಾ ಕಾಹೆ, ಖ್ಹಾತ್ ಖ್ಹಡ್‌ತೀನಿಖ್ಹ್ ಹಲ್ಲ” ಕರಿ ಜವಾಬ್‌ ದಿದೊ. “ಶನಕತೊ ಸೊರ್ಗ ರಾಜ್ಯನ ಇನ ಸೇವಕರ್‌ಥಿ ಪೈಶಾನಿ ಇಶಾಬ್ ಲೇವ್ಣುಕರಿ ತೀರ್ಮಾನ್ ಕರಾಸ್ತೆ ಏಕ್‌ ರಾಜಾ಼ನಿಘೋಣಿ ಛಾ಼. ಯೋ ಇಶಾಬ್ ಲ್ಯವಾನು ಶುರುಕರ್‌ತಾನ, ಕರೋಡೊ ರಪ್ಯ ದೇವ್ಣುಥೂತೆ ಏಕ್‌ನ ಇನಾಕನ ಲಾಯು. ಯೋ ಕರಜ಼್ ಫೇಡಾನ ಇನಾಕನ ಶಾತ್ಬಿ ಕೋ ಥೂನಿತೆ ಇನಖ್ಹಾಜೆ, ಇನ ಯಜಮಾನ್ನೆ, ‘ಇನಾಬಿ ಇನಿ ಬಾವಣ್‍ ಅಜು಼ ಲಡ್ಕಾವ್‍ನ, ಅಜು಼ ಇನಾಕನ ಛಾ಼ತೆ ಖ್ಹಾರಸ್ನ ವೇಚಿನ್, ಯೋ ಕರಜ಼್‌ನ ಫೇಡ್‍ಣು’ ಕರಿ ಹುಕುಮ್ ದಿದೊ. ತದೆ ಯೋ ಆಳ್‌ನೆ ಇನ ರಾಜಾ಼ನ ಆಡ್‍ಪಡಿನ್, ‘ರಾಜಾ಼, ಜ಼ರ ಖ್ಹಮಾಳಿಲೇ, ಮೇ ತುನ ದೇವ್ಣುತೆ ಖ್ಹಾರುಸ್ ಫೇಡುಸ್’ ಕರಿ ಇನ ಗಿಂಗೈಲಿದೊ. ಅನ ದೇಖಿನ್ ಯೋ ಯಜಮಾನ್ನೆ ಇನ ಆಳ್‌ಪರ್ ಗೋರ್‌ಖೈನ್, ಯೋ ದೇವ್ಣುತೆ ಖ್ಹಾರು ಕರಜ಼್‌ನ ಮಾಫ್‌ಕರೀನ್, ಇನ ಜಾ಼ವಾನ ಮ್ಹೆಂದಿದೊ.
“ಅನಕೇಡೆಥು ಯೋ ಆಳ್‌ ಭಾರ್‌ಆಯಿನ್, ಇನ ಥೋಡ ಪೈಶಾ ದೇವ್ಣುಥೂತೆ ಇನ ಜೋ಼ಡ್ಮ ಕಾಮ್ ಕರಾವಾಳೊ ಆಳ್‌ನ ದೇಖಿನ್, ಇನಿ ನ್ಹೇಟಿ ಭೀಚಿನ್, ‘ಮಾರು ಕರಜ಼್ ಫೇಡ್ಲ!’ ಕರಿ ಬೋಲ್ಯೊ. ತದೆ ಯೋ ಆಳ್‌ನೆ ಇನ ಗೋಡಾಪರ್ ಪಡೀನ್, ‘ಜ಼ರ ಖ್ಹಮಾಳಿಲೇ, ಮೇ ಫೇಡುಸ್!’ ಕರಿ ಗಿಂಗೈಲಿದೊ. ಕತೋಬಿ ಇನೆ ಮಾನ್ಯೊಕೊಂತೆ, ಇನ ಧರೀನ್, ಕರಜ಼್ ಫೇಡಾತೋಡಿ ಇನ ಜೇಲ್‌ಮ ಘಲಾಯೊ. ತದೆ ಅನ ದೇಖ್ಯೂತೆ ಬಿಜಾ಼ಖ್ಹಾರ ಆಳ್‌ನೆ ಘಣು ದುಖ್ ಖೈನ್, ಯಜಮಾನ್‍ಕನ ಆಯಿನ್, ಚಾ಼ಲ್ಯುತೆ ಇನಿ ಬಾರೇಮ ಖ್ಹಾರುಸ್ ಇನ ಬೋಲ್ಯು. ತದೆ ಯಜಮಾನ್ನೆ ಯೋ ಆಳ್‌ನ ಬುಲೈನ್, ‘ತೂ ಖರಾಬ್ ಆಳ್‌! ತೂ ಮನ ಬೋಲಿಲೇತಾನ, ಮನ ದೇವ್ಣುತೆ ಯೋ ಖ್ಹಾರೂಸ್ ಕರಜ಼್‌ನ ಮೇ ಮ್ಹೆಂದಿದೋನಿ. ಮೇ ತಾರಪರ್ ಗೋರ್‌ ವತಾಳ್ಯೊತೆ ಇಮ್ಮಸ್, ತೂಬಿ ತಾರ ಜೋ಼ಡ್ಮ ಕಾಮ್ ಕರಾವಾಳೊ ಯೋ ಆಳ್‌ನ ಮಾಪ್‌ ನಾ ಕರ್ನುಥೂಕಿ ಶು?’ ಕರಿ ಬೋಲಿನ್, ಯಜಮಾನ್ನೆ ಖೀಜ಼್‌ ಕರೀನ್‌, ಇನ ದೇವ್ಣುಥೂತೆ ಖ್ಹಾರುಸ್ ಕರಜ಼್ ಫೇಡಾತೋಡಿ, ಇನ ದಂಡ್‌ ದ್ಯವಾನಖ್ಹಾಜೆ ಜೇಲ್‌ಮ ಘಲಾಯೊ.
ತುಮಾರಾಮ ಹರೇಕ್ ಜ಼ಣು ಇನ ಭೈನ ದಿಲ್‌ಥಿ ಮಾಪ್‌ ನಾ ಕರ‍್ಯಾತೊ, ಸೊರ್ಗಾಮ ಛಾ಼ತೆ ಮಾರೊ ಬಾಬಿ ತುಮೂನ ಯೋ ರಾಜಾ಼ನೆ ಕರ‍್ಯೊತೆ ಇಮ್ಮಸ್ ಕರ್ಶೆ” ಕರಿ ಬೋಲ್ಯೊ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.