Waghri Booli Bible
ಆದಿಕಾಂಡ 40
ಯೋಸೇಫ್‌ಥಿ ಖ್ಹೋಣ್ಯಾನು ಮತ್ಲಬ್
ಆಖ್ಹಾರು ಚಾ಼ಲನ ಬಾದ್ಮ ಈಜಿಪ್ಟ್‌ನೊ ರಾಜ಼ ಫರೋಹನ ದ್ರಾಕ್ಷಿನೊರಖ್ಹ್‌ ದ್ಯವಾಳೊ ಅಜು಼ ಭೋಜ಼ನ್ ಪಿಕೈದ್ಯವಾಳೊ ಖೆವೀಕಿ ಎಕ್ ಬಾರೇಮ ಇವ್ಣ ಯಜಮಾನ್ನ ಧೋಕೊ ದೀರಾಖ್ಯಾಥ. ಇನಖ್ಹಾಜೆ ಫರೋಹನೆ ಯೊ ಭೇಜ಼ಣ ಕಾಮ್‌ವಾಳ ಅದಿಕಾರಿಪರ್‌ ಇರಾದೊ ಕರೀನ್, ಇವ್ಣುನ ಕಾವಲ್ ಕರವಾಳನೊ ಅದಿಕಾರಿನ ಘರ್‌ಮ ಯೋಸೇಫ ಥೋತೇಸ್‌ ಜೇಲ್‌ಮ ಕೋಂಡಿರಾಖ್ಯೊಥೊ. ತದೆ ಶಿಪಾಯಿನೆ ಯೊ ಬೇಜ಼ಣಾನ ದೇಕ್‌ಬಾಲ್‌ಕರಾನು ಯೋಸೇಫ್‌ನ ದಿದೋ. ಇನಾಖ್ಹಾಜೆ ಯೋಸೇಫ ಇವ್ಣಿ ಚಾ಼ಕ್ರಿ ಕರ್ನುಪಡ್ಯೂಥು. ಅಮ್ ಇವ್ಣೆ ಥೋಡ ದನ್ ಕಾವಲ್‌ಮರ‍್ಹಾವದೀನ್ ಇವ್ಣ ಭೇಜ಼ಣಾನಾಬಿ ಕತೊ, ಈಜಿಪ್ಟ್‌ನೊ ರಾಜ಼ನೆ ಜೇಲ್‌ಮ ಘಲೈರಾಖ್ಯೋಥೋತೆ ದ್ರಾಕ್ಷಿನೊ ರಖ್ಹ್ ದ್ಯಾವಾಳನಾಬಿ, ಭೋಜ಼ನ್ ಪಿಕಾವವಾಳನಾಬಿ ಎಕ್ಕಸ್ ರಾತ್ಮ ಖ್ಹೋಣ್ಯುಪಡ್ಯು; ಇವ್ಣ ಭೇಜ಼ಣಾನ ಖ್ಹೋಣ್ಯಾನ ಅಲಕ್ ಅಲಕ್ ಮತ್‌ಲಬ್‌ಥು. ವ್ಹಾಣೆ ಯೋಸೇಫ್ ಇವ್ಣಕನ ಆವಾಮ ಇವ್ಣೆ ವೇಚ಼್‌ಣೆಮ ರ‍್ಹವಾನಿಘೋಣಿ ದೆಖಾಯು. ಅನ, ಇನೆ ದೇಖಿನ್, “ತುಮಾರುಮ್ಹೋಡು ಶನಾ ಉದಾಶಿ ಛಾ?” ಕರಿ ಇನಿ ಜೋ಼ಡ್ಮ ಜೇಲ್ಮಥೂತೆ ಫರೋಹನ ಕಾಮ್‌ವಾಳನ ಪುಛಾ಼ಯೊ. ಇವ್ಣೆ, “ಹಮುನ ಖ್ಹೋಣ್ಯುಪಡ್ಯು; ಇನು ಮತ್ಲಬ್‌ನ ಬೋಲಾವಾಳು ಕೋಣ್‌ಬಿ ಕೊಯ್ನಿ” ಕರಿ ಬೋಲ್ಯು. ತದೆ ಯೋಸೇಫ್‌ನೆ ಇವ್ಣುನ, “ಖ್ಹೋಣ್ಯಾನು ಮತ್ಲಬ್ ದೇವ್‌ಥಿ ಮಳೇಜಾ಼ಯಿ ಕೊಯ್ನಿಕಿ ಶು? ತುಮಾರು ಖ್ಹೋಣ್ಯು ಮನ ಬೋಲೊ” ಕರಿ ಬೊಲ್ಯೊ. ತದೆ, ಯೊ ದ್ರಾಕ್ಷಿನೊ ರಖ್ಹ್‌ದ್ಯಾವಾಳೊ ಅದಿಕಾರಿನೆ ಯೋಸೇಫ್‌ನ, “ಮಾರ ಖ್ಹೋಣ್ಯಾಮ ಎಕ್ ದ್ರಾಕ್ಷಿನೊ ವೇಲೊ ಮಾರಖ್ಹಾಮ್ಣೆ ರ‍್ಹಾವಾನು ದೇಖ್ಯೊ. ಇನ ತೀನ್ ಡಾಳಿಯೇಥಿ. ಯೊ ಚಿಗುರ್‌ತಾನಸ್ ಫೂಲ್ ಖ್ಹಾರು ಮ್ಹೇಲ್ಯು; ಯೊ ಫೂಲ್‌ಖ್ಹಾರು ಗುಚ್ಚಾ಼ಹುಯಿನ್ ಪಂಡು ಮ್ಹೇಲಿನ್‌ ಪಕಾಯು. ಫರೋಹನು ಪಿಯಾನುರಾಛು಼ ಮಾರ ಹಾತ್‌ಮಥೂತೆ ಇನಾಖ್ಹಾಜೆ ಮೇ ಯೊ ಗುಚ಼್ಚಾವ್ನ ವ್ಹಾಡಿನ್ ರಾಛಾ಼ಮ ನಿಚೋಡಿನ್‌ ಫರೋಹನ ಹಾತ್ಮ ದಿದೊ” ಕರಿ ಬೊಲ್ಯೊ. ಇನ ಯೋಸೇಫ್‌ನೆ, “ಯೊ ಖ್ಹೋಣ್ಯಾನು ಮತ್ಲಬ್ ಶಾತ್‌ಕತೊ, ಯೊ ತೀನ್ ಡಾಳಿಸ್ ತೀನ್ ದನ್‌ಖ್ಹಾರು; ಬಿಜು಼ ತೀನ್ ದನ್ಮ ತುನ ಛುಟ್ಕಾರ್ ಕರ್‌ಶೆ, ತುನ ಕ್ಷಮಾಪಣ್ ಕರ್‌ಶೆ ಫರೋಹ ತುನ ಪಾಛೋ಼ ಕಾಮ್ಮ ಮಳೈಲಿಶೆ; ತೂ ಇನ ಅಗಾಡಿನಿತರಸ್ ಫರೋಹನ ದ್ರಾಕ್ಷಿನೊರಖ್ಹ್‌ ದ್ಯಾವಳೊ ಹುಯಿನ್ ಇನ ಹಾತ್ಮ ಪಾಛೊ಼ ಪಿಯಾನ ರಾಛ಼ನ ದೀಶ್. ಕತೋಬಿ ತೂ ಖ್ಹುಕ್‌ಥಿ ರ‍್ಹವಾನಿವಖ್ಹ್‌ತೆ ಮನ ಮದತ್‌ ಕರಾನು ಭೈಕೀಶ್‌ನಕೋತೆ ಫರೋಹನ ಮಾರಿಬಾರೇಮ ಖ್ಹಮ್‌ಜಾ಼ಡಿನ್‌ ಮನ ಆ ಜೇಲ್‌ಮಾಥೊ ಛೋ಼ಡಾವ್ಣು. ಮೇ ಇಬ್ರಿಯ ದೇಖ್ಹ್‌ವಾಳೊ. ಥೋಡಜ಼ಣಾನೆ ಮನ ಗುಲಾಮ್‌ಬಣೈನ್ ಆ ದೇಖ್ಹ್‌ನ ಧರಿಲಾಯು. ಹಜ್ಜಾ಼ಬಿ ಮೇ ಶನೂಬಿ ಗಲತ್‌ಕರ‍್ಯೊಕೊಂತೆ ಜೇಲ್‌ಮ ಘಲಾಯೊ” ಕರಿ ಬೊಲ್ಯೊ.
