Waghri Booli Bible
ಆದಿಕಾಂಡ 39
ಯೋಸೇಫ್ ಅಜು಼ ಪೋಟೀಫರನಿ ಬಾವಣ್
ಅಮ್ ಯೋಸೇಫ್‌ನ ಮೋಲ್ಲಿನ್‌ ಗಯುಹುಯ ಇಷ್ಮಾಯೇಲ್ಯವಾಳು ಈಜಿಪ್ಟ್‌ನ ಗಯು. ಹಿಜ಼್ಜಾ ಈಜಿಪ್ಟ್‌ನೊ ಪೋಟೀಫರ ಕರಿ ನಾಮ್‌ವಾಳನ ವೇಚಿನಾಖ್ಯು. ಹೈರೊತೆ ಫರೋಹನಿ ಆಸ್ಥಾನ್‌ಮ ಎಕ್ ಕಾಮ್‌ಗಿರಿ ಅಜು಼ ಶಿಪಾಯಿನೊ ಮೋಟೊ ಹುಯಿರ‍್ಹೊತೊ. ಯೆಹೋವ ದೇವ್ ಯೋಸೇಫ್‌ನಿ ಜೋ಼ಡ್ಮಥೋತೆ ಇನಖ್ಹಾಜೆ ಯೊ ಊಚೊ಼ ಭಡ್ತೊಹುಯಿನ್ ಈಜಿಪ್ಟ್‌ವಾಳೊಹುಯಿರ‍್ಹೊತೆ ಇನೊ ಯಜಮಾನ್ನ ಘರ್ಮ ಥೊ. ಯೆಹೋವ ದೇವ್ ಯೋಸೇಫ್‌ನ ಜೋ಼ಡ್ಮ ರ‍್ಹೀನ್ ಯೊ ಕರಾತೆ ಅಖ್ಖಾ ಕಾಮ್ಮ ಜೀತ್‌ದೇಸ್‌ಕರಿ ಇನೊ ಯಜಮಾನ್ ಮಾಲುಮ್ ಕರ‍್ಯೊ. ಪೋಟೀಫರನೆ ಯೋಸೇಫಪರ್ ದಯಾಕರೀನ್ ಇನ ಶೊಂತ್‌ ಘರ್‌ನ ದೇಖಿಲ್ಯಾವನ ರಾಖಿಲಿದೊ. ಆನಾಹುಯಿನ್, ಯೊ ಯಜಮಾನ್ನೆ ಇನಿ ಘರ್‌ನಿ ಜಿಮ್ಮೇದಾರಿಬಿ ಇನಿ ಅಖ್ಖೀಸ್ ಶೊತ್ನಬಿ ಯೋಸೇಫ್‌ನ ಹಾತ್ಮ ದಿನಾಖಿದಿದೊ. ಇನೆ ಯೋಸೇಫ್‌ನ, ಇನ ಘರ್‌ಪರ್‌ಬಿ ಶೊತ್‌ಪರ್‌ಬಿ ದೇಕ್‌ಬಾಲ್‌ಕರಾನ ದಿದೋತಪ್‌ಥೋ ಯೆಹೋವನೆ ಯೋಸೇಫ್‌ನಖ್ಹಾಜೇಥಿ ಯೊ ಈಜಿಪ್ಟ್‌ವಾಳನ ಘರ್‌ನ ಭಡಾಯೊ. ಘರ್‌ಮರ‍್ಹವೊ, ಖೇತರ್‌ಮರ‍್ಹವೊ, ಇನಥೂತೆ ಖ್ಹಾರಾಸ್‌ಪರ್ ಯೆಹೋವನಿ ಆಶೀರ್ವಾದ್‌ಹುಯು. ಇನಖ್ಹಾಜೆ ಪೋಟೀಫರನೆ ಇನಿ ಶೊತ್‌ಖ್ಹಾರು ಯೋಸೇಫ್‌ನ ಕಬ್‌ಜಾ಼ಮ ದಿನಾಖಿದಿದೊ. ಯೊ ಇನಾಕನ ಥೋತೆ ಇನಖ್ಹಾಜೆ ಯೊ ಖಾವಾನು ಖಾಣು ಏಕ್‌ನ ಮ್ಹೇಲಿನ್ ಬಿಜ಼ ಖೆವಾನಖ್ಹಾಜೇಬಿ ವೇಚ್‌ಣೆ ಕರ‍್ಯೊಕೊಯ್ನಿ. ಅಮ್ ಯೋಸೇಫ್ ರಂಗ್‌ರೂಪ್‌ಮ ಶನ್‌ಗಾರ್‌ನೊ ಹುಯಿರೋಥೊ ಅಮ್‌ರ‍್ಹಾವಪರ್ ಯೋಸೇಫನೊ ಯಜಮಾನ್ ಫೊಟಿಫರನಿ ಬಾವಣ್ ಇನಾಪರ್ ಡೋಳನಾಖಿನ್, ಇನಜೋ಼ಡ್ಮ ಖ್ಹುವಾನ ಬುಲೈ. ಕತೋಬಿ ಯೋಸೇಫ್ ಮಾನ್ಯೊಕೊಂತೆ” ಮಾರೊ ಯಜಮಾನ್ ಇನಿ ಶೊತ್‌ಖ್ಹಾರು ಮಾರ ಕಬ್‌ಜಾ಼ಮ ದೀನ್‌, ಮೇ ಛೂ಼ತೆ ಇನಖ್ಹಾಜೆ ಘರ್ಮ ಚಾ಼ಲಾತೆ ಖೆವ ಕಾಮ್‌ನಾಬಿ ವೇಚ಼್‌ಣೆಕರಾಕೊಂತೆ ಛಾ಼? “ಆ ಘರ್ಮ ಮಾರೇಥಿ ಮೊಟು ಕೋಣ್‌ಬಿಕೊಯ್ನಿ; ತೂ ಇನಿ ಬಾವಣ್‌ಹುಯಿರೀತೆ ಇನಾಖ್ಹಾಜೆ ತುನಾಖಲಿ ಮಾರ ಕಬ್‌ಜಾ಼ಮ ದಿದೋಕೊಯ್ನಿ; ಅಮ್‌ರ‍್ಹಾವಪರ್ ಮೇ ಅಥ್ರಾನು ಮೋಟುಖರಾಬ್‌ಕಾಮ್ ಕರೀನ್ ದೇವ್ನ ಖ್ಹಾಮ್ಣೆ ಕಿಮ್ ಪಾಪ್‌ಕರು?” ಕರಿ ಇನ ಯಜಮಾನ್ನಿ ಬಾವಣ್ಣ ಜ಼ವಾಬ್‌ದಿದೊ. ಹೈರಿತೆ ಯೋಸೇಫ್‌ನಿ ಜೋ಼ಡ್ಮ ಹರೇಕ್ ರೋಜ಼್ ಆ ವಾತ್ ಬೋಲಿತೋಬಿ ಇನೆ ಕಾನ್‌ದಿದೊಕೊಂತೆ ಇನಿ ಜೋ಼ಡ್ಮ ಖ್ಹುವಾನರ‍್ಹವೋ ಇನ ಖನ್ನೆ ರ‍್ಹವಾನರ‍್ಹವೊ ಮಾನ್ಯೋಸ್‌ಕೊಯ್ನಿ. ಅಮ್‌ರ‍್ಹವಾಪರ್ ಏಕ್‌ದನ್ ಯೊ ಇನ ಕಾಮ್‌ಪರ್ ಘರ್‌ಕನ ಐರ‍್ಹಾವಾನಿವಖ್ಹ್‌ತೆ ಘರ್ಮ ಆಳ್‌ ಕೋಣ್‌ಬಿ ಮಹಿಥೂಕೊಯ್ನಿ. ತದೆ ಹೈರಿತೆ ಇನ ಲುಂಗ್ಡಾನ ಧರ್‌ಲೀನ್, “ಮಾರಕನ ಖ್ಹುವಾನ ಆವ್” ಕರಿ ಬೋಲಖ್ಹತರ್ ಯೋಸೇಫ್‌ನೆ ಇನು ಝ಼ಗ್ಗಾನ ಇನ ಹಾತ್‌ಮಾಸ್ ಮ್ಹೆಂದಿನ್‌ ನಾಶಿಚ಼ಲೇಗೊ. “ಇನೆ ಇನು ಝ಼ಗ್ಗಾನ ಮಾರಹಾತ್‌ಮಾಸ್ ಮ್ಹೇಲಿನ್ ನಾಶಿಚ಼ಲೇಗೋನಿ” ಕರಿ ಬೋಲಿನ್, ಇನ ಘರ್‌ನ ಆಳ್‌ನ ಬುಲೈನ್, “ದೇಖೊ, ಮಾರ ಬಾವ್ರಿನೆ ಎಕ್ ಇಬ್ರಿಯವಾಳನ ಅಪ್ಣಾಮ ಮಳೈಲೀನ್ ಅಪ್ಣುನ ಚಾ಼ವ್‌ಣ್ಯ ಕಡೈನಾಖ್ಯೊ. ಯೊ ಅದ್ಮಿ ಮನ ಮಾನ್‌ಭಂಗ ಕರಾನಖ್ಹಾಜೆ ಮಾರಾಕನ ಆಯೊ. ಮೇ ಜೋ಼ರೇಖ್ಹು ಚಿಕ್ರಿಪಡಿ. ಅಜು಼ ಮೇ ಮದತ್‌ನಖ್ಹಾಜೆ ಚಿಕ್ರಾಖ್ಹತರ್‌ ಇನೆ ಇನು ಝ಼ಗ್ಗಾನ ಮಾರಕನಾಸ್ ಮ್ಹೇಲಿ ಘರ್‌ಮಾಥೊ ನಾಶಿಚ಼ಲೇಗೊ. ಕರಿ ಬೋಲಿ. ಯೋಸೇಫ್‌ನೊ ಯಜಮಾನ್ ಘರ್‌ಕನ ಆವಲಗೂಬಿ ಯೊ ಝ಼ಗ್ಗಾನ ಇನಾಕನಸ್ ಮಿಛಾ಼ಣಿರಾಖಿಥಿ. ಬಾವ್ರಿ ಆವಾನಿವಖ್ಹ್‌ತೆ ಇನೆ ಖೇಣಿ ಬೋಲಿವತಾಳಿ, “ಇನ, ತೂ ಬುಲೈರಾಖ್ಯತೆ ಯೊ ಇಬ್ರಿಯನೊ ಆಳ್‌ ಮನ ಮಾನ್‌ಭಂಗಕರಾನ ಮಾರಾಕನ ಆಯೊ. ಕತೋಬಿ ಮೇ ಜೋ಼ರೇಖ್ಹು ಚಿಕ್ರಾನಿ ವಖ್ಹ್‌ತೇಸ್‌ ಇನೆ ಇನೊ ಝ಼ಗ್ಗೊ ಮಾರಕನ ಮ್ಹೇಲಿನ್ ನಾಶಿಚ಼ಲೇಗೊ” ಕರಿ ಬೋಲಿ. “ತಾರೊ ಸೇವಕ್‌ನೆ ಮನ ಅಮ್‌ಕರ‍್ಯೊ” ಕರಿ ಬೋಲಿತೆ ಇನಿ ವಾತ್ನ ಖ್ಹಮ್‌ಜಿನ್ ಯಜಮಾನ್ ಘಣು ಚ಼ಂಢಾಳ್‌ ಛ಼ಡಾಯೊ, ತದೆ ಯೋಸೇಫನ ಧರೈನ್ ರಾಜ಼ನೆ ಚೋ಼ರ್‌ನ ಭಂದೈರಾಖ್ಯೋಥೋತೆ ಜೇಲ್‌ಮ ಘಲಾಯೊ. ಹಿಜ್ಜಾ಼ ಯೋಸೇಫ ಜೇಲ್‌ಮ ರ‍್ಹೇವ್ಣುಥು. ಕತೋಬಿ ಯೆಹೋವ ಯೋಸೇಫ್‌ನಿ ಜೋ಼ಡ್ಮರ‍್ಹೀನ್ ಇನಾಪರ್ ಆಶೀರ್ವಾದ್‌ ರಾಖಿನ್ ಇನ ಜೇಲ್‌ನೊ ಯಜಮಾನ್‌ಕನ ದಯಾಮಳಾನಿತರ ಕರ‍್ಯೊ. ಜೇಲ್‌ನೊ ಯಜಮಾನ್ನೆ ಜೇಲ್‌ಮ ಥೂತೆ ಖ್ಹಾರಾಸ್ನ ಯೋಸೇಫ್‌ನ ಹಾತ್ಮ ದಿನಾಖಿದಿದೊ. ಹಿಜ್ಜಾ಼ ಕರ‍್ನುಥೂತೆ ಖ್ಹಾರೂಸ್ ಕಾಮ್‌ ಯೋಸೇಫ್‌ನೇಸ್ ಕರಾಯೊ. ಯೆಹೋವನೆ ಇನಿ ಜೋ಼ಡ್ಮ ರ‍್ಹೀನ್ ಇನೆ ಕರ‍್ಯೋತೆಖ್ಹಾರೂಸ್ ಕಾಮ್ಮ ಜೀತ್‌ದಿದೋತೆ ಇನಖ್ಹಾಜೆ ಇನ ಹಾತ್ಮಥೂತೆ ಖೆವಿ ಎಕ್ ಬಾರೆಮಾಬಿ ಜೇಲ್‌ನೊ ಯಜಮಾನ್ ಶಾತ್‌ಬಿ ವೇಚ಼್‌ಣೆಕರ‍್ಯೋಕೊಯ್ನಿ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.