ಯೋಸೇಫ್‌ನೆ ಬೋಲ್ಯೋತೆ ಮತ್ಲಬ್ ಅಛ಼್ಛು ಹುಯಿರುಸ್‌ ಕರಿ ಮಾಲುಮ್ ಕರಿಲಿದೋತೆ ಯೊ ಅದಿಕಾರಿನೆ ಭೋಜ಼ನ್ ಪಿಕಾವವಾಳನೆ ಇನ, “ಮೇ ದೇಖ್ಯೊತೆ ಖ್ಹೋಣ್ಯಾನ ಬೋಲೂಸ್ ಖ್ಹಮಜ್; ಅಛ್ಛೂ಼ಖ್ಹು ರೋಟ ಭರೈರ‍್ಹೂತೆ ತೀನ್ ಟೋಕ್ರಿಯೇ ಮಾರ ಮುಡ್‌ಕ್ಯಾಪರ್‌ಥು. ಉಪ್ಪರ್‌ಲಿ ಟೋಕ್ರಿಮ ಅಲಕ್ ಅಲಕ್ ಥರಾನು ಚೀಜ಼್ ಫರೋಹನ ಖ್ಹಾಜೆಥು. ಜಿನಾವರ್‌ ಅಯಿನ್ ಯೊ ಅಖ್ಖಾನ ಮಾರ ಮುಡ್‌ಕ್ಯಾಪರ್‌ನಿ ಟೋಕ್ರಿಮಾಥುಸ್‌ ಖವ್‌ಕರ್ತೂಥು” ಕರಿ ಬೊಲ್ಯೊ. ಇನ ಯೋಸೇಫ್‌ನೆ, “ತಾರ ಖ್ಹೋಣ್ಯಾನು ಮತ್ಲಬ್ ಶಾತ್‌ಕತೊ, ಯೊ ತೀನ್ ಟೋಕ್ರೀಸ್ ತೀನ್ ದನ್; ಬಿಜು಼ ತೀನ್ ದನ್ನಾಮಹಿ ಫರೋಹ ತಾರ ಘಲೆಂಡಾನ ಕತ್‌ರೈನ್ ತಾರ ಧಡ್‌ನ ಝಾ಼ಡ್ನ ಠಂಗಾವ್‌ಶೆ; ಜಿನಾವರ್‌ ಆಯಿನ್‌ ತಾರಿ ಬೋಟಿನ ತೋಡಿನ್‌ ಖೈನಾಕ್‌ಶೆ” ಕರಿ ಬೊಲ್ಯೊ. ತೀನ್ನ ದನ್ಮ ಫರೋಹನು ಪೈದಾಖ್ಹ್‌ನೊ ದನ್‌ಹುಯಿರೋಥೋತೆ ಇನಖ್ಹಾಜೆ ಇನೆ ಇನು ಆಳ್‌ಖ್ಹಾರಾನ ಇರಂದಿ ಪಿಕೈನ್‌, ಮುಖಿಯ ಪಾನದ್ಯವಾಳನಬಿ ಮುಖ್ಯ ಬೋಜ಼ನ್‌ಕರವಾಳನಬಿ ಛುಟ್ಕಾರ್ ಕರ‍್ಯೊ. ಪಾನದ್ಯವಾಳ ಮುಖ್ಯನ ಪಾಛೋ಼ ಇನ ಕಾಮ್‌ದಿದೊ; ಇನೆ ಪಾನ್ಕನ ರಾಛ಼ನ ಫರೋಹನ ಹಾತ್ಮ ದ್ಯಾವಖ್ಹರ್‌ಕುಹುಯು; ಕತೋಬಿ ಭೋಜ಼ನ್ ಕರಾವಾಳ ಮುಖ್ಯನ ಫಾಖ್ಹೋದಿದೊ. ಅಮ್ ಯೋಸೇಫ್‌ನೆ ಬೋಲ್ಯೋತೆ ಇಮ್ಮಸ್ ಹುಯು. ರ‍್ಹಯುತೋಬಿ ಪಾನ್ಕವಾಳನ ಮುಖ್ಯನೆ ಯೋಸೇಫ್‌ನ ಯಾದ್‌ಕರ‍್ಯೊ ಕೊಂತೆ ಭೈಕಿಗೊ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